ޕޮލިސް ކްލަބް ބަލިކޮށް އެމްއެސް މޭޓްސް ފެށުން ރަނގަޅުކޮށްފި

މައިލޯ އެފްއޭއެމް ވެޓަރަންސް ލީގު 2022 ގައި ޕޮލިސް ކްލަބާއި މޯލްޑިވްސް ސޮކަ މޭޓްސް (އެމްއެސް މޭޓްސް) ބައްދަލުކުރި މެޗު އެމްއެސް މޭޓްސް އިން ކާމިޔާބުކޮށްފިއެވެ.

މުބާރާތުގައި މި ދެޓީމު ވާދަކުރި ފުރަތަމަ މެޗު މޭޓްސް އިން ކާމިޔާބުކުރީ 3-1 ގެ ނަތީޖާއަކުންނެވެ. ފުރަތަމަ ލަނޑު ޖަހާ ލީޑު ނެގީވެސް މޭޓްސްއިންނެވެ. މެޗުގެ 20 ވަނަ މިނެޓުގައި މޭޓްސްއަށް ލީޑު ނަގައިދިނީ މުޚްތާރް ނަސީރު (ޓޫކިލޯ) އެވެ. އޭގެ ފަސް މިނެޓު ފަހުން މޭޓްސްގެ ލީޑު ފުޅާ ކޮށްދިނީ އަހްމަދު ނަސީމެވެ. ނަމަވެސް މެޗުގެ 40 ވަނަ މިނެޓުގައި ޕޮލިސް ކްލަބުން ލަނޑެއް ޖަހާ ފަރަގު ކުޑަކުރިއެވެ. މިއީ ނަސްރުﷲ ކާމިޔާބުކޮށްދިން ލަނޑެކެވެ. މެޗުގެ ފަހު ލަނޑު މޭޓްސްއަށް ކާމިޔާބުކޮށްދިނީ އިސްމާއިލް އަނިލްއެވެ.

މުބާރާތުގެ ފުރަތަމަ މެޗުގައި ހުޅުމާލެ ވެޓަރެންސް ކްލަބުން ކްލަބް ގްރީން ސްޓްރީޓްސްއާ ވާދަކޮށް މެޗު ކާމިޔާބުކުރީ 2-0 ގެ ނަތީޖާއަކުންނެވެ. ދެވަނަ މެޗުގައި ބައްދަލުކުރީ ދަ ގްރާންޑޭ އާއި ދިވެހި ސިފައިންގެ ކްލަބެވެ. މި މެޗު 1-0 ގެ ނަތީޖާއަކުން ކާމިޔާބުކުރީ ދަ ގްރާންޑޭއިންނެވެ.

މި މުބާރާތް އަލުން ބާއްވަން ފަށާފައި މިވަނީ ތިން އަހަރުގެ މެދުކެނޑުމަކަށްފަހުއެވެ. އެފްއޭއެމްއާއި ގުޅިގެން މި ފަހަރުގެ މުބާރާތް .އިންތިޒާމް ކުރަނީ ކްލަބް އިވެންޓްސް އިންނެވެ. 40 އަހަރުން މަތީގެ ކުޅުންތެރިންނަށް ޚާއްޞަކޮށްފައިވާ މުބާރާތުގައި ވާދަކުރަނީ 7 ޓީމެވެ. މުބާރާތުގައި ކޮންމެ ޓީމެއްގައިވެސް 35 އަހަރުން މަތީގެ ދެ ކުޅުންތެރިން ހިމަނަން ފުރުޞަތު ލިބެއެވެ.

މުބާރާތުގައި މާދަމާ ހަވީރު ކުޅޭ މެޗުގައި ހުޅުމާލެ ވެޓަރެންސް ކްލަބް ނިކުންނާނީ އީގަލްސްއާ ދެކޮޅަށެވެ. މެޗު ފަށާނީ 16:30 ގައެވެ. މުބާރާތުގެ މެޗުތައް އޮންނާނީ އެފްއޭއެމްގެ އެއް ނަންބަރު ޓާފު ދަނޑުގައެވެ.