އިންޑިއާ އައުޓް ހަރަކާތް ހިންގަނީ ޒުވާން ޖީލު ހަލާކުކޮށްލައި، މާލީ އަދި ސިޔާސީ މަންފާއެއް ހޯދުމަށް - މެމްބަރުން
އިދިކޮޅު ފަރާތްތަކުން ހިންގާ "އިންޑިއާ އައުޓް" ހަރަކާތް ސަރުކާރުން ހުއްޓުވަން ނުޖެހޭ ސަބަބެއް ނުވިސްނޭ
ރައްޔިތުންގެ މަޖިލީހުގެ ޖަލްސާގެ ތެރެއިން
އިންޑިއާ އައުޓްގެ ނަމުގައި ކުރީގެ ރައީސް ޔާމިން ހިންގަވާ ހަރަކާތަކީ، ރާއްޖޭގެ ޒުވާން ޖީލް ހަލާކުކޮށް، އަމިއްލަ މާލީ އަދި ސިޔާސީ މަންފާއަށް ހިންގަވަމުން ގެންދަވާ ހަރަކާތެއް ކަމަށް ރައްޔިތުންގެ މަޖިލީހުގެ މެމްބަރުން ވިދާޅުވެއްޖެއެވެ.
މެމްބަރުން މިހެން ވިދާޅުވީ، ސަލާމަތީ ބާރުތަކުން ނުކުމެ އިންޑިއާ އައުޓް ހަރަކާތް ހުއްޓުވުމަށް ގޮވާލާ ކާށިދޫ ދާއިރާގެ މެމްބަރު އަބްދުﷲ ޖާބިރު ހުށައެޅުއްވި ކުއްލި މައްސަަލައަށް ވާހަކަފުޅުދައްކަވަމުންނެވެ.
ވިލުފުށި ދާއިރާގެ މެމްބަރު ހުސެއިން އަފީފު ވިދާޅުވީ، ރާއްޖޭގެ ގައުމީ ސަލާމަތަށް މިކަމުން ނުރައްކާތެރިކަން އެބައޮތް ކަމަށެވެ. މިހަރަކާތް ހުއްޓުވުމުން ދިވެހި ރައްޔިތުންނަށް ކުރާނީ ފައިދާ ކަމަށެވެ. އެގޮތުން އިންޑިއާގެ އިންޓެލިޖެންސާއި ގުޅިގެން ޑްރަގް ނެޓްވޯކުތައް ހުއްޓުވުމަށް ދިވެހިން ފުލުހުން ކުރާ މަސައްކަތަށް އިންޑިއާއިން އެހީތެރިކަން ފޯރުކޮށްދެމުން އަންނަ ކަމަށެވެ. އަދި މިއީ ޒުވާން ޖީލު ހަލާކުކޮށްލުމަށް ހިންގާ ހަރަކާތެއްކަމުގައި އަފީފުގެ ވާހަކަފުޅުގައި ސިފަކުރެއްވިއެވެ.
އިންޑިއާ އައުޓް ހަރަކާތަކީ ހުއްޓުވަން ޖެހޭ ހަރަކާތެއް ކަމަށް ހެންވޭރު ހުޅަނގު ދާއިރާގެ މެމްބަރު ހަސަން ލަތީފް ވިދަޅުވިއެވެ. އަދި މި ހަރަކާތަކީ އިޖުތިމާއީ އަދި އިގްތިސާދީ ގޮތުން ގެއްލުން ހުރި އަދި ރާއްޖޭގެ ސަލާމަތަށް ނުރައްކާތެރި ހަރަކާތެއް ކަމަށް ކަމާއި ބެހޭ މުއައްސަސާތަކުން ގަބޫލު ކުރާއިރު މިކަން ނުހުއްޓުވޭ ކަމަށާއި، މިކަން މިހާރު އަރަތަކަށް ވެފައިވާ ކަމަށްވެސް މެމްބަރު ހަސަން ލަތީފް ވިދާޅުވިއެވެ.
އިދިކޮޅު ފަރާތްތަކުން ހިންގާ "އިންޑިއާ އައުޓް" ހަރަކާތް ސަރުކާރުން ހުއްޓުވަން ނުޖެހޭ ސަބަބެއް ނުވިސްނޭ ކަމުގައި ގަލޮޅު އުތުރު ދާއިރާގެ މެމްބަރު އަދި ރައްޔިތުންގެ މަޖިލީހުގެ ނައިބު ރައީސް އީވާ އަބްދުﷲ ވިދާޅުވިއެވެ.
ރާއްޖެއަށް ދިމާވި ބޮޑެތި ހާދިސާތަކުގައާއި، އެންމެ ދަތި ދުވަސްތަކުގައިވެސް އެންމެ އަވަހަށް އެހީތެރިކަން ފޯރުކޮށްދޭ ގައުމަކީ އިންޑިއާކަމަށް އެހެން މެމްބަރުން ވިދާޅުވި ވާހަކަ އީވާވެސް ތަކުރާރު ކުރެއްވިއެވެ. އިދިކޮޅު ފަރާތްތަކުން ހިންގާ އިންޑިއާ އައުޓް ހަރަކާތަކީ ޕީޕީއެމްގެ މެމްބަރުންނަށްވެސް ވަރަށް ބޮޑަށް އޮޅުވާލައިގެން އަމިއްލަ މާލީ އަދި ސިޔާސީ މަންފާއަށް ހިންގަމުންދާ ހަރަކާތެއްކަމަށާއި، މިހަރަކާތަކީ ގައުމީ ސަލާމަތަށް އޮތް ބޮޑު ނުރައްކަލެއްކަމަށް ސަލާމަތީ ބާރުތަކުން ބުނެފައިވާއިރު މިކަން ހުއްޓުވަން ޖެހޭކަމުގައި އީވާ ވިދާޅުވިއެވެ.
ޖާބިރު ހުށައެޅުއްވި މައްސަލަައިގައި ބުނެފައިވަނީ، އަވަށްޓެރި ގައުމަކާމެދު ނަފްރަތު އުފެދޭ ގޮތަށް "އިންޑިއާ އައުޓް" ނަމުގައި ކުރީގެ ރައީސް ޔާމީން އިސްވެ ހުންނަވައި އަތޮޅުތަކުުން މީހުން މާލެ ގެނެސްގެން ހިންގާ މި ހަރަކާތުގެ ސަބަބުން އިންޑިއާ އާއި ރާއްޖެ އާއި ދެމެދު އޮތް ގުޅުން ގޯސްވެގެން ދިޔަ ނުދީ ހުއްޓުވަން ޖެހޭ ކަމަށެވެ. އަދި މިއީ ގައުމުގެ ސަލާމަތާއި ރައްކާތެރިކަމަށްޓަކައި ކުރަން ޖެހޭ ކަމެއް ކަމަށެވެ. ސަލާމަތީ ބާރުތަކުން މަޝްވަރާކުރުމަށްފަހު މާލޭގައި ހިންގާ މި ހަރަކާތް ހުއްޓުވުމަށް މިހާރުން މިހާރަށް މަސައްކަތް ކުރަން ޖެހޭ ކަމަށެވެ.
ގަލޮޅު ދެކުނު ދާއިރާގެ މެމްބަރު މީކާއިލް ނަސީމް ވިދާޅުވީ، އިންޑިއާ ފަސްޓް ޕޮލިސީއަކީ ހަމައެކަނި އެމްޑީޕީގެ ވެރިކަމުގައި ދަމަހައްޓާ ޕޮލިސީއެއް ނޫންކަމަށެވެ. މިއީ ޒަމާނުއްސުރެ ރާއްޖޭގެ ޚާރިޖީ ސިޔާސަތު ބައްޓަންވެފައި އޮތްގޮތް ކަމުގައެވެ. މިހާރު ފެށިގެން އުޅޭ އިންޑިއާ އައުޓް ކެމްޕެއިނަކީ، ވަކި ބަޔަކު އެމީހުންގެ ކަޅު ފައިސާ ދޮވުމާއި، ޑްރަގް ވިޔަފާރި ފުޅާ ދާއިރާއެއްގައި ކުރުން ހުއްޓުމަކަށް އައިސްދާނެތީ ކުރިއަށްގެންދާ ހަރަކާތެއް ކަމަށެވެ. މި ފިތުނަވެރި ކެމްޕެއިންގެ ސަބަބުން ގެއްލުންވަނީ އާދައިގެ ރައްޔިތު މީހާއަށް ކަމަށްވެސް މީކާއިލް ވިދާޅުވިއެވެ.
މާފަންނު އުތުރު ދާއިރާގެ މެމްބަރު އިމްތިޔާޒު ފަހުމީ (އިންތި) ވަނީ މިފަދަ ހަރަކާތް ކުރިއަށްގެންދާއިރު، އެތައް ސަތޭކަ ރައްޔިތުންނެއް އިންޑިއާގައި ދިރިއުޅެމުންދާކަމާމެދު ވިސްނާ ނުލާތީ އެކަމާއި ސުވާލު އުފައްދަވާފަައެވެ. މިއީ ކަންބޮޑުވާކަމެއް ކަމެއް ކަމަށާއި، މީގެ ނަތީޖާ ރަނގަޅު ނުވާނެ ކަމަށް އިންތި ވިދާޅުވިއެވެ.
މި މައްސަލައަށް ބުދަ ދުވަހުގެ ޖަލްސާގައި ވާހަކަ ދެއްކެވި ގިނަ މެމްބަރުން ވަނީ އެ ހަރަކާތާއި ދެކޮޅަށް ވާހަކަދައްކަވާފައެވެ.
