ހުވަފެނަކީ މަސައްކަތުގެ އާބާދީގެ ބޮޑު ބަޔަކީ ތައުލީމާއި ތަމްރީނު ލިބިގެން މަސައްކަތް ކުރަން ދަންނަ ބަޔަކަށް ވެގެންދިއުން - މިނިސްޓަރ
މި ސަރުކާރު ވެރިކަމަށް އައިސް މިނިސްޓްރީ އުފެދުމާއި ގުޅިގެން އެންމެ ފުރަތަމައަށް ކުރެވުނު އެއް މަސައްކަތަކީ މަތީ ތައުލީމާއި ތަމްރީނުގެ ގާނޫނެއް ވުޖޫދަށް ގެނައުން
ހަޔަރ އެޑިއުކޭޝަން މިނިސްޓަރ ޑރ. އިބްރާހިމް ހަސަން
ހުވަފެނަކީ މަސައްކަތުގެ އާބާދީގެ ބޮޑު ބަޔަކީ ތައުލީމާއި ތަމްރީނު ލިބިގެން ހުނަރުވެރިކަމާއެކު މަސައްކަތް ކުރަން ދަންނަ ބަޔަކަށް ވެގެންދިއުން ކަމަށް ހަޔަރ އެޑިއުކޭޝަން މިނިސްޓަރ ޑރ. އިބްރާހިމް ހަސަން ވިދާޅުވެއްޖެއެވެ.
މިނިސްޓަރ މިހެން ވިދާޅުވީ ނެޝަނަލް ކޮމްޕެޓެންސީ ސްޓޭންޑަރޑް ފޯ "ވޭސްޓު ޓު ވެލްތު" އިފްތިތާޙްކުރި ރަސްމިއްޔާތުގައި ވާހަކަ ދައްކަވަމުންނެވެ. މިނިސްޓަރ ވިދާޅުވީ ކުރާ މަސައްކަތަކީ އެ މަސައްކަތަކަށް ސަރުކާރުގެ ކަމާބެހޭ ވުޒާރާއަކުން ދޫކުރަންޖެހޭ ހުއްދަ ނުވަތަ ގައުމީ ސަނަދެއް ހިފައިގެން ނިކުންނަ ދަރިވަރަކަށް ވުން ކަމަށެވެ.
މިނިސްޓަރ ވިދާޅުވީ މި ސަރުކާރު ވެރިކަމަށް އައިސް މިނިސްޓްރީ އުފެދުމާއި ގުޅިގެން އެންމެ ފުރަތަމައަށް ކުރެވުނު އެއް މަސައްކަތަކީ މަތީ ތައުލީމާއި ތަމްރީނުގެ ގާނޫނެއް ވުޖޫދަށް ގެނައުން ކަމަށެވެ. 16 މެއި 2021 ގައި މި ގާނޫނު ވުޖޫދަށް އައުމާއެކު ހުނަރުގެ މަސައްކަތާއި ތައުލީމުގެ ނިޒާމު ބައްޓަންކޮށް ރެގިއުލޭޓުކޮށް އެ ނިޒާމުގެ ކޮލިޓީ ހިފެހެއްޓުމަށްޓަކައި ޚާއްސަ މަރުކަޒެއް މޯލްޑިވްސް ނެޝަނަލް ސްކިލްސް ޑިވެލޮޕްމެންޓް އޮތޯރިޓީގެ ނަމުގައި އުފެދުނު ކަމަށާއި އެއީ ރާއްޖޭގައި ހުނަރުވެރި މަސައްކަތްތެރި ފަންނުވެރިން ބިނާކުރުމަށްޓަކައި އެމަސައްކަތްތައް ބޭނުންކުރާ ދާއިރާތައް ކަނޑައަޅައި އެ މަސައްކަތްތެރިންގެ ކިބައިގައި ހުންނަންޖެހޭ ހުނަރު ދެނެގަނެ އެ ހުނަރުތައް އަށަގަނުވުމަށްޓަކައި ބޭނުންވާނެ ވަސީލަތްތައް ތައްޔާރުކުރުން ކަމަށް ވިދާޅުވި އެވެ. އަދި މިއަދު މި ލޯންޗުކުރާ "ވޭސްޓް ޓު ވެލްތު" އަކީ އޭގެތެރެއިން އެއް ދާއިރާ ކަމަށް މިނިސްޓަރ ވިދާޅުވި އެވެ.
"ވޭސްޓް ޓު ވެލްތު" ޓްރެއިނިންގ އަކީ ވޯލްޑް ބޭންކުގެ މާލީ އެހީގައި ހިންގާ މޯލްޑިވްސް އެންހޭންސިންގް އެންމްޕްލޯޔަބިލިޓީ އެންޑް ރިޒިލިއަންސް (މީރީ) ޕްރޮޖެކްޓުގެ ދަށުން މޯލްޑިވްސް ނޭޝަނަލް ސްކިލްސް ޑިވެލޮޕްމަންޓް އޮތޯރިޓީ (އެމް.އެން.އެސް.ޑީ.އޭ) އިން އެކުލަވާލި "ވޭސްޓު ޓު ވެލްތު" ޓްރޭނިންގް ޕެކޭޖް ގައި ހިމެނޭ ސްޓޭންޑަރޑެވެ. މި ޓްރޭނިންގް ޕެކޭޖްގައި ސްޓޭންޑަރޑްގެ އިތުރަށް މުޤައްރަރާއި، އެސެސްމަންޓް ރިސޯސް ފޮތާއި، ލަރނިންގ މެޓީރިއަލްސް އަދި ސްޓޫޑެންޓް ލޮގް ފޮތް ހިމެނޭނެއެވެ. "ވޭސްޓް ޓު ވެލްތު" ޓްރޭނިންގް ޕެކޭޖަކީ ޓެކްނިކަލް އެންޑް ވޮކޭޝަނަލް ޓްރެއިނިންގ ހިންގުމަށްޓަކައި އެމް.އެން.އެސް.ޑީ.އޭ. އިން އުފެއްދި 104 ވަނަ ޓްރޭނިންގް ޕެކޭޖެވެ. ކުރިއަށް އޮތް ދޮޅު އަހަރު ދުވަހުގެ ތެރޭގައި އިތުރު 70 ނެޝަނަލް ކޮމްޕީޓެންސީ ސްޓޭންޑާރޑް ޕެކޭޖް އަލަށް ތަރައްޤީ ކުރުމަށާއި، އަދި މިހާރު ބޭނުން ކުރަމުންދާ 53 ސްޓޭންޑަރޑް މުރާޖަޢާކުރުމަށް ވަނީ ނިންމާފަ އެވެ.
