ކިއެލީނީ އިންޓަރނޭޝަނަލް ފުޓްބޯޅައިން ރިޓަޔަރ ކުރަނީ

އިޓަލީގެ ތަޖުރިބާކާރު ޑިފެންޑަރު ޖޯޖިއޯ ކިއެލީނީ އިންޓަރނޭޝަނަލް ފުޓްބޯޅައިން ރިޓަޔަރ ކުރުމަށް ނިންމައިފިއެވެ.

އުމުރުން 37 އަހަރުގެ ކިއެލީނީ ވަނީ މިއަހަރުގެ ޖޫން އެއްވަނަ ދުވަހު އިންޓަރނޭޝަނަލް ފުޓްބޯޅައިން ރިޓަޔަރ ކުރާނެކަން އިއުލާނު ކޮށްފައެވެ. އޭނާ ރިޓަޔަރ ކުރާނީ ކޮނެމްބަލް-ޔުއެފާ ކަޕް އޮފް ޗެމްޕިއަންސް މެޗުގައެވެ. މިއީ އެންމެ ފަހުގެ ޔޫރޯ އާއި ކޮޕަ އެމެރިކާ ކާމިޔާބުކުރި ދެޓީމު ބައްދަލުކުރާ މެޗެވެ. ކިއެލީނީ ބުނީ އާޖެންޓީނާ އާއި އިޓަލީ ބައްދަލުކުރާ މި މެޗަކީ އޭނާ ގައުމީ ޓީމަށް ކުޅޭނެ އެންމެ ފަހު މެޗުކަމަށެވެ.

ކެރިއަރުގައި އެންމެ ބޮޑެތި ކާމިޔާބީތައް ހޯދުނީ ގައުމީ ޓީމާއެކުކަން ފާހަގަކޮށް ކިއެލީނީ ބުނީ ވެމްބްލީ ސްޓޭޑިއަމްގައި ކުޅޭ މި މެޗަކީ އޭނާގެ ފަހު މެޗުކަމަށެވެ. ޔޫރޯ 2020 ގައި އިޓަލީގެ ކެޕްޓަންކަން ކުރި ކިއެލީނީ ވަނީ އިޓަލީގެ ގައުމީ ޓީމަށް 116 މެޗު ކުޅެދީފައެވެ. އަދި ބޮޑު ހަ މުބާރާތް އިޓަލީން ކާމިޔާބުކުރުމުގައި ވެސް ކިއެލީނީގެ ހިއްސާ ބޮޑެވެ. މީގެ ތެރެއިންވެސް ޔޫރޯ 2020 ކާމިޔާބު ކުރުމުގައި އޭނާ ވަނީ ތަފާތު މޮޅު ދައުރެއް އަދާކޮށްފައެވެ. ޓީމުގެ އެންމެ މުހިންމު ޑިފެންޑަރުގެ ގޮތުގައި ފާހަގަކުރެވިފައިވާ ކިއެލީނީ ވަނީ އިޓަލީއަށް އަށް ލަނޑު ޖަހައިދީފައެވެ.

ކިއެލީނީ މިހާރު ކުޅެމުން އަންނަނީ އިޓަލީގެ ގަދަބާރެއް ކަމުގައިވާ ޔުވެންޓަސްއަށެވެ. އިންޓަރނޭޝަނަލް ފުޓްބޯޅައިން ރިޓަޔަރ ކުރުމަށްފަހުވެސް ކްލަބް ލެވެލްގައި ފުޓްބޯޅަ ކުޅުމަށް އޭނާ ހުރީ ތައްޔާރަށެވެ. ރިޕޯޓުތައް ބުނާ ގޮތުން މިއަންނަ ސީޒަންގައި އޭނާ ފެނުން އެންމެ ގާތީ އެމްއެސް ލީގުންނެވެ.