ކޮވިޑަށްފަހު ފުރަތަމަ ފަހަރަށް ހަރަމްފުޅުގައި ބޮޑުޖަމާއަތުގައި ޢީދު ނަމާދުކޮށްފި

ކޯވިޑް-19ގެ ބަލިމަޑުކަމާއި ގުޅިގެން ދެ އަހަރުގެ މެދުކެނޑުމަކަށްފަހު ފުރަތަމަ ފަހަރަށް މައްކާގެ ހަރަމްފުޅުގައި ބޮޑުޖަމާއަތުގައި ޢީދު ނާމާދު ކޮށްފިއެވެ.

މައްކާގެ ހަރަމްފުޅުގެ އިތުރުން ސައުދީ އަރަބިއްޔާގެ ހުރިހާ މިސްކިތެއްގައި ވެސް އީދު ނަމާދު ހޯމަ ދުވަހުގެ ހެނދުނު ކޮށްފައިވެއެވެ. ހަރަމްފުޅުގައި ކުރިއަށްގެންދިޔަ ޢީދު ނަމާދުގައި ސައުދީގެ ރަސްގެފާނު ސަލްމާން ބިން އަބްދުލް އަޒީޒާއި ކްރައުން ޕްރިންސް މުޙައްމަދު ބިން ސަލްމާން ވެސް ބައިވެރިވެވަޑައިގެންނެވިއެވެ.

މިދިޔަ އަހަރުގެ އޮކްޓޯބަރު މަހުގެ މެދުތެރޭގައި ސައުދީ އަރަބިއްޔާއިން ކޮވިޑްގެ ފިޔަވަޅުތައް ލުއިކޮށްފައިވާއިރު އެ ގައުމުގައި ކޭސްތައް ވަނީ މަދުވެފައެވެ. އެ ގައުމުގައި ވެކްސިންގެ ދެ ޑޯޒު ޖެހުން މަޖުބޫރުކޮށްފައިވާއިރު، މިސްކިތްތަކުގައި ޖަމާއަތުގައި ނަމާދުކުރުން އަނެއްކާވެސް ފަށާފައިވަނީ މިދިޔަ އަހަރުގެ އޮކްޓޯބަރުމަހުގެ މެދު ތެރެއިންނެވެ.

ކޮންމެ އަހަރެއްގެ ވެސް ފިތުރު ޢީދު ފާހަގަކުރަން އެކި ގައުމުތަކުން މުސްލިމުން މައްކާއަށް ދަތުރު ކުރެއެވެ. ރާއްޖެއިން ވެސް ރަމަޟާން މަހު އުމްރާގެ އަޅުކަން ކުރުމަށް ގިނަ އަދަދެއްގެ މީހުން މައްކާއަށް ދެއެވެ.

ޢީދު ނަމާދަށްފަހު ގެފުޅާއި މަސްޖިދުއް ނަބަވީ ބަލަހައްޓާ ފަރާތްތަކުން ވަނީ ކެއުމެއް ވެސް ބާއްވާފައެވެ.