ހިޔާ ފްލެޓްތަކުގެ ކުލި ބަލައިގަތުމުގެ އިންތިޒާމް އެތަނުގެ 11ވަނަ ޓަވަރުގައި ހަމަޖައްސައިފި

ހިޔާ ފްލެޓްތަކުގެ ކުލި ބަލައިގަތުމުގެ އިންތިޒާމް އެތަނުގެ 11ވަނަ ޓަވަރުގައި ހަމަޖައްސައިފިއެވެ.

އެޗްޑީސީން ބުނީ 11ވަނަ ޓަވަރުގައި ގާއިމުކޮށްފަައިވާ މެނޭޖްމަންޓް އޮފީހުން ފްލެޓްގެ ކުލި ބަލައިގަތުގެ އިންތިޒާމު ހަމަޖައްސާފައިވާ ކަމަށެވެ.

ހިޔާ ފްލެޓްތަކުން ކުލި ނަގަން ފަށާފައި ވަނީ ސަރުކާރުން 3 ފަހަރެއްގެ މަތިން، ކުލި ނެގުން ފަސްކޮށްދިނުމަށް ފަހު މިމަހުގެ ފުރަތަމަ ދުވަހުން ފެށިގެންނެވެ. މި މަހުގެ ނިޔަލަށް ޖޫރިމަނާއަކާ ނުލާ ކުލި ބަލައިގަންނާނެ ކަަމަށް އެޗްޑީސީން ވަނީ ބުނެފައެވެ.

އެޗްޑީސީން ބުނީ ޗެކް އަދި ކާޑް މެދުވެރިކޮށްވެސް ފައިސާ ބަލައިގަންނާނެ ކަމަށެވެ. ފައިސާ ބަލައިގަންނާނީ ބުރާސްފަތި ދުވަހުންފެށިގެން ސަރުކާރު ބަންދު ނޫން ކޮންމެ ދުވަހެއްގެ ހެނދުނު 9:30ން ފެށިގެން މެންދުރު 01:30އަށެވެ.

ހިޔާ ހައުސިން ޔުނިޓްތަކުގެ ކުލީގެ ގޮތުގައި ސަރުކާރުން ކަނޑައަޅާފައިވަނީ 7500 ރުފިޔާއެވެ. އަދި މެއިންޓަނަންސް ފީގެ ގޮތުގައި އިތުރު 1000 ރުފިޔާއާއެކު، ފްލެޓްތަކުގެ ވެރިން މަހަކު 8500 ރުފިޔާ އެޗް.ޑީ.ސީއަށް ދައްކަން ޖެހޭނެއެވެ. ހިޔާ ހައުސިން ޔުނިޓްތަކަށް މިހާރުވެސް ބޮޑު އާބާދީއެއް ވަނީ ދިރިއުޅުން ބަދަލުކޮށްފައެވެ. އެތަނުގައި މިހާރު ގާތްގަނޑަކަށް 20،000 މީހުންގެ އާބާދީއެއް ދިރިއުޅެމުން އަންނަކަމަށް އެޗްޑީސީން ބުނެއެވެ.

ހިޔާ ސަރަހައްދުގައި އަސާސީ ޚިދުމަތްތަކާއި، ވިޔަފާރީގެ ފުރުސަތުތައް ފަހި ކުރުމަށް އެޗްޑީސީއާއި، ކަމާ ގުޅުންހުރި ފަރާތްތައް މެދުވެރިވެގެން އަންނަނީ މަސައްކަތް ކުރަމުންނެވެ. ހިޔާ ސަރަހައްދުގައި 16 ތަވަރު ހިމެނޭ އިރު މިހާތަނަށް އެކިޓަވަރުތަކުގައި ދިހަ ފިހާރަ ހުޅުވާފައިވެއެވެ،