މާތް ﷲ އެމީހަކަށް ލިއުއްވާފައިވާ އެއްޗެއް އެމީހަކަށް ދެއްވާނެ

މާތް ﷲ އެމީހަކަށް ލިއުއްވާފައިވާ އެއްޗެއް އެމީހަކަށް ދެއްވާނެއެވެ. ކީރިތި ގުރުއާނާއި ރަސޫލާﷺގެ ހަދީސްތަކަށް ބަލައިލަމާތޯއެވެ. ކީރިތި ރަސޫލާ ﷺ ހަދީސްކުރައްވާފައިވަނީ، "ތިމަންކަލޭގެފާނުގެ އުންމަތަށް ގަސްތަކާނުލައި ކުރެވޭ ކުށް މައާފުވެފައިވާކަމަށާއި, ހަނދާންނެތިގެން ކުރެވޭ ކުށާއި މަޖުބޫރުކުރުވައިގެން ކުރާ ކަންތައްވެސް މައާފުވެފައިވާ"ކަމަށެވެ.

މާތް ﷲގެ އިލްމުފުޅު ވަރަށް ތަނަވަހެވެ. އެކަލާނގެއީ ވާނޭކަންތަކާއި ނުވާނޭކަންތައް މޮޅަށް ދެނެވޮޑިގެންވާ އިލާހެވެ. ތަގުދީރުގެ ތެރެއިން ބައެއް ކަންތައްތަކަކީ ބަދަލުވެގެންދާ ކަންތައްތަކެވެ. ސަހާބީންގެ ޒަމާނުގައި ހިނގައިދިޔަ ބައެއް ހާދިސާތަކަށް ބަލާއިރު, މާތް ﷲ ރިޒްގުދެއްވާނެކަމަށް މަސައްކަތެއް ނުކޮށް ހުރުމުގެ ބަދަލުގައި، މަސައްކަތްކޮށްގެން ރިޒްގު ހޯދުމަށްފަހު ދަތި ހާލަތުގައިވާމީހަކަށް، ނުވަތަ މީހުންނަށް އެހީތެރިވާތަން ފެނިގެން ގޮސްފައިވެއެވެ.

އެހެންކަމުން ރިޒްގާއި މަގާމުތަކުގެ މައްސަލައިގައި އެކަކު އަނެކަކަށް ހަސަދަވެރިނުވުމަށް އަންގަވާފައިވެއެވެ. މާތް ﷲށް ބަރޯސާވުމާއި, ވަކީލުކުރުމުގެ މުހިންމުކަމަށް, ސަހާބީންގެ ޒަމާނުން ގިނަ މިސާލުތައް ފެންނަން އެބަހުއްޓެވެ. އެއްވެސް މަޚުލޫގަކަށް ރިޒްގުދެއްވުމަށް މާތް ﷲ ހަނދުމަނެތިވެވޮޑިގެން ނުވެއެވެ.

ރިޒްގަކީ ހުރިހާ މަޚްލޫގުންނަށް ދެއްވާ އެއްޗެކެވެ. ނިކަމެތިންނާއި ފަގީރުންގެ ހާލަތު މާތްﷲ ދެނެވޮޑިގެންވެއެވެ. އަދި އެފަދަ މީހުންނަށް ގިޔާމަތްދުވަހުން އޭގެ ބަދަލު ދެއްވާނެކަމަށް ﷲ ތައާލާ ވަހީކުރައްވާފައިވެއެވެ. އެއްވެސް އިންސާނެއްގެ ރިޒްގު ހަމައަށް ނުލިބި, އެ އިންސާނާ މަރުނުވާނެކަމަށް ރަސޫލާ ﷺގެ ހަދީސް ބަސްފުޅެއްގައިވެއެވެ.

ފަގީރުންނަކީ 3 އިރު ކާން ނުލިބޭ މީހުންނެވެ. އަދި ކޮންމެ މީހަކުވެސް ފަގީރުކަމުން ސަލާމަތްވޭތޯ ދުއާވެސް ކުރަންޖެހެއެވެ. ރިޒްގު ތަނަވަސްވުމަށް ދުއާކުރާއިރު ރިޒްގު ތަނަވަސްވުމަށާއި ބަރަކާތްލެއްވުމަށާއި އަދި މާތް ﷲގެ މަގުގައި ހޭދަކުރުމުގެ ތައުފީގު ދެއްވުން އެދި ދުއާކުރަންޖެހެއެވެ. ރިޒުގު ހޯދުމުގައި ހާރާމެއް ހަލާލެއް ނުބަލާނެ ޒަމާނެއް އަންނާނެކަމަށް ރަސޫލާ ﷺ ހަދީސްކުރައްވާފައިވެއެވެ. ހަމަ އެހެންމެ, ރިބާ ކައިއުޅޭނެ ޒަމާނެއްވެސް އަންނާނެ ކަމަށްވެސް ހަދީސްގައިވެއެވެ.

މާތް ﷲގެ ރުއްސެވުމާއި ފުއްސެވުން ބޭނުންވާނަމަ އެކަލާނގެ އަންގަވާފައިވާ މަގުގައި ސާބިތުވެ ދެމިތިބުމުގެ ތައުފީގު ދެއްވުމަށް ވީހާވެސް ގިނައިން އެކަލާނގެ ހަޒުރަތުގައި ދަންނަވަންޖެހެއެވެ. ދުނިޔޭގެ މި ދިރިއުޅުމަކީ ތާއަބަދަށް އުފާވެރިކަން އެއިން ލިބިދޭ ދިރިއުޅުމެއް ނޫނެވެ. ކިތަންމެ އުފަލުގައި އުޅުނުނަމަވެސް, މި ދުނިޔޭގެ ވަގުތީ ހަޔާތުން އެ އުފާވެރިކަމަށް ނިމުން އަންނަ ވަގުތު އައިސް ޖެހޭނެއެވެ. ދުނިޔޭގެ ޒީނަތްތެރިކަމުގައި އަވަދިނެތި މާތްﷲ ހަނދުމަނެތިކޮށް އުޅެމުންދަނިކޮށް, މަރުއައިސް ތިމާއާ ބައްދަލުކުރާނެ ކަމަކީ ހަގީގަތެވެ.

އިންސާނުންގެ ދިރިއުޅުމުގައި ދަތި އުނދަގޫތައް ހުންނާނެއެވެ. އަދި އެކަންކަމުންވެސް ދޭހަކޮށްދެނީ އާޚިރަތަށް ތައްޔާރުވާންޖެހޭކަމެވެ. މިދުނިޔޭގައި ޔަގީންވާ ހަމައެކަނި ކަމަކީ މަރެވެ. އަދި އެންމެ ކާމިޔާބު މީހާއަކީ ދެދުނިޔޭގެ ބާއްޖަވެރިކަން ހޯދަން ގަދައަޅައި މަސައްކަތްކުރާ މީހާއެވެ.

މިދުނިޔެއިން ކިތަންމެ މުދަލެއް، ލައްޒަތެއް ލިބުނުކަމުގައިވިޔަސް، އިންސާނާއަށް ހިތްހަމަޖެހުން ނުލިބޭނެކަމުގެ އެތައް މިސާލެއް ހުރީ ފެންނާށެވެ. މި ދުނިޔެއަކީ އުމުރަށް އުފަލާއި މަޖަލުގައި އުޅެވޭނެތަނެއް ނޫނެވެ. އިންސާނުންނަކީ ވަކި މުއްދަތެއް ހަޔާތުގައި ލިޔެވި, ދުނިޔެއަށް ފޮނުވިފައިވާ ބައެކެވެ. އަދި އެ ވަގުތު ހަމަވުމުން ހުރިހާ އިންސާނުންވެސް މާތް ﷲ ސުބްހާނަޙޫ ވަތައަލާގެ ހަޒުރަތަށް ދާންޖެހޭކަން ހަނދާންކުރަންޖެހެއެވެ.