މަޖީދީ މަގުން ނުދާގޮތަށް މޭ ޑޭގެ ރެލީ ބާއްވަން ހުއްދަ ދީފި
މަޖީދީ މަގުން ދާން ހުއްދަ ނުދިނީ ޓްރެފިކް ބާރުބޮޑުވާތީ
މިއީ މަސައްކަތްތެރިންގެ ހައްޤުތަކާ ގުޅޭގޮތުން ކުރިއަށްގެންދިޔަ ހިނގާލުމެއް
މަޖީދީ މަގުން ނުދާ ގޮތަށް ނިންމައި، މޭ ޑޭގެ ރެލީ ބާއްވަން ފުލުހުން ހުއްދަ ދީފިއެވެ.
އެ ރެލީ ބާއްވަނީ މޯލްޑިވްސް ޓްރޭޑް ޔޫނިއަން ކޮންގްރެސް (އެމްޓީޔޫސީ) އިންނެވެ. އެ ރެލީ ކުރިއަށްގެންދަން ނިންމާފައިވަނީ މިއަދު ހަވީރު 4:00 އިން 6:00 އަށް ރަސްފަންނުން ފެށިގެން ކާނިވާ ސަރަހައްދާ ހަމައަށެވެ.
ފުލުހުން ވަނީ ރެލީއާ ގުޅިގެން އެމްޓީޔޫސީގެ ފަރާތްތަކާ ބައްދަލުކޮށްފައެވެ. ހަވީރު ވަގުތަކީ މި ދުވަސްވަރު މަޖީދީ މަގުގައި ޓްރެފިކް ބާރުބޮޑުވާ ވަގުތަކަށްވާތީ އެ މަގުން ނުދިއުމަށް އެ ބައްދަލުވުމުގައި ފުލުހުން ވަނީ އަންގާފައެވެ.
ފުލުހުން ހުއްދަ ދީފައިވަނީ ޤާނޫނު ހުއްދަ ކުރާ އެހެން ސަރަހައްދެއްގައި އެ ރެލީ ބާއްވާ ގޮތަށެވެ.
އެމްޓީޔޫސީން ބުނުފައިވާ ގޮތުގައި މިއަދުގެ ރެލީގައި އިންޑަސްޓްރިއަލް ރިލޭޝަނާ ގުޅޭ ޤާނޫނު ފާސްކުރަން ގޮވާލާނެ އެވެ. އަދި އޮކިއުޕޭޝަނަލް ހެލްތު އެންޑް ސޭފްޓީ ޤާނޫނެއް ތައާރަފުކޮށް މަސައްކަތްތެރިންނަށް ރައްކާތެރިކަން ކަށަވަރު ކުރުމަށް ވެސް ގޮވާލާނެ ކަމަށް އެ ޖަމިއްޔާއިން ވަނީ ބުނެފައެވެ.
