އަންނަ މަހުން ފެށިގެން ހިޔާ ފްލެޓްގެ ގާކުނި އުކާލަން ޖެހޭނީ އެފްލެޓެއްގެ ވެރިފަރާތުން

އަންނަ މަހުން ފެށިގެން ހިޔާ ފްލެޓްގެ ގޭބީސީތަކުން އުފެދޭ ގާކުނި އުކާލަން ޖެހޭނީ އެ ފްލެޓެއްގެ ވެރިފަރާތުން ކަމަށް އެޗްޑީސީން ބުނެފިއެވެ.

އެޗްޑީސީންވަނީ، އަންނަ މަހުން ފެށިގެން ހިޔާ މަޝްރޫއުގެ އެއްމެދު އިމާރާތްތަކުގެ ފުލެޓުތަކުން އުކާލާ ގާކުނި އަދި އެފަދަ ކުނިތައް ނެގުމުގެ އިންތިޒާމުތަކަށް ބަދަލުތަކެއް އަންނާތީ އެކަމަށް ސަމާލުވުމަށް އިލްތިމާސްކޮށްފައެވެ. އަދި މިހާތަނަށް ކުނި އަޅަމުންދިޔަ ސަރަހައްދުތަކަށް ކުނި އެޅުމަކީ އަންނަ މަހުގެ 1 އިން ފެށިގެން މަނާ ކަމެއް ކަމަށް އެޗްޑީސީން ވަނީ ބުނެފައެވެ. އަދި ފުލެޓުތަކުގައި މަސައްކަތް ކުރަމުން ގެންދާ ފަރާތްތަކުން މިމަހުގެ 31 ގެ ކުރިން އެޗްޑީސީން ކަނޑައަޅާފައިވާ ސަރަހައްދުތަކަށް ކުނި ޖަމާކުރުމަށްވަނީ އެދިފައެވެ.

ހިޔާ ފުލެޓުތަކުގެ އެތެރޭގެ މަސައްކަތްތައް ކުރުމުގެ އުސޫލުގައި ބަޔާން ކުރެވިފައިވާ ފަދައިން، ހިޔާ ފުލެޓުތަކުގައި މަސައްކަތް ކުރަމުންދާ ގޭބިސީން އުފެދޭ ގާކުނި އަދި އެފަދަ އެހެނިހެން ކުނި އުކުމަށް ޚާއްސަ ސަރަހައްދެއް ކަނޑައެޅި، އެކުނިތައް އުކާލުމުގެ އިންތިޒާމް މިހާތަނަށް ބަލަހައްޓަމުން ގޮސްފައިވަނީ އެޗްޑީސީ ފަރާތުންނެވެ. އެހެންނަމަވެސް، މިމަހުގެ 31 އިން ފެށިގެން މިމަސައްކަތް ހުއްޓާލުމަށް އެޗްޑީސީން ވަނީ ނިންމާފައެވެ. އަދި އަންނަ މަހުގެ 1 އިން ފެށިގެން މި ޒާތުގެ ކުނި އުކާލަން ޖެހޭނީ އެ ފުލެޓެއްގެ ވެރިފަރާތުން އެކަމަށް ޚާއްސަ ކުރެވިފައިވާ މުއައްސަސާތަކާއި ގުޅިގެން ކަމަށް އެޗްޑީސީން ބުނެއެވެ.

އަންނަ މަހުގެ 1 ވަނަ ދުވަހުން ފެށިގެން ހިޔާ ފްލެޓްތަކުން ކުލި ނެގުމަށް ސަރުކާރުން ވަނީ ނިންމާފައެވެ.