ސައުތު އޭޝިޔަން ޖޫނިއަރ ޓީޓީ މުބާރާތުގެ ލަވަ ލޯންޗުކޮށްފި

މި މަހު ރާއްޖޭގައި އޮންނަ ސައުތު އޭޝިޔަން ޖޫނިއަރ އެންޑް ކެޑޭޓް ޓޭބަލް ޓެނިސް ޗެމްޕިއަންޝިޕްގެ ރަސްމީ ލަވަ ލޯންޗުކޮށްފިއެވެ.

މި ލަވަ ލޯންޗުކޮށްދެއްވާފައި ވަނީ ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހުގެ އަނބިކަނބަލުން ފަޒްނާ އަޙުމަދުއެވެ. ލަވަ ލޯންޗުކޮށްދެއްވުމަށްފަހު ފަސްޓް ލޭޑީ ވަނީ މުބާރާތުގައި ބައިވެރިވާ ރާއްޖޭގެ އަންހެން އަދި ފިރިހެން ޓީމާއި ބައްދަލުކުރައްވާ ހިތްވަރުދެއްވާފައެވެ.

މި ބައްދަލުކުރެއްވުމުގައި މިނިސްޓަރ އޮފް ޔޫތު، ސްޕޯޓްސް އެންޑް ކޮމިއުނިޓީ އެމްޕަވަރމަންޓް އަހުމަދު މަޚްލޫފާއި ޓޭބަލް ޓެނިސް އެސޯސިއޭޝަން އޮފް މޯލްޑިވްސްގެ އިސްވެރިން ބައިވެރިވެވަޑައިގެންނެވިއެވެ. މި ބައްދަލުކުރެއްވުމުގައި މި މުބާރާތުގައި ބައިވެރިވާ ރާއްޖޭގެ ޓީޓީ ޓީމުގެ ޖަރޒީއެއް ވަނީ ފަސްޓް ލޭޑީއަށް ވެދުމަށްއަރުވާފައެވެ.

މުބާރާތުގައި ހިމެނެނީ 19 އަހަރުން ދަށް (ޖޫނިއަރ ކެޓަގަރީ)އާއި 15 އަހަރުން ދަށް (ކެޑޭޓް ކެޓަގަރީ)އެވެ. މުބާރާތް އޮންނާނީ މި މަހުގެ 9-11ށް ޒުވާނުންގެ މަރުކަޒުގައެވެ.

ކުޅުން ކުރިޔަށްދާއިރު ރާއްޖޭގެ ޓީމަށް ސަޕޯޓް ކުރުމަން ވީހާވެސް ގިނަމީހުން ކުޅޭތަނަށް ދިއުމަށް ޓީމްގެ އިސް ކުޅުން ތެރިން ވަނީ އެދިފައެވެ.