ރެޓްރޯ ކޮފީ ފުޓްސަލް މުބާރާތް: ޗެމްޕިއަންކަން ހޯދީ ޓްރިޕަލް އޭޔޫ

ރ.އަލިފުށީގައި ކުރިއަށްގެންދިޔަ ރެޓްރޯ ކޮފީ ފުޓްސަލް މުބާރާތުގެ ޗެމްޕިއަންކަން ޓްރިޕަލް އޭޔޫ ހޯދައިފިއެވެ. އެޓީމް ޗެމްޕިއަންކަން ހޯދީ ފައިނަލްގައި 3-0 ން ފޯރި އެފްސީ ބަލިކޮށްގެންނެވެ.

ފައިނަލް މެޗުގައި ޓްރިޕަލް އޭޔޫގެ ތިން ލަނޑުގެ ތެރެއިން ދެ ލަނޑު ޖެހީ އާދަމް އިމްރާންއެވެ. ފައިނަލް މެޗުގެ މޮޅު ކުޅުންތެރިއަކީވެސް އޭނާއެވެ. އަދި މުބާރާތުގެ އެންމެ މޮޅު ކުޅުންތެރިއަކީވެސް އޭނާއެވެ. މުބާރާތުގައި އެންމެ ގިނަ ލަނޑު ޖެހި ތިން ކުޅުންތެރިންގެ ތެރޭގައިވެސް އިމްރާން ހިމެނެއެވެ. އޭނާއާއެކު ރަންބޫޓް ޙިއްޞާކުރި އަނެއް ދެ ކުޅުންތެރިންނަކީ ފޯރި އެފްސީގެ އަހުމަދު މުއީންއާއި, ޓްރިޕަލް އޭޔޫ މިކްސްގެ އަހުމަދު ޝަމީޒުއެވެ. މުބާރާތުގެ އެންމެ މޮޅު ފަސް ކުޅުންތެރިންގެ ތެރޭގައިވެސް މިތިން ކުޅުންތެރިން ހިމެނެއެވެ. އެންމެ މޮޅު ފަސް ކުޅުންތެރިންގެ ތެރޭގައި ދެން ހިމެނެނީ ފޯރި އެފްސީގެ އުނެއިސް އަބުދުލްރަހީމްއާއި, ޓްރިޕަލް އޭޔޫގެ އަހުމަދު އާދަމްއެވެ. މުބާރާތުގެ ފެއަރޕްލޭ ކުޅުންތެރިއަކީ ޔުނައިޓެޑް އޭޖީގެ އަހުމަދު މުއާޒްއެވެ.

މިމުބާރާތުގައި 10 ޓީމް ވާދަކުރިއެވެ. މިއަހަރުގެ ބޮޑު އީދުގައިވެސް ފުޓްސަލް މުބާރާތެއް ބާއްވާނެކަން ރެޓްރޯ ކޮފީން ވަނީ އިއުލާންކޮށްފައެވެ.