އިމާރާތްތައް އުސްވާވަރަކަށް އަލިފާން ނިއްވާ ސިސްޓަމްތައް ގާއިމްކުރުން މުުހިންމު: އެމްއެންޑީއެފް
3 މެއި 2022 | އަންގާރަ 07:33ގިނަ އިމާރާތްތަކުގައި ސިސްޓަމްތައް ނުހުރޭ
ލެފްޓިނެންޓް މުއައްމަރު މުހައްމަދު
އުސް އިމާރާތްތައް ހަދާއިރު އަލިފާން ނިއްވާ ސިސްޓަމްތައް އެތަންތަނުގައި ހަރުކޮށްފައި ހުރުމަކީ މުހިންމު ކަމެއް ކަމަށް މޯލްޑިވްސް ނެޝަނަލް ޑިފެންސް ފޯސް (އެމްއެންޑީއެފް) ގެ ފަޔަރ އެންޑް ރެސްކިއު ސާވިސަސް އިން ބުނެފިއެވެ.
ރާއްޖެ ޓީވީގެ ފަލަ ސުރުޚީ ޕްރޮގްރާމުގައި ވާހަކަދައްކަވަމުން ފަޔަރ އެންޑް ރެސްކިއު ސާވިސަސްގެ ލެފްޓިނެންޓް މުއައްމަރު މުހައްމަދު ވިދާޅުވީ ކޮންމެ އިމާރާތެއްގައި ވެސް އަލިފާން ނިއްވާ ސިސްޓަމްތައް ގާއިމް ކުރުން މުހިންމު ކަމަށެވެ. އެއީ އޭގެ ސަބަބުން އަލިފާނުގެ ހާދިސާއެއް ހިނގައިފި ނަމަ ވަގުތުން އަލިފާން ނިއްވަން ފަސޭހަވާނެތީ ކަމަށް އޭނާ ވިދާޅުވިއެވެ.
މުއައްމަރު ވިދާޅުވީ މިހާރު އިމާރާތްތައް އުސްވަމުންދާއިރު އަލިފާން ނިއްވާ ސިސްޓަމްތައް ނެތުމުން އަލިފާނުގެ ހާދިސާތަކުގައި ވަރަށް ގިނަ ގޮންޖެހުންތަކާ ކުރިމަތިވާ ކަމަށެވެ.
އަލިފާނުގެ ހާދިސާއިން ރައްކާތެރިވުމަށް އެޅޭނެ ފިޔަވަޅުތަކާއި އެކަމަށް އާއްމުން ހޭލުންތެރި ކުރުމަށް ފަޔަރ އެންޑް ރެސްކިއު ސާވިސަސް އިން ދަނީ ގިނަ މަސައްކަތްތަކެއް ކުރަމުންނެވެ.
ރާއްޖޭގައި ހިނގާފައިވާ ގިނަ އަލިފާނުގެ ހާދިސާތަކުގައި ބޮޑެތި ގެއްލުން ވެފައިވަނީ އިމާރާތުގައި އަލިފާން ނިއްވާނެ ސާމާނު ގާއިމްކޮށްފައި ނެތުމުގެ ސަބަބުންނެވެ. އަދި އަލިފާން ރޯވެގެން އުޅޭ ކަމުގެ އިންޒާރު ދޭ ފަޔަރ ޑިޓެކްޓަރުތައް ވެސް ގިނަ އިމާރާތްތަކުގައި ހަރު ނުކުރާކަން ފާހަގަކުރެވިފައިވެއެވެ.
