ޖޮއިން ޓީމް އެމްޓީސީސީ ކެމްޕެއިން 2022 އިފްތިތާޙުކޮށްފި

"ޖޮއިން ޓީމް އެމްޓީސީސީ ކެމްޕެއިން 2022" ރަސްމީކޮށް އިފްތިތާޙްކޮށްފިއެވެ.

އެ ކުންފުނީގެ ހެޑް އޮފީހުގައި ބޭއްވި ނޫސްވެރިންގެ ބައްދަލުވުމުގައި އެމްޓީސީސީގެ ފަރާތުން މިއަހަރުގެ 3 މެއި އިން 22 މެއި އަށް ބޭއްވުމަށް ހަމަޖެހިފައިވާ ރެކްރޫޓްމަންޓް އޯޕަން ޑޭގެ މައުލޫމާތު ޙިއްސާކޮށްދެއްވީ އެކުންފުނީގެ ސީއީއޯ އާދަމް އާޒިމްއެވެ.

ރެކްރޫޓްމަންޓް އޯޕަން ޑޭގެ މަޤްސަދަކީ ކޮންސްޓްރަކްޝަން އެންޑް ޑްރެޖިންގ ޑިވިޜަންގެ ޑްރެޖަރުތަކާއި ކުންފުނީގެ އެއްގަމު ދަތުރުފަތުރުގެ ނިޒާމް ފުޅާކުރުމަށްޓަކައި މިއަހަރުގެ ޖޫން މަހު ގެނައުމަށް ހަމަޖެހިފައިވާ 34 ބަސް ދުއްވާނެ މުވައްޒަފުން ރެކްރޫޓް ކުރުން ކަމަށް އެކުންފުނިން ބުނެއެވެ.

މި ނޫސްވެރިންގެ ބައްދަލުވުމުގައި ވާހަކަފުޅު ދައްކަވަމުން އާޒިމް ވިދާޅުވީ ވަޒީފާތައް ދިނުމުގައި އަންހެނުންނަށް އިސްކަން ދޭނެ ކަމަށާއި އަންހެނުންނަކީ މިނިވަން ޤާބިލް ބަޔަކަށް ހެދުމަށް މަސައްކަތް ކުރުމަކީ އެމްޓީސީސީގެ އަމާޒެއް ކަމަށެވެ. އަދި އެ ކުންފުނީގައި މަސައްކަތް ކުރާ މުވައްޒަފުންގެ ތެރެއިން ދިވެހިންގެ އިންސައްތަ މިހާރު އިތުރު ކަމަށް ވެސް އާޒިމް ވިދާޅުވިއެވެ.

މި ޕްރޮގްރާމްގެ ދަށުން، ޑްރެޖަރު ބޭނުންކުރުމަށްޓަކައި، ޖުމްލަ 65 ފަރާތެއް ތަމްރީން ކުރެވިގެންދާނެ ކަމަށާއި، ޑްރެޖް މާސްޓަރ، ޑްރެޖް އޮޕަރޭޓަރު، ޑްރެޖް މެކޭނިކް، ޑްރެޖް ކްރޫ، ޓަގް އޮޕަރޭޓަރު، ޓަގް ކްރޫ، ވެލްޑަރު އަދި ޑްރެޖް ސުޕަވައިޒަރު ފަދަ ދާއިރާތަކަށް މީހުން ތަމްރީންކުރެވިގެންދާނެ ކަމަށް އެމްޓީސީސީއިން ބުނެއެވެ. އަދި ތަމްރީން ޕްރޮގްރާމް ކާމިޔާބު ކަމާއެކު ނިންމާ ފަރާތްތަކަށް 10,000 ރުފިޔާއާއި 33,000 ރުފިޔާއާއި ދެމެދުގެ މުސާރައަކާއެކު ކުންފުނީގެ ވަޒީފާ ހަމަޖެހިގެންދާނެ ކަމަށްވެސް އެމްޓީސީސީއިން ބުނެއެވެ.

މީގެއިތުރުން، ކުންފުނީގެ އެއްގަމު ދަތުރުފަތުރުގެ ނިޒާމް ފުޅާކުރުމަށްޓަކައި ގެނެވޭ 34 ބަސް ދުއްވުމަށް ހަމަޖެހިފައިވަނީ، ސ. ފޭދޫ، ސ. ހުޅުމީދޫ، ޏ. ފުވައްމުލަށް. ގަން އަދި ލ. އިސްދޫގައެވެ. މިވަގުތު ބަހުގެ ޚިދުމަތް ލިބެނީ ހަމައެކަނި ސ. ފޭދޫގައި ކަމަށްވިޔަސް، އައު ބަސްތައް ގެނައުމާއެކު މި ޚިދުމަތް ފުޅާކުރެވިގެންދާނެކަމަށް އެމްޓީސީސީއިން ބުނެއެވެ.

އަދި ބަސް ދުއްވަން ނެގޭ ފަރާތްތައް ހުނަވަރު ޕްރޮގްރާމްގެ ދަށުން 3 މަސްދުވަސްތެރޭ ތަމްރީން ކުރެވި ލައިސެންސް ލިބޭނެއެވެ. އަދި މި ތަމްރީން ކާމިޔާބު ކަމާއެކު ނިންމާ ލައިސެންސް ލިބޭ ފަރާތްތަކަށް 14,000 ރުފިޔާއާއި 18،000 ރުފިޔާގެ މުސާރައަކާއެކު ބަސް ޑްރައިވަރުގެ ވަޒީފާ ހަމަޖެހިގެންދާނެކަމަށާއި މި ޕްރޮގްރާމްގެ ދަށުން، ޖުމްލަ 22 ބަސް ޑްރައިވަރުން ރެކްރޫޓް ކުރެވޭނެ ކަމުގައި އެމްޓީސީސީއިން ބުނެއެވެ.

ރެކްރޫޓްމަންޓް އޯޕަންޑޭ ބޭއްވުމަށް ހަމަޖެހިފައިވަނީ ހދ. ކުޅުދުއްފުށި، ހދ.ނޮޅިވަރަންފަރު، ސ.ފޭދޫ، ސ.ހިތަދޫ، ސ.ހުޅުމީދޫ، ޏ.ފުވައްމުލަށް، ޅ.ހިންނަވަރު އަދި ޅ.ނައިފަރުގައެވެ. މިގޮތުން މެއި 1 ގައި ހދ.ކުޅުދުއްފުށި، މެއި 4 ގައި ހދ.ނޮޅިވަރަންފަރު، މެއި 9 ގައި ސ.ފޭދޫ، މެއި 9 ގައި ސ.ހިތަދޫ، މެއި 10 ގައި ސ.ހުޅުމީދޫ، މެއި 12 ގައި ޏ.ފުވައްމުލަށް، މެއި 14 ގައި ލ.ގަން، މެއި 15 ގައި ލ.އިސްދޫ، މެއި 18 ގައި ށ.ފުނަދޫ، މެއި 21 ގައި ޅ.ހިންނަވަރު އަދި މެއި 22 ގައި ޅ.ނައިފަރުގައި އޯޕަންޑޭ ބޭއްވުމަށް ވަނީ ހަމަޖެހިފައެވެ. މި ޕްރޮގްރާމާއި ބެހޭ އިތުރު މަޢުލޫމާތު ކުންފުނީގެ ހޮޓްލައިން ނަންބަރު 1650ށް ގުޅުމުން ލިބޭނެކަމަށްވެސް އެމްޓީސީސީއިން ބުނެއެވެ.