ގައުމީ ޓީޓީ ޓީމު ފުރަތަމަ ފަހަރަށް ޔޫރަޕުގެ ތަމްރީނަށް

ރާއްޖޭގެ ގައުމީ ޓޭބަލް ޓެނިސް (ޓީޓީ) ޓީމު ޔޫރަޕުގައި ތަމްރީނުކުރުމަށް ފުރައިފިއެވެ.

މިއީ ރާއްޖޭގެ ގައުމީ ޓީޓީ ޓީމު ޔޫރަޕުގައި ތަމްރީނުކުރާ ފުރަތަމަ ފަހަރެވެ. ތަމްރީނުތަކަށް ޓީޓީ ޓީމު ގޮސްފައިވަނީ ކްރޮއޭޝިއާއަށެވެ. މިއީ މޯލްޑިވްސް ސްޕޯޓްސް އެވޯޑްސްގައި ބައިވެރިވުމަށް ރާއްޖެ އައި ކްރޮއޭޝިއާގެ ޒޮރާންއާ ކުރެވުނު މަޝްވަރާގެ ތެރެއިން ހަމަޖެހުނު ދަތުރެއް ކަމަށް ޔޫތު މިނިސްޓަރު އަޙުމަދު މަޚްލޫފް ވިދާޅުވިއެވެ. ޒޮރާންގެ އެހީތެރިކަމާއެކު ވަނީ ދާދި ފަހުން ރާއްޖޭގައި ބޭއްވި ސައުތު އޭޝިއަން ޖޫނިއަރ އެންޑް ކެޑޭޓް ޓީޓީ މުބާރާތަށް ރާއްޖޭގެ ޓީމަށް ޓްރެއިނިން ކޮށްދިނުމަށް ކްރޮއޭޝިއާގެ ދެ ކުޅުންތެރިން ގެނެސްފައެވެ.

ރާއްޖެއިން ތަމްރީނަށް ދިޔަ ޓީމުގައި ހިމެނެނީ ހަތަރު ކުޅުންތެރިންނެވެ. އެއީ އަައިޝަތު ރަފާ ނާޒިމް، މަލާކް ބިންތް މުއިއްޒު، މިޝްކާ މުޙައްމަދު އިބްރާހިމްގެ އިތުރުން ޖުމާނާ ނިމާލްއެވެ. މިނިސްޓަރު މަޚްލޫފް ވަނީ މި ކުޅުންތެރިންނާ ބައްދަލު ކުރައްވާފައެވެ. މިކަމާ ގުޅިގެން ޓީޓީ އެސޯސިއޭޝަނުން ބުނީ މިއީ ޒުވާން ކުޅުންތެރިންނަށް ލިބުނު ވަރަށް ރަނގަޅު ފުރުސަތެއްކަމަށެވެ. އަދި މި ތަމްރީނު ދަތުރުގައި ކްރޮއޭޝިއާގެ 15 އަހަރުން ދަށާއި 19 އަހަރުން ދަށުގެ ގައުމީ ޓީޓީ ޓީމައެކު ކޭމްޕުކުރާނެ ކަމަށެވެ. މީގެ އިތުރުން ޓީޓީ އެސޯސިއޭޝަނުން ވަނީ މި ފުރުސަތު ހޯދައިދެއްވި ކަމަށްޓަކައި މިނިސްޓަރު މަޚްލޫފަށް ޝުކުރު އަދާކޮށްފައެވެ.

ގައުމީ ޓީޓީ ޓީމު ޔޫރަޕުގެ ތަމްރީނުތަކަށް ފުރިއިރު، ރާއްޖެއިން ވަނީ ޓީީޓީގައި ރަނގަޅު ކާމިޔާބީތަކެއް ވެސް ހޯދާފައެވެ. އެއާއެކު ސަރުކާރާއި ޓީޓީ އެސޯސިއޭޝަނާ ގުޅިގެން އަންނަނީ ޓީޓީ ކުރިއެރުވުމަށް ގިނަ މަސައްކަތްތަކެއް ކުރަމުންނެވެ. އެގޮތުގެ ތެރެއިން ދާދި ފަހުން ވަނީ ރާއްޖޭގައި ބައިނަލްއަގުވާމީ ޓީޓީ މުބާރާތެއް ވެސް ބާއްވާފައެވެ.