ކަދުރު ލިބޭވަރުވާނީ ރޯދައިގެ ފަހުދިހައަށް: އިސްލާމިކް މިނިސްޓަރ
8 އެޕްރީލު 2022 | ހުކުރު 12:10ސައޫދީ އަރަބިއްޔާއިން ކަދުރު ޝިޕްކޮށްފައިވަނީ މި މަހުގެ 7 ވަނަ ދުވަހު
އިސްލާމިކް މިނިސްޓަރ، ޑރ. އަހުމަދު ޒާހިރު އަލީ
ސައޫދީ އަރަބިއްޔާއިން ކަދުރު ލިބޭވަރު ވާނީ ރޯދަ މަހުގެ ފަހު ދިހައިގައި ކަމަށް އިސްލާމިކް މިނިސްޓަރު ޑރ. އަހުމަދު ޒާހިރު އަލީ ވިދާޅުވެއްޖެއެވެ.
ރާއްޖެއެމްވީއަށް މައުލޫމާތު ދެއްވަމުން އިސްލާމިކް މިނިސްޓަރު ވިދާޅުވީ, ސައޫދީ އަރަބިއްޔާއިން ކަދުރު ޝިޕްކޮށްފައިވަނީ މި މަހުގެ 7 ވަނަ ދުވަހު ކަމަށެވެ. އަދި ރާއްޖެއަށް އެ ލިބޭވަރުވާނީ ރޯދަމަހުގެ ފަހު ދިހައިގައި ކަމަށް މައުލޫމާތު ލިބިފައިވާކަމަށެވެ.
އިސްލާމިކް މިނިސްޓަރު ވިދާޅުވީ ލިބޭނެ ކަމަށް އުންމީދު ކުރައްވަނީ 50 ޓަނުގެ ކަދުރު ކަމަށެވެ. އަދި މިހާތަނަށް ރާއްޖެއަށް ކަދުރު ލިބިފައިނުވާއިރު, ކަދުރު ލިބުމާއެކު ސައޫދީން ކަނޑައަޅާފައިވާ މިންގަޑަށް ބަލައިގެން, ކަދުރު ބަހާނީ ފަގީރުންނަށް އިސްކަންދެއްވައިގެން ކަމަށް ވިދާޅުވިއެވެ.
ހުރިހާ ގެތަކަށް ކަދުރު ނުބެހުނު ނަމަވެސް، ކަދުރު ބަހާނީ އެންމެ ބޭނުން ޖެހިފައިވާ ގޭބިސީތައް ކަނޑައެޅުމަށްފަހު، ހިސާބުކޮށް، އެގޭބީސީތަކަށް އިސްކަންދެއްވައިގެން ކަމުގައި މިނިސްޓަރު ވިދާޅުވިއެވެ.
މިދިޔަ އަހަރު ސައޫދީ އަރަބިއްޔާއިން ވަނީ ރާއްޖެއަށް 25 ޓަނުގެ ކަދުރު ހަދިޔާކޮށްފައެވެ.
އިސްލާމިކް މިނިސްޓަރު މިހެން ވިދާޅުވެފައިވާއިރު, މިނިސްޓްރީ އޮފް އިސްލާމިކް އެފެއަރޒުން އެކުލަވާލާފައިވާ ފަގީރުންނާއި މިސްކީނުންގެ ދަފުތަރުގައި ހިމެނޭ އާއިލާތަކުގެ ފުދުންތެރިކަން އިތުރުކުރުމަށްޓަކައި، އެދަފުތަރަށް އަމާޒުކޮށް، އިސްލާމިކް މިނިސްޓްރީއާއި މިނިސްޓްރީ އޮފް އިކޮނޮމިކް ޑިވެލޮޕްމަންޓް ގުޅިގެން 'ޒަކާތު ނަފާ'ގެ ނަމުގައި މާލީ އެހީތެރިކަން ފޯރުކޮށްދިނުމުގެ މަގުސަދުގައި ޕްރޮގްރާމެއް ފެށުމަށްވެސް ވަނީ ނިންމާފައެވެ.
ފަސް އަހަރަށް ރާވާފައިވާ މިޕްރޮގްރާމް ކުރިޔަށް ގެންދިއުމަށް ހަމަޖެހިފައިވަނީ ކަނޑައެޅޭ ވަކި އުސޫލެއްގެ ތެރެއިން, ކަނޑައެޅޭ ވަކި އަދަދެއްގެ ބަޔަކަށް ޒަކާތު ފަންޑުން ޚަރަދުކޮށް، ޒަކާތުގެ ފައިދާ އޭގެ އެންމެ ހައްގުވެރި ފަރާތްތަކަށް ފޯރުކޮށްދިނުމަށާއި، އެ ފަރާތްތަކަށް އާމްދަނީ ހޯދޭނެ މަގެއް ފަހިކޮށްދިނުމަށާއި އަދި ފުދުންތެރި މުޖުތަމައެއް ބިނާ ކުރުމަށް ކަމަށް މިނިސްޓްރީން ވަނީ ބުނެފައެވެ.
