ކުރެހުން މެދުވެރިކޮށް ރަސޫލީ މަސައްކަތްކުރަނީ އަންހެނުން ބާރުވެރިކުރުވުމަށް

އަފްޣާނިސްތާނުން ގްރީސްއަށް ހިޖުރަކޮށްފައިވާ ރެފިއުޖީއެއް ކަމުގައިވާ އުމުރުން 18 އަހަރުގެ ރޯޔާ ރަސޫލީއަކީ ކުރެހުންތެރިއެކެވެ. އޭނާ ވަނީ ގްރީސްގެ މައިގްރޭންޓް ކޭމްޕެއްގައި އަންހެންކުދިންތަކަކަށް އާރޓް ކްލާހެއް ނަގައިދީފައެވެ. އެ ކްލާހުގައި ކިޔަވައިދެމުން އޭނާ ވަނީ, ދުނިޔޭގެ އެކި ކަންކޮޅުތަކުގައި ތިބި އަންހެންކުދިންނަށް ދޭން ބޭނުން ވަނީ ކޮން މެސެޖެއްތޯ ސުވާލުކޮށްފައެވެ. އެހެން ބުނުމުން އެ ކުލާހުގައި އިން ކުއްޖަކު ވަނީ, އަންހެންކުދިންނަކީ ހިތްވަރުގަދަ ބަޔަކަށް ވާންޖެހޭނެކަމަށް ބުނެފައެވެ.

އެކުއްޖާގެ ޖަވާބާއެކު އެ ކްލާސް ވެގެންދިޔައީ ރަސޫލީއަށްވެސް, އަންހެނުން ބާރުވެރިކުރުވުމާ ގުޅޭގޮތުން އެތައް ފިލާވަޅެއް ލިބިގެންދިޔަ ކުލާހަކަށެވެ. ރަސޫލީ ވަނީ ކުރެހުން މެދުވެރިކޮށް އެ ބޭނުންވާ މެސެޖު ދެވޭނެކަމަށް ބުނެފައެވެ. ރަސޫލީ ވަނީ 1985 ވަނަ އަހަރު ނޭޝަނަލް ޖިއޯގްރެފިކް މެގަޒިންގެ ކަވަރުގައި އިން އަފްޣާނިސްތާނުގެ އަންހެން ކުއްޖާ ކުރަހަން ފަށާފައެވެ. އެއީ ފެހި ކުލައިގެ ކަޅިރަވައެއް ލިބިފައިވާ ކުއްޖެކެވެ.

އެ ކުރެހުން ކުރަހަމުން ރަސޫލީ ކިޔައިދޭ ގޮތުގައި, އޭނާ ބޭނުންވަނީ އަފްޣާނިސްތާނުގައި އަންހެނުން ދިރިއުޅޭ ހާލަތު ބަޔާންކޮށްދޭށެވެ. އެމީހުންނަށް ވާހަކަ ދެއްކުމުގެ ހައްގު ލިބިގެންނުވާކަމަށާއި، އެމީހުން ދައްކާ ވާހަކައިގެ އަޑުއަހާ ބަޔަކުވެސް ނޫޅޭ ކަމަށް ރަސޫލީ ކިޔައިދިނެވެ. އަފްޣާނިސްތާނުގައި އަންހެނުން ދިރިއުޅެމުންދަނީ އެ ހާލަތުގައިކަން މުޅި ދުނިޔެއަށް ދައްކައިދޭން ބޭނުންވާކަމަށް ރަސޫލީ ބުނެއެވެ.

ރަސޫލީ ކުރަހަން ފަށާފައިވަނީ މީގެ ތިން އަހަރު ކުރިން ގްރީސްއަށް ހިޖުރަކުރުމަށް ފަހުގައެވެ. އަދި އޭނާ ކުރަހަން ދަސްކޮށްފައިވަނީ އަމިއްލައަށެވެ. އޭނާ ބުނިގޮތުގައި ކުރެހުމަކީ އޭނާއަށް ހިތްހަމަޖެހުން ގެނުވާކަމެކެވެ. ކުރަހަން ފެށުމުން އޭނާއަށް އެހެން ދުނިޔެއަކަށް ދެވޭކަމުގެ އިހުސާސް ކުރެވޭ ކަމަށް ރަސޫލީ ބުނެފައިވެއެވެ.

އޭނާ ބޭނުންވަނީ އަންހެނުންނަށް އަންހެނުން ބޭނުންވާ ކޮންމެ ކަމެއްވެސް ކުރެވިދާނެކަން ކުރެހުމުން ދައްކުވައިދޭށެވެ. އަދި އަންހެނުން ކުރަން ބޭނުންވާ ކަމެއް ކުރެވޭނެކަން ގަބޫލުކުރުވުމަށް ކަމަށް ރަސޫލީ ބުނެފައިވެއެވެ.

ރަސޫލީ ބުނި ގޮތުގައި އޭނާ ބޭނުންވަނީ ކޭމްޕުގައި ތިބި އެހެން އަންހެނުންނަށްވެސް އެމީހުން ބޭނުންވާ ކަންކަން ކުރެވޭނެކަން ދައްކުވައިދޭށެވެ.