ވެލާނާ އިންޓަނޭޝަނަލް އެއާޕޯޓަށް ހެލްތު އެކްރެޑިޓޭޝަން ސެޓްފިކެޓް ލިބިއްޖެ
މިއީ އެއާޕޯޓް ކައުންސިލް އިންޓަނޭޝަނަލް (އޭސީއައި) އިން ދޭ ސެޓްފިކެޓެއް
ވެލާނާ އިންޓަރނޭޝަނަލް އެއާޕޯޓް
އެއާޕޯޓް ކައުންސިލް އިންޓަނޭޝަނަލް (އޭސީއައި) އިން ދޭ ހަލްތު އެކްރެޑިޓޭޝަން ސެޓްފިކެޓް ވެލާނާ އިންޓަނޭޝަނަލް އެއާޕޯޓް (ވީއައިއޭ) އަށް ލިބިއްޖެއެވެ.
އެސެޓްފިކެޓަކީ އެއާޕޯޓުގައި ސިއްޙީ ރައްކާތެރިކަން ހުރި ވަރަށް ބަލައި ބައިނަލްއަގުވާމީ އެއާޕޯޓުތަކަށް ދޭ ސެޓްފިކެޓެކެވެ. މިއީ އެ ސެޓްފިކެޓް ވީއައިއޭއަށް ލިބުނު ދެވަނަ އަހަރެވެ.
މި ސެޓްފިކެޓް ވެލާނާ އިންޓަނޭޝަނަލް އެއާޕޯޓަށް އެންމެ ފުރަތަމަ ލިބުނީ 2020ވަނަ އަހަރުގެ ސެޕްޓެމްބަރު މަހުއެވެ. އެ އަހަރު ވީއައިއޭ ވެގެންދިޔައީ މުޅި އޭޝިއާއިން އެ ސެޓްފިކެޓު ހާސިލުކުރި ދެވަނަ އެއާޕޯޓަށެވެ.
ވީއައިއޭއަށް އެ ސެޓްފިކެޓް ލިބުނީ ކޮވިޑް-19 އިން ރައްކާތެރިވުމަށް އެ އެއާޕޯޓުގައި އަޅާފައިވާ ފިޔަވަޅުތައް ހަރުދަނާވުމުންނެވެ. އެ ސެޓްފިކެޓާއެކު އޭސީއައި އިން ފޮނުވި ސިޓީގައި ވަނީ ސިއްޙީ ރައްކާތެރިކަމުގެ މިންގަނޑު ދެމެހެއްޓުމަށް އެއާޕޯޓުން ކުރި މަސައްކަތްތަކަށް މަރުހަބާ ކިޔާފައެވެ.
ކޮވިޑާ ގުޅިގެން ގިނަ ގައުމުތަކުގެ ބޯޑަރުތައް ބަންދުކޮށް ރައްކާތެރި ކަމުގެ ފިޔަވަޅުތަކާއެކު އެންމެ ފުރަތަމަ ހުޅުވި އެއް އެއާޕޯޓަކީވެސް ވީއައިއޭއެވެ. މިފަދަ ފިޔަވަޅުތަކަކީ ބޭރު ގައުމުތަކުން މީހުން ދަތުރުކުރާއިރު ބަލާ ކަންކަމެވެ.
