އެލްޓީ ބަލިކޮށް ކްލަބް 010ން ޓީއެފްޓީ ފުޓްސަލް މުބާރަތް ކާމިޔާބުކޮށްފި!

ރޯދަ މަހަށް ޚާއްސަކޮށްގެން ކޮންމެ އަހަރަކު ބާއްވަމުން އަންނަ ޓީއެފްޓީ ރަމަޟާން ފުޓްސަލް ޗެލެންޖު 2022 ގެ ޗެމްޕިއަންކަން ކްލަބް 010ން ކާމިޔާބު ކޮށްފިއެވެ.

ވިލިމާލޭގައި ކުރިއަށް ދިޔަ މި މުބާރާތް ކްލަބް 010ން ކާމިޔާބުކުރީ ފައިނަލް މެޗުގައި 3-2ން އެލްޓީ ސްޕޯޓްސް ކްލަބުގެ މައްޗަށް ކުރިހޯދައިގެންނެވެ. ފައިނަލް މެޗުގެ މޮޅު ކުޅުންތެރިއަކަށް ހޮވުނީ ކްލަބް 010 ގެ ޖާޒީ ނަންބަރު 10، އިބްރާހިމް ހަމްދާންއެވެ.

މުބާރާތުގެ އެންމެ މޮޅު ކުޅުންތެރިއަކަށް ހޮވުނީ ކްލަބް 010 ގެ އަލީ ޝިފާއުއެވެ. އެންމެ ގިނަ ލަނޑުޖަހާ މުބާރާތުގެ ރަން ބޫޓުވެސް ކާމިޔާބު ކުރީ ޝިފާއުއެވެ. މުބާރާތުގައި ޖުމްލަ 28 ލަނޑު އޭނާ ކާމިޔާބުކުރިއެވެ. މުބާރާތުގެ އެންމެ މޮޅު ފަސް ކުޅުންތެރިންނަށް ހޮވިފައިވަނީ ޝިފާއުގެ އިތުރުން އެޓީމުގެ އިބްރާހިމް ހަމްދާން އާއި، އެލްޓީ ސްޕޯޓްސް ކްލަބުގެ އިސްމާއިލް ވަޖީހް، މުހައްމަދު ޝިޔާޒު އަދި ލައިކަންސްގެ އިސްމާއިލް ވިފާގްއެވެ. އެންމެ އުންމީދީ ކުޅުންތެރިއަކަށް ހޮވުނީ އެލްޓީ ސްޕޯޓްސް ކްލަބުގެ އިބްރާހިމް ޝައުފް މުހައްމަދުއެވެ. ފެއަރޕްލޭ ޓީމަކީ އެންއެސް ރޯމާއެވެ.

މިއީ މި މުބާރާތް ބޭއްވި ނުވަ ވަނަ ފަހަރެވެ. މުބާރާތް އެންމެ ފުރަތަމަ ބާއްވަން ފަށާފައި ވަނީ ހަމައެކަނި ވިލިމާލޭގެ ޓީމުތަކަށެވެ. ނަމަވެސް މިފަހަރުގެ މުބާރާތް ކުރިއަށް ގެންގޮސްފައިވަނީ ރާއްޖޭގެ ހުރިހާ ހިސާބަކަށް ހުޅުވާލައިގެންނެވެ. މީގެ ކުރިން މި މުބާރާތުގެ ތަށި ދެޓީމަކުން މިލްކު ކުރިއެވެ. އެއީ ވައިކަންމައްޗާއި ޓީއެފްޓީއިންނެވެ. މިއަހަރުގެ މުބާރާތުގެ މެއިން ސްޕޮންސަރަކީ އޮބިއަންއެވެ.