އިންޑިއާއިން ލަންކާއަށް 40،000 ޓަނުގެ ތެޔޮ ފޯރުކޮށްދެނީ

ސްރީލަންކާއަށް ދިމާވެފައިވާ އިގްތިސާދީ ކާރިސާއާއި ގުޅިގެން އިންޑިއާއިން އެގައުމަށް ބޭނުންވާ ތެޔޮ ފޯރުކޮށްދޭން އެއްބަސްވެއްޖެއެވެ.

އިންޑިއާއިން ލަންކާއަށް ތެޔޮ ފޯރުކޮށްދޭން ނިންމާފައިވަނީ 500 މިލިއަން ޑޮލަރުގެ ކްރެޑިޓް ލައިނުގެ ދަށުންނެވެ. މިގޮތުން އިންޑިއާ ސަރުކާރުން ހިންގާ އިންޑިއަން އޮއިލް ކޯޕަރޭޝަނުން 40،000 ޓަނުގެ ތެޔޮ ލަންކާއަށް ފޯރުކޮށްދޭނެ ކަމަށް ނޫސްތަކުގައި ރިޕޯޓުކޮށްފައިވެއެވެ.

މިއީ ނިމިދިޔަ ފެބްރުއަރީ މަހު ލަންކާއާއި އިންޑިއާ އާއި ދެމެދު ވެވުނު އެއްބަސްވުމުގެ ދަށުން ކޮންމެ މަހަކު ފޯރުކޮށްދެމުންދާ ތެޔޮ ޝިޕްމެންޓުތަކުގެ އިތުރުން ފޯރުކޮށްދޭ ޝިޕްމެންޓެކެވެ.

ދުނިޔޭގެ ބާޒާރުގައި ތެލުގެ އަގު އިންތިހާއަށް ބޮޑުވެފައިވާ މި ދަނޑިވަޅުގައިވެސް އިންޑިއާއިން ގެންދަނީ ލަންކާއިން އެހީއަށް އެދޭ ކޮންމެ ފަހަރަކު އެ އެހީ ފޯރުކޮށްދެމުންނެވެ. ފާއިތުވި ހަފްތާތަކުގައި ލަންކާއަށް ވަނީ ތެޔޮ ލިބުމުގައި ދަތިތަކެއް ކުރިމަތިވެފައެވެ.

އިންޑިއާއިން މިހާރު މަސައްކަތްކުރަމުންދަނީ ލަންކާއިން އެދިފައިވާ އަދަދަށް ތެޔޮ ފޯރުކޯށްދިނުމަށް މަސައްކަތްކުރަމުންނެވެ. އެހެންނަމަވެސް މިކަމުގައި އިންޑިއާއަށްވެސް ދަތިތަކެއް ކުރިމަތިވަމުންދާކަމަށް ނޫސްތަކުގައި ވަނީ ރިޕޯޓުކޮށްފައެވެ. އަދި މިހާރު ކުރިއަށްދާ ރަޝިޔާ ޔޫކްރެއިން ހަނގުރާމައާއި ގުޅިގެން އިންޑިއާއަށްވެސް ތެޔޮ ލިބުމުގައި ދަތިތަކެއް ކުރިމަތިވާކަމަށް ރިޕޯޓުކޮށްފައިވެއެވެ. އެހެންނަމަވެސް އެގައުމުގެ ސަރުކާރުން ގެންދަނީ މި މައްސަލަ ހައްލުކުރުމަށް މަސައްކަތްކުރަމުންނެވެ.

ލަންކާއަށް ދިމާވެގެން އުޅޭ އިގްތިސާދީ ކާރިސާ އާއި ގުޅިގެން ނިމިދިޔަ ފެބްރުއަރީ މަހު އިންޑިއާއިން ވަނީ ލަންކާއަށް 500 މިލިއަން ޑޮލަރުގެ ލޯނެއް ދިނުމަށް އެއްބަސްވެފައެވެ.