ބުދަ ދުވަހު އޯލެވެލް، އައިޖީސީއެސްއީ އަދި އެސްއެސްސީ އިމްތިހާނު ފަށަން ތައްޔާރުވެއްޖެއެވެ.

އެޑިއުކޭޝަން މިނިސްޓްރީން ބުނީ 4 މެއި އިން ފެށިގެން 10 ޖޫން ގެ ނިޔަލަށް މި އިމްތިހާނު ކުރިޔަށް ދާނެ ކަމަށެވެ. މިއަހަރުގެ އިމްތިހާނުގައި 5،939 ދަރިވަރުން ބައިވެރިވާނެ ކަމަށް އެޑިއުކޭޝަން މިނިސްޓްރީން ބުނެއެވެ.

މި އިމްތިހާނު 4 މެއި ގައި ފަށަން ތާވަލުކޮށްފައިވީނަމަވެސް މި އިމްތިހާނުގައި އާޓް އެންޑް ޑިޒައިން ޕޭޕަރ ހަދާ ދަރިވަރުންގެ އިމްތިހާނު އޭޕްރިލްމަހުގެ 13 އަދި 14 ގައި ވަނީ ބާއްވާފައެވެ. އާޓް އެންޑް ޑިޒައިން ޕޭޕަރު ރާއްޖޭގެ އެކި ކަންކޮޅުތަކުން 181 ދަރިވަރުންވަނީ ހަދާފައެވެ.

މިއަހަރުގެ އޯލެވެލް، އައިޖީސީއެސްއީ އަދި އެސްއެސްސީ އިމްތިހާނު ރާއްޖޭގެ 239 ސެންޓަރެއްގައި ކުރިޔަށްދާނެކަމަށް އެޑިއުކޭޝަން މިނިސްޓްރީން ބުނެއެވެ. މީގެ އިތުރުން ޑިޕާޓްމަންޓް އޮފް ޕަބްލިކް އެގްޒޭމިނޭޝަންސް ގެ ބެލުމުގެ ދަށުން ސްރީލަންކާގައި ހުންނަ މޯލްޑިވްސް ކަލްޗަރަލް ސެންޓަރުގައާއި އަދި މެލޭޝިޔާގައި ހުންނަ މޯލްޑިވްސް ސެންޓަރ ގައި އެސްއެސްސީ އިމްތިހާނު ކުރިއަށް ދާނެ ކަމަށް އެޑިއުކޭޝަން މިނިސްޓްރީން ބުނެފައިވެއެވެ.

އިމްތިހާނުގެ ސުވާލުކަރުދާސްތައް ސެންޓަރުތަކަށް ގެންދިޔުމުގެ މަސައްކަތް އޭޕްރީލްމަހުގެ 20 ވަނަ ދުވަހުން ފެށިގެން 29 ދުވަހުގެ ނިޔަލަށް ކުރިޔަށް ގެންގޮސްފައިވެއެވެ.