ހިޔާނާތުގެ ގޮތުގައި ނަމާލްއަށް 82 މިލިއަން ޔޫރޯ ލިބިފައިވާކަމަށް ބުނާ މައްސަލައެއް

ސްރީލަންކާގެ ސްޕޯޓްސް މިނިސްޓަރުގެ މަގާމުގައި ހުންނެވި ނަމާލް ރާޖަޕަކްސަގެ ހިޔާނާތުގެ އިތުރު މައްސަލަތަކެއް ފެންމަތިވެއްޖެއެވެ.

ލަންކާގެ ނޫހެއްކަމަށްވާ ޑެއިލީ މެއިލްއިން ރިޕޯޓުކޮށްފައިވާ ގޮތުގައި ސަރުކާރުން ހިންގި މަޝްރޫއުތަކާއި ގުޅުވައިގެން ނަމާލްއަށް ވަނީ ދެ ކުންފުންޏަކުން ފައިސާ ލިބިވަޑައިގެންފައެވެ. އެއީ ނެދަލަންޑްސްގެ ކުންފުންޏެއް ކަމަށްވާ "އެންއާރް ޕްރޮޖެކްޓްސް" އާއި އޮސްޓްރޭލިއާގެ ކުންފުންޏެއްކަމަށްވާ "އެސްޕަން މެޑިކަލް" ގެ ފަރާތުންނެވެ.

އެ މަޝްރޫއުތަކަކީ ނޫރަލިއާއާއި، ހެމްބަންޓޯޓާގެ ހޮސްޕިޓަލުތަކެއް ޤާއިމު ކުރުމާގުޅޭ މަޝްރޫއުތަކެކެވެ. އެގޮތުން އެ ފައިސާ ލިބުމުގައި މެދުވެރިއަކަށްވުމުގެ ތުހުމަތު ކުރެވިފައިވަނީ ނިމާލް ޕެރޭރާގެ މައްޗަށެވެ.

ކޮރަޕްޝަނާ ދެކޮޅު މަސައްކަތް ކުރާ "ވޮއިސް އެގެއިންސްޓް ކޮރަޕްޝަން" ގެ ފަރާތުން ވާހަކަ ދައްކަވަމުން ވަސަންތާ ސަމަރްސިންހާ ވިދާޅުވާ ގޮތުގައި، މި ހިޔާނާތުގެ މައްސަލަ ފެންމަތިވެގެން އައީ އެފަރާތުން ކުރަމުން ދިޔަ ތަހުގީގެއްގެ ތެރެއިންނެވެ. އެއީ "ކްރީޝް ޑީލް" ގެ މައްސަލައެވެ.

ކްރީޝް ޑީލްގެ ތަހުގީގުގައި ނަމާލް ވިދާޅުވެފައިވަނީ، އޭނާއަށް 60 މިލިއަން ރުޕީސް ލިބުނު ކަމަށާއި، އެ ފައިސާ އޭނާ ރަގްބީ މުބާރާތަށް ހަދިޔާ ކުރައްވާފައިވާ ކަމަށެވެ. އެހެންނަމަވެސް، ރަގްބީ ފައުންޑޭޝަނުން ވަނީ އެކަން ދޮގުކޮށްފައެވެ.

ކްރީޝް ޑީލްގެ ތަހުގީގު ހިންގަމުން ދަނިކޮށް މިހާރު މި ފެންމަތިވެގެން އުޅޭ ހިޔާނަތުގެ މައްސަލަ ސަމާލުކަމަށް އައިސްފައިވާއިރު، ނަމާލްއަށް 82 މިލިއަން ޔޫރޯ ލިބިވަޑަައިގެންފައިވާކަމަށް ތަހުގީގުން ވަނީ ހޯދިފައެވެ. އެއީ ހައްތަހާވެސް ނޫރަލިއާއާއި، ހެމްބަންޓޯޓާގެ ހޮސްޕިޓަލުތަކެއް ޤާއިމު ކުރުމާގުޅޭ މަޝްރޫއުތަކާއި ގުޅިގެން ލިބިވަޑައިގެންފައިވާ ފައިސާކަމަށް ވަސަންތާ ސަމަރްސިންހާ ވިދާޅުވެއެވެ.

އެހެންނަމަވެސް، "އެސްޕަން މެޑިކަލް" އަކީ ސިންގަޕޫރުގައި އެއްވެސް މަޝްރޫއެއް ހިންގާ ކުންފުންޏެއްވެސް ނޫންކަމަށް ޑެއިލީ މެއިލް ލަންކާގައި ރިޕޯޓު ކޮށްފައިވެއެވެ.

ވަސަންތާ ވިދާޅުވާ ގޮތުގައި އެ ފައިސާ ޖަމާކޮށްފައިވަނީ ނިމާލް ޕެރޭރާގެ "ސަބްރޭ ވިޝަން ހޯލްޑިންގްސް" ގެ އެކައުންޓަކަށެވެ. ސިންގަޕޫރުގައި ހުޅުވާފައިވާ މި އެކައުންޓަށް ފައިސާ ޖަމާކުރުމުން، އެ ފައިސާ ނަމާލްގެ އެކައުންޓަށް ފޮނުވާފައިވާކަމަށް ތަހުގީގުން ދައްކާކަމަށް އޭނާ ވިދާޅުވެއެވެ.

ނަމާލް ވަނީ މި ހުރިހާ ތުހުމަތުތައް ދޮގު ކުރައްވާފައެވެ.