ހަގީގަތުގައިވެސް 19ވަނަ މަޖިލިސް ތަފާތު

މިހާރު ހިނގަމުން އަންނަ ރައްޔިތުންގެ މަޖިލީހުގެ އިންތިޚާބުގައި އެމްޑީޕީން ކެމްޕެއިން ކުރިއިރު އެންމެ ގިނައިން އަޑު އިވުނު އެއްވާހަކައަކީ 19ވަނަ މަޖިލިސް ތަފާތުވާނެ ކަމުގެ ވާހަކައެވެ. އެކަން އަމަލާ ބަހުން ދައްކާނެ ކަމުގެ ވާހަކައެވެ. ސަރުކާރު ޖަވާބުދާރީ ކުރުވަން ޖެހިއްޖެ ހާލަތެއްގައި އެކަން ކުރާނެ ކަމަށް ބުންޏެވެ. ތެދެކެވެ. މިއަދު ރައްޔިތުންގެ މަޖިލީހުން ފެންނަނީ އެ މަންޒަރެވެ. އިދިކޮޅުން އޭރުވެސް މިހާރުވެސް އެ ވާހަކަތައް ދޮގުކުރި ނަމަވެސް އޭރު އެމްޑީޕީން ބުނަމުން ދިޔަ ވާހަކަތައް މިހާރު މަޖިލީހުގައި ތިބި އެމްޑީޕީ މެމްބަރުންގެ ފަރާތުންދަނީ ފެންނަމުންނެވެ.

ސަރުކާރުން ކައްޗަށް ފިޔަވަޅެއް އަޅާތޯ މަޖިލީހުން ފާރަވެރިވެއެވެ. ވަޒީރުން މަޖިލީހަށް ހާޒިރުކޮށް ރައްޔިތުންނަށް ބޭނުންވާ ކަންކަމާ ގުޅޭ ގޮތުން ސުވާލުކޮށް އެކަމާ ބަހުސް ކުރެއެވެ. މިއީ މީގެ ކުރީގެ ސަރުކާރުން ފެނުނު މަންޒަރެއް ނޫނެނެވެ. ޕީޕީއެމްގެ ވެރިކަމުގައި ވަޒީރުން ޖަވާބުދާރީ ކުރުމުގެ ބަދަލުގައި ފެނުނީ، އޭރުގެ އިދިކޮޅު މެމްބަރުން މަޖިލީހުން ބޭރުކޮށް ބޭނުން ގޮތަކަށް ކަން ކުރަމުން ދިޔަ މަންޒަރެވެ. ވަޒީރަކާ ސުވާލު ނުކޮށްލާ ތަނުގައި، އޭރު އިދިކޮޅުގެ ގޮތުގައި އޮތް އެމްޑީޕީގެ މެމްބަރުންނަށް ބަސް ބުނުގެ ފުރުސަތުވެސް އޮތީ ނިގުޅައިގެންފައެވެ.

މި ހަފްތާތެރޭގައި އިދިކޮޅުގެ ދެ މެމްބަރަކު މަޖިލީހަށް ހުށައެޅި ކުއްލި މައްސަލަވެސް ތަޅުމުގައި ބަހުސް ކުރުމަށް ބަލައިގަތީ އެމްޑީޕީގެ މެމްބަރުންގެވެސް ތާއީދާއެކުގައެވެ. މިކަމުން އެނގެނީ، އެމްޑީޕީގެ ހިއްސާ އޮތް ސަރުކާރެއްގެ ވާހަކަ ދައްކަން މަޖިލީހުގައި ތެދުވެ، ޖެހިލުމެއް ނެތި އެވާހަކަތައް ދެއްކުމުގެ ޖާގަ މިއަދު އޮތްކަމެވެ. ސަރުކާރު ތެރޭގައި ގޯސް ކަމެއް އޮތްކަން ގަބޫލުކުރެވޭ ހިނދު އެވާހަކަ ދައްކައި، ހައްލު ކުރުމަށް މަސައްކަތް ކުރާ ކަމެވެ. އެއީ ރައްޔިތުން އެ މެމްބަރުން މަޖިލީހަށް ފޮނުވި ސަބަބުވެސްމެއެވެ. ރައްޔިތުންގެ މެމްބަރުންގެ ގޮތުގައި، އެތައް ހާސް ވޯޓެއް ދިނުމަށްފަހު އެ ތަނަށް ފޮނުވީ، ރައްޔިތުންނަށް ދިމާވާ ދަތި އުނދަގޫތަކުގެ ވާހަކަ ދައްކާށެވެ. ރައްޔިތުންނާ ދޭތެރޭގައި ބޭއިންސާފުން ކަމެއް ކުރާނަމަ އެ ކަންތައްތަކުގެ ވާހަކަ ދައްކާށެވެ. އެހެން ކަމުން، ކަމެއް ރަނގަޅުކުރެވޭނީ ގޯސް ކަންތައްތައް އެކަމުގައި ހުރިކަން ގަބޫލުކޮށްގެން ކަމަށް އެ މެމްބަރުން އަމިއްލަފުޅަށް ގަބޫލް ކުރައްވައެވެ.  

އަންގާރަ ދުވަހުގެ ޖަލްސާގައި، ލ.އަތޮޅު ހޮސްޕިޓަލްގެ ހިދުމަތުގެ ފެންވަރު ދަށްވުމާ ގުޅިގެން އެކަމުގެ ކަންބޮޑުވުން ފާޅުކޮށް އިދިކޮޅުން ހުށަހެޅި މައްސަލަ މަޖިލީހުގެ ސުޕަރ މެޖޯރިޓީއާއެކު ތަޅުމުގައި ބަހުސް ކުރުމަށް ފާސް ކުރިއެވެ. އިދިކޮޅު ޕާޓީގެ މެންބަރަކުކަމުގައިވިޔަސް އަމިއްލަ ދާއިރާގެ ތަރައްގީއާ ބެހޭ މައްސަލައެއް، ކަންބޮޑުވެޔޭ ވިދާޅުވެ ހުށަހެޅުއްވުމުން އެމްޑީޕީގެ އަގުލަބިއްޔަތު ބޭނުންކޮށްގެން ބަހުސް ކުރިޔަ ނުދޭންވީ ސަބަބެއްނެތްކަމަށް އެ މެމްބަރުން ގަބޫލް ކުރައްވައެވެ. މިއީ ކުރިންއޮތް 18ވަނަ މަޖިލީހުގައި ފެނުނު މަންޒަރެއް ނޫނެވެ.

ޕީއެންސީންގެ ނައިބް ރައީސް އަދާމް ޝަރީފް, ހޯމަ ދުވަހު ހުށައެޅުއްވި މައްސަލަވެސް ވަނީ ބަލައިގަނެފައެވެ. މިއީ ރައްޔިތުން ސަރުކާރާމެދު އޮންނަ އިތުބާރު ބޮޑުވެގެންދާނެ ކަމެކެވެ. އިދިކޮޅުގެ މެމްބަރުންނަށް މަޖިލީހުގައި ފުރުސަތު ނެތްކަމަށް އެ މެމްބަރުން ވިދާޅުވާ ވިދާޅުވުން މިއީ ހަގީގަތެއް ނޫން ކަން މިކަމުން ހާމަވެއެވެ. ހަގީގަތުގައިވެސް 19ވަނަ މަޖިލިސް ތަފާތެވެ.