ފެރިހުގައި 2024 ވަނަ އަހަރު ބާއްވާ އޮލިމްޕިކްސްއަށް ކޮލިފައިވުމަށް އެހީވުމުގެ ގޮތުން ކުރިޔަށްގެންދާ އޮލިމްޕިކް ސްކޮލާޝިޕްގެ ފުރުސަތު ރާއްޖޭގެ ޓީޓީ ތަރި ފާތިމަތު ދީމާ އަލީއަށް ލިބިއްޖެއެވެ.
އޮލިމްޕިކް ސްކޮލާޝިޕަކީ ދުނިޔޭގެ އެކި ގައުމުތަކުގެ އެތުލީޓުންގެ ތެރެއިން ހުނަރާއި ހޯދާފައިވާ ކާމިޔާބީތަކަށް ބަލައި އޮލިމްޕިކްސްއަށް ކޮލިފައިވުމުގެ ފުރުސަތު އޮންނަ އެތުލީޓުންނަށް އިންޓަނޭޝަނަލް އޮލިމްޕިކް ކޮމެޓީ (އައިއޯސީ) އިން ދޭ މަލީ އަދި ފަންނީ އެހީތެރިކަމެކެވެ.
ދީމާއަށް މި ފުރުސަތު ލިބުމާއި ގުޅިގެން ޓޭބަލް ޓެނިސް އެސޯސިއޭޝަން އޮފް މޯލްޑިވްސް (ޓީޓީއޭއެމް)ގެ ރައީސް އަލީ ރަޝީދު (އައްޔަ) "ރާއްޖެ.އެމްވީ"އަށް ވިދާޅުވީ، މިއީ ޓީޓީއަށް ރާއްޖޭގެ ކުޅިވަރަށް ލިބުނު ބޮޑު ކާމިޔާބީއެއް ކަމަށެވެ. އަދި ދީމާއަށް މި ފުރުސަތު ލިބުނީ މިދިޔަ ހަތަރު އަހަރު ތެރޭގައި ދީމާގެ އާއިލާގެ އިތުރުން ކުޅިވަރާ ބެހޭ ވުޒާރާ ޚާއްސަކޮށް ކުޅިވަރާ ބެހޭ ވަޒީރު އަޙްމަދު މަޚްލޫފް އިތުރުން މޯލްޑިވްސް އޮލިމްޕިކް ކޮމެޓީ (އެމްއޯސީ) ގުޅިގެން ކުރިޔަށް ގެންދިޔަ ތަމްރީންތަކުގެ ސަބަބުން ކަމަށެވެ. އަދި ދީމާއަށް ލިބުނު މި ސްކޮލަޝިޕްގެ ސަބަބުން ވަރަށް ބޮޑު ލުޔެއް ލިބޭނެކަމަށް ގަބޫލުކުރަައްވާ ކަމަށް އައްޔަ ފާހަގަކުރެއްވިއެވެ.
ދީމާގެ ތަމްރީނުތައް މިވަގުތު ކުރިޔަށް ގެންދަނީ ތައިލޭންޑްގެ ވެރިރަށް ބެންކޮކްގައެވެ. ކުުޅިވަރާ ބެހޭ ވުޒާރާގެ އެހީތެރިކަމާއެކު ލިބުނު މި ފުރުސަތުގައި ދީމާ ތަމްރީންތައް ތައިލެންޑްގައި ކުރިޔަށް ގެންދާތާ މިހާރު ތިން މަސް ވަނީ ވެފައެވެ. ޓީޓީއެމްއިން ބުނީ ތަމްރީނުތަކަށްފަހު ދީމާ އެނބުރި މާލެ އައުމަށް ހަމަޖެހިފައިވަނީ އަންނަ މަހު ރާއްޖޭގައި ބާއްވާ ސައުތު އޭޝިއަން ޖޫނިއާ އެންޑް ކެޑޭޓް ޗެމްޕިއަންޝިޕްގައި ވާދަކުރުމަށް އެ މުބާރާތުގެ 10 ދުވަސް ކުރިން ކަމަށެވެ.
އައްޔަ ވިދާޅުވީ ދީމާއަށް ސްކޮލަޝިޕް ލިބުމާއެކު މިހާރު ކުރަމުން އަންނަ މަސައްކަތަކީ ފެންވަރު ރަނގަޅު އައު ޓްރެއިނިންގ ސެންޓަރެއް ހަމަޖެއްސުމުގެ މަސައްކަތް ކަމަށެވެ. އަދި މި މަސައްކަތް ކުރަނީ ދީމާގެ އާއިލާއާ ގުޅިގެން ކަމަށާއި، ޓްރެއިނިންގ ސެންޓަރުގެ އިތުރުން އިންޓަނޭޝަނަލް ސްކޫލެއް ހޯދުމުގެ މަސައްކަތް ވެސް ކުރަމުން އަންނަ ކަމަށެވެ. ސަބަބަކީ ދީމާގެ ކިޔެވުމުގެ ކަންކަމަށް އުނދަގޫ ނުވާނެ ކަހަލަ ގޮތަކަށް ކަންކަން ހަމަޖެއްސުން ކަމަށް އައްޔަ ވިދާޅުވިއެވެ.
އުމުރުން އެންމެ ހަގު އުމުރުގައި ރާއްޖޭގެ އެންމެ ކާމިޔާބު އެތުލީޓަކީ ދީމާއެވެ. އޭނާ ވަނީ މީގެ ކުރިން ދުނިޔޭގެ ޖޫނިއާ ރޭންކިންގެ އަށްވަނަ އަށްވެސް ޖެހިލާފައެވެ. ދީމާ އަންނަނީ ބައިނަލްއަގްވާމީ ފެންވަރުގައި ލިބޭ ފުރުސަތުތަކުގެ ބޭނުން ރަނގަޅަށް ހިފަމުންނެވެ.
މީގެ ކުރިން 2019 ވަނަ އަހަރު މޮރިޝިއަސްގައި ކުރިޔަށްދިޔަ އިންޑިއަން އޯޝަން އައިލޭންޑް ގޭމްސް (އައިއޯއައިޖީ) ގައި ރާއްޖެއަށް ތިން ރަން މެޑަލް ދީމާ ހޯދައިދީފައިވާއިރު، އެ މުބާރާތާއެކު ދީމާ ވެގެން ގޮސްފައިވަނީ އައިއޯއައިޖީގައި ރާއްޖޭގެ އެންމެ ކާމިޔާބު އެތުލީޓަށެވެ. މީގެ އިތުރުން ދީމާ ވަނީ ސައުތު އޭޝިއާ ހޯޕްސް މުބާރާތުން ރަން މެޑަލް ހޯދާ އޭޝިއާ ހޯޕްސް މުބާރާތުން ރިހި މެޑަލް ހޯދައިފައެވެ.
