ތިނަދޫއިން މީހުން ބޭލި މައްސަލަ: ލިބުނު އަނިޔާތައް، ބަޔާން ދިން މީހުންގެ ދުލުން
ތިނަދޫ ކެމްޕަހުގައި ހޮނިހިރު ދުވަހު މި މައްސަލައިގެ ފުރަތަމަ އަޑުއެހުން ކުރިއަށް ގެންގޮސްފައިވޭ
ގދ. ތިނަދޫ ކެމްޕަހުގައި ހޮނިހިރު ދުވަހު މި މައްސަލައިގެ ފުރަތަމަ އަޑުއެހުން ކުރިއަށް ގެންގޮސްފައިވޭ
ގދ. ތިނަދޫއިން މީހުން ބޭލި ހާދިސާއާ ގުޅިގެން ބާއްވާ ޕަބްލިކް ހިޔަރިންގ ހޮނިހިރު ދުވަހު ފަށައިފިއެވެ.
މި މައްސަލައަކީ 1962 ވަނަ އަހަރު ގދ. ތިނަދޫއިން މީހުން ބޭލި ހާދިސާގައި, ނިޒާމީ ސިފައެއްގައި ރާވައިގެން ދައުލަތުގެ އިދާރާއަކުން ނުވަތަ ދައުލަތުގެ އިދާރާއެއްގެ އިސް ހިންގުންތެރިއަކު ހިންގި ކަމަށް ބުނެ, އިންތިގާލީ އިންސާފުގެ އޮމްބަޑްސްޕަރސަންގެ އޮފީހަށް ހުށައެޅިފައިވާ މައްސަލައެކެވެ.
އެމް.އެން.ޔޫ ގދ. ތިނަދޫ ކެމްޕަހުގައި ހޮނިހިރު ދުވަހު މި މައްސަލައިގެ ފުރަތަމަ އަޑުއެހުން ކުރިއަށް ގެންގޮސްފައިވާއިރު، ސެޝަންތަކަކަށް ބަހާލައިގެން މި އަޑުއެހުމުގެ ބައިތައް ތިނަދޫއާއި މާލޭގައިވެސް ކުރިއަށްދާނެއެވެ.
ޗީފް އޮމްބަޑްސްޕާސަން އަބްދުއްސަލާމް އާރިފްވެސް ބެންޗުގައި ހިމެނިވަޑައިގެންނެވި މި އަޑުއެހުމަށް ބަޔާން ދެމުން ގދ. ތިނަދޫ, ތިނަދޫގޭ އާދަމް ހުސައިން ބުނީ އޭނާއަކީ މި ހާދިސާގެ ސީދާ އަނިޔާލިބުނު މީހެއްކަމަށެވެ. އޭނާ ބުނި ގޮތުގައި އޭރު އޭނާގެ އުމުރުން 3 އަހަރެވެ. އޭރު ސިފައިން އެ ރަށަށް އައިސް، ރަށުގެ ރައްޔިތުންގެ ގަޔަށް ބަޑިޖަހައި، ލާއިންސާނީ އެތައް ކަންކަންތަކެއް ކޮށްފައިވާކަން ފާހަގަކޮށް އޭނާ ބުނީ، ދިވެހި ޒުވާނުންނަށް މި އަނިޔާވެރި ތާރީޚާ ގުޅޭ މާ ގިނަ މައުލޫމާތުތަކެއް ނޭނގޭކަމަށެވެ.
އޭނާ ވަނީ މި މައްސަލަ ބަލަމުންދާތީ މިއަދުގެ ސަރުކާރަށްވެސް ޝުކުރު އަދާކޮށްފައެވެ. އަދި މި މަސައްކަތް އެއްވެސް ރައްޔިތަކު ސިޔާސީކުރުމަކީ ރަނގަޅު ގޮތެއް ނޫންކަން އޭނާ ފާހަގަ ކުރެއެވެ.
މި ހާދިސާގެ ތެރެއިން އޭނާއާ އެއްބަނޑު އެއްބަފާ 3 ބެއިން ނިޔާވެފައިވާއިރު، އޭނާގެ ދައްތަ ނިޔާވީ ކާނެ އެއްޗެއް ނުލިބި، އެކި ގޮތްގޮތުން ކާނެއެއްޗެއް ހޯދަމުންގޮސް މީދާ ވިހަވެގެންނެވެ.
މި ބައްދަލުވުމުގައި އެރަށު އާއިޝަތު ހުސައިންވެސް ބަޔާން ދީފައިވާއިރު، އޭނާ ވަނީ އެ ހާދިސާއާ ގުޅިގެން ތަހައްމަލު ކުރަންޖެހުނު ކަންކަން ހިއްސާ ކޮށްފައެވެ. އޭނާ ބުނާ ގޮތުގައި މި ހާދިސާގައި އޭނާގެ ބައްޕަވެސް ވަނީ ސިފައިންގެ ބަޑީގެ ހަމަލާތަކުގައި ނިޔާވެފައެވެ. އެ ކަންކަމުގެ ބަދަލު އޭނާ ސަރުކާރުގެ ކިބައިން ބޭނުންވާކަންވެސް ފާހަގަކުރިއެވެ. އެކަމަށް އެދި އޭނާ ވަނީ ސަރުކާރުގެ އިދާރާތަކަށް ސިޓީވެސް ފޮނުވާފައެވެ.
އޭނާގެ އިތުރުންވެސް އިތުރު މީހުން ބަޔާން ދީފައިވާއިރު، އެންމެންވެސް ވަނީ އެރަށުން މީހުން ބޭލީ ނުހަނު އަނިޔާވެރިކަމާއި ލާއިންސާނީ އަނިޔާތަކަށްފަހު ކަމަށް ބުނެފައެވެ.
އެ ފަރާތްތަކުން ބަޔާން ދެމުން ގެންދިޔައިރު އޮމްބަޑްސްޕަރސަން އޮފީހުގެ ބޭފުޅުން ވަނީ އިތުރަށް ސާފުކުރަން ބޭނުންވާ ކަންކަން އޮޅުންފިލުވާފައެވެ.
އިންތިގާލީ އިންސާފުގެ އޮމްބަޑްސްޕަރސަންގެ އޮފީހުން ބަލަމުންދާ މައްސަލަތަކަށް ބަލާއިރު، މައްސަލާގައި އަނިޔާ ލިބިފައިވާ މީހުން ކަމަށް ބަލަނީ, ސީދާގޮތުންނާއި ޖިސްމާނީ އަދި ނަފްސާނީ އަނިޔާ ލިބުނު މީހުންނާއި, ނުސީދާ ގޮތުން ނަފްސާނީ އަނިޔާ ލިބުނު މީހުންނާއި, އެއިރުގައި ރަށުގައި ދިރިއުޅުނު މީހުންގެ ތެރެއިން އެ ހާދިސާ ފެނި ތަޖުރިބާކުރެވުނު މީހުންނެވެ. މައްސަލަ ރައްދުވާ ފަރާތްތައްކަމަށް ބަލަނީ ހާދިސާގައި ދައުލަތުގެ ފަރާތުން ހަރަކާތްތެރިވި މީހުންނަށެވެ.
އޮމްބަޑްސްޕަރސަން އޮފީހުން މި މައްސަލަ ބަލަމުންދާއިރު، މިހާރު މަޝްވަރާ ކުރެވިފައި އޮތީ, ތަހުގީގު ނިމޭތާ 2 މަސް ދުވަހުގެ ތެރޭގައި އެ އޮފީހުގެ ހޯދުންތައް ހިއްސާކުރާގޮތަށެވެ.
