މުސާރަ ބޮޑުވުމުން ރަށްރަށަށް ޕްރިންސިޕަލުންނާއި ޓީޗަރުން ހޯދުމަށް އިތުރު ބާރެއް ލިބޭނެ: ރައީސް
1 މެއި 2022 | އާދީއްތަ 09:45ޓީޗަރުންގެ މުސާރަ ބޮޑުކުރުމަކީ ރައީސް ސާލިހުގެ ރިޔާސީ ވައުދުފުޅެއް
އިޒްޒުއްދީން ސްކޫލް ހުޅުވުމުގެ ރަސްމިއްޔާތު --- ފޮޓޯ : ޔޫސުފް ސޮފްވަލާން
ޓީޗަރުންގެ މުސާރައަށް ގެނައި ބަދަލަކީ ރަށްރަށުގައި މަސައްކަތްކުރަންދާ ޓީޗަރުންނަށް އަދި ޕްރިންސިޕަލުންނަށްވެސް ލިބޭނެ އިތުރު ބާރަކަށް ވާނެ ކަމަށް ރައީސުލްޖުމްހޫރިއްޔާ އިބްރާހިމް މުހައްމަދު ސާލިހު ވިދާޅުވެއްޖެއެވެ.
ޓީޗަރުންގެ މުސާރައިގެ އޮނިގަނޑަށް ބަދަލުގެނެސް، އެމީހުންނަށް ލިބޭ މުސާރަ ބޮޑުކުރުމަކީ ރައީސުލްޖުމްހޫރިއްޔާ އިބްރާހިމް މުހައްމަދު ސާލިހުގެ ރިޔާސީ ވައުދުފުޅެކެވެ. ތައުލީމީ ދާއިރާގެ ހުރިހާ މުވައްޒަފުންގެ މުސާރަ ބޮޑުކުރުމަށް ނިންމަވާފައިވާކަމަށް ރައީސް އިއުލާނުކުރެއްވީ މިއަހަރަށް ރިޔާސީ ބަޔާން އިއްވަވަމުންނެވެ. ޓީޗަރުންގެ މުސާރައަށް 56 އިންސައްތައިގެ ކުރިއެރުމެއް އަންނާނެ ކަމަށް ރައީސް ވަނީ ވިދާޅުވެފައެވެ.
ރައީސުލްޖުމްހޫރިއްޔާގެ ވައުދުފުޅާ އެއްގޮތަށް ޓީޗަރުންގެ މުސާރަ ބޮޑުކުރެވިފައިވާކަން އިއުލާނުކުރައްވަމުން ރައީސް ވިދާޅުވީ ރާއްޖޭގެ ތައުލީމީ ދާއިރާއަށް މިވަގުތު ކުރިމަތިވެފައިވާ އެންމެ ބޮޑު ގޮންޖެހުމަކީ ރަށްރަށުގެ ސްކޫލްތަކަށް ފެންވަރު ރަނގަޅު ޕްރިންސިޕަލުން ލިބެން ނެތުން ކަމުގައެވެ. ޓީޗަރުންގެ މުސާރައިގެ އޮނިގަނޑަށް ގެނައި ބަދަލަކީ ރަށްރަށުގައި ވަޒީފާ އަދާކުރުމަށް ޕްރިންސިޕަލުންނާއި، ޓީޗަރުންނަށްވެސް ލިބޭނެ އިތުރު ބާރަކަށް ވާނެ ކަމަށް ރައީސް ވިދާޅުވިއެވެ.
ރައީސުލްޖުމްހޫރިއްޔާ ވިދާޅުވީ މިފަދަ ބަދަލުތަކަކީ ހަމައެކަނި ވަކި ދާއިރާއަކަށް ގެންނަ ބަދަލުތަކެއް ނޫން ކަމަށެވެ. ރައީސް ވިދާޅުވީ މި މަސައްކަތަކީ މުޅި ރާއްޖޭގެ ތަރައްގީއަށް، އަދި ލާމަރުކަޒީ ނިޒާމުން ރާއްޖެ ތަރައްގީކުރުމުގެ ސިޔާސަތުގެ ދަށުން ގައުމު ކުރިއެރުވުމުގައި ބައިވެރިވުމަށް ހިތްވަރު ދިނުމުގެ ގޮތުން ފަށާފައިވާ މަސަައްކަތެއް ކަމަށެވެ.
ޓީޗަރުންގެ މުސާރަ ބޮޑުވުމުން ގައުމު ބިނާކުރުމުގެ މުޅިން އައު ބާބެއް ފެށިގެންދާނެ ކަމަށް ރައީސް ވިދާޅުވިއެވެ. ކިޔަވައިދިނުމުގެ ދާއިރާއަށް ޝައުގުވެރިވާ މީހުންގެ އަދަދު އިތުރުވެގެންދާނެ ކަމަށާއި، މިއީ ގައުމު ބިނާކޮށް އާރާސްތު ކުރުމަށް އެޅުނު މުހިންމު ފިޔަވަޅެއް ކަމުގައި ރައީސުލްޖުމްހޫރިއްޔާ އިބްރާހިމް މުހައްމަދު ސާލިހު ވިދާޅުވިއެވެ.
