ރޯދަމަހަކީ، އަބަދުވެސް އާންމުން ކާބޯ ތަކެއްޗަށް ކުރަންޖެހޭ ހޭދަތައްވެސް އެހެނިހެން މަސްތަކާއި އަޅާބަލާއިރު އިތުރު މަހެކެވެ. އޭގެ އެންމެ ބޮޑު އެއް ސަބަބަކަށް ވެގެންދަނީ، ގިނަ ބަޔަކު ކެއިން ބުއިމުގެ އެންމެހައި ކަންކަން ރޯދަމަހުގައި ގޭތެރެއިން ހަމަޖައްސަމުން ދިޔުމާއެކު ދިރިއުޅުމަށް އަންނަ ބޮޑެތި ބަދަލުތަކެވެ.
ރޯދަމަހަށް ޚާއްސަކޮށް އެކި ބާވަތްތަކުން ބަދިގެ ކަބަޑުތައް ފުރާލައެވެ. ރޯދަ ވީއްލުމަށް ސުފުރާމަތި ފުރާލަނީ ނަން ހުސްކޮށެވެ. މިއީ ޒަމާނުއްސުރެ ދިވެހިންގެ އާދައެވެ. ކަށީގައި ހިފާފައި ހުރި ކަމެކެވެ. ރޯދަމަހަށް ޚަރަދު ކުޑަކުރަން ހިތުގައި އޮތް ނަމަވެސް އެކަން ވަނީ އެހެނެއް ނޫނެވެ. ތަކެތީގެ އަގު ކިތަންމެ މައްޗަށް އުފުލިގެން ދިޔަނަމަވެސް ފަރުވާލެއް ނުބަހައްޓައެވެ.
ކޮންމެ ރޯދަ މަހަކާއި ދިމާކޮށްވެސް، އާންމުކޮށް ބޭނުންކުރާ ތަކެތީގެ އަގު އުފުލެއެވެ. ޚާއްސަކޮށް ރޯދަމަހަށް ބޭނުންވާ، ކަރާ، ކުރުނބާ އަދި މިރުސް ފަދަ ތަކެތި މިއީ ފާހަގަކޮއްލެވޭ ބާވަތްތަކެވެ. މިތަކެތި މާލެ ގެންނަނީ އަތޮޅުތެރޭގެ ރަށްތަކުންނެވެ. ރޯދަ މަހު ބޭނުންވާ ވަރަށް އެތަކެތި ސަޕްލައި ނުކުރެވުމަކީ ތަކެތީގެ އަގު އުފުލުމަށް ދިމާވާ އެއް ސަބަބެވެ.
ރޯދަމަހު ތަކެތީގެ އަގު އުފުލިގެން ދިޔަ ނުދިނުމަށް ސަރުކާރުންވެސް ދުރާލާ ފިޔަވަޅުތައް އަޅައެވެ. އެގޮތުން، ފިޔާ، ބިސްފަދަ އާންމުކޮށް ބޭނުންވާ ތަކެތި އެތެރެކުރުން އިތުރުކުރެއެވެ. އެހެން ނަމަވެސް ރޯދަމަސް ވެގެންދަނީ މި ތަކެތީގެ އަގުވެސް އުފުލޭ މަހަކަށެވެ.
އެހެންކަމުން، ރޯދަ މަހު އިސްރާފުކުރުން މަދުކޮށް، ޚަރަދުތައް ކުޑަކޮށް، ފަހަށް ރައްކާކޮށް، ދުރާލާ ރޯދައަށް ތައްޔާރުވުމަކީ ކޮންމެހެންވެސް މުހިންމު ކަމެކެވެ.
