"މާ" ކިޔާ މީހަކު ހައްޔަރުކުރުމުން އެޅި އޮޅުންބޮޅުންތަކެއްގެ އަސަރު ޖެކް މާގެ ވިޔަފާރިއަށް

"މާ" ކިޔާ މީހަކު ހައްޔަރުކުރުމުން އެޅި އޮޅުންބޮޅުންތަކެއްގެ އަސަރު ޗައިނާގެ ބިލިއަނަރު ޖެކް މާގެ ވިޔަފާރިއަށް ކޮށްފިއެވެ.

ޗައިނާގެ ދައުލަތުގެ މީޑިއާ ސީ.ސީ.ޓީ.ވީ އިން ވަނީ "މާ" އާއި މެދު ފިޔަވަޅު އެޅުމަށް ކަމާބެހޭ އިދާރާތަކުން ނިންމާފައިވާކަމަށް ބުނެ ރިޕޯޓުކޮށްފައެވެ.

ޖެކް މާގެ އަލީބާބާ ފައުންޑޭޝަންގެ ހެޑްކުއާޓަރސް ޤާއިމުކޮށްފައި ހުންނަ ހެންޒޯ ސިޓީން "މާ" ނަމަކަށް ކިޔާ މީހަކު ހައްޔަރުކޮށްފައިވާއިރު، އޭނާއަށް ކޮށްފައިވަނީ އިންޓަރނެޓް މެދުވެރިކޮށް ޤައުމީ ސަލާމަތަށް ނުރައްކާވާފަދަ އަމަލެއް ހިންގަން އުޅޭ ކަމުގެ ތުހުމަތެވެ.

"މާ" ނަމަކަށް ކިޔާ އެމީހާ ހައްޔަރު ކުރުމާއެކު، އަލީބާބާ ފައުންޑޭޝަންގެ ހިއްސާގެ އަގު ވަނީ 9.4 އިންސައްތައަށް ދަށަށް ގޮސްފައެވެ. ސަބަބަކީ އިންވެސްޓަރުން އެމީހުންގެ ހިއްސާތައް ދޫކޮށްލަން ފެށުމުންނެވެ. އެކަމުގެ ސަބަބުން ހިއްސާގެ އަގު ދަށްވެ، އަލީބާބާ ކުންފުންޏަށް 27 ބިލިއަން ޑޮލަރުގެ ގެއްލުމެއްވިއެވެ.

ނަމަވެސް އެއީ ޖެކް މާ ނޫންކަން ކަށަވަރުވެފައިވާއިރު، އަނެއްކާވެސް ހިއްސާގެ އަގު ވަނީ މައްޗަށް ގޮސްފައެވެ. އެ އޮޅުންބޮޅުންތަކުގެ ސަބަބުން ޗައިނާގެ ދައުލަތުގެ މީޑިއާއިންވެސް ވަނީ އެ މައްސަލައިގައި ހައްޔަރުކުރީ ޖެކް މާ ނޫންކަމަށް ބަޔާންކޮށް އަލުން އެ ޚަބަރު ރިޕޯޓުކޮށްފައެވެ.

ޗައިނާގެ އެންމެ މުއްސަނދި ވިޔަފާރިވެރިޔާ، އަދި އަލީބާބާ ގްރޫޕްގެ ފައުންޑަރު ޖެކް މާގެ އަލީބާބާ ކުންފުންޏަކީ އީ-ކޮމާސް އަދި އިންޓަރނެޓާއި ޓެކްނޮލޮޖީއާ ގުޅުންހުރި މަސައްކަތްތަކަށް ޚާއްސަ ކުންފުންޏެކެވެ.