އަރަބިއްޔާ ސްކޫލުގެ އައު އިމާރާތް އެޅުމަށް ބައު ޖަމާލުއްދީން އިމާރާތް ހުސްކުރަން ފަށައިފިއެވެ.
އެ އިމާރަތް ބޭނުން ކުރަމުން އައީ އިލެންޝަންސް ކޮމިޝަންގެ އިންތިޚާބާ ބެހޭ މަރުކަޒުގެ ގޮތުގައެވެ.
ބައު ޖަމާލުއްދީން ހުސްކުރުމަށް އިލެކްޝަން ކޮމިޝަނަށް މުއްދަތު ދީފައިވަނީ ނިމުނު ހަފްތާގެ ބުރާސްފަތި ދުވަހުގެ ނިޔަލަށެވެ. އެހެންނަމަވެސް ހުސްކުރަންޖެހޭ ސާމާނު ގިނަ ކަމުންނާއި އިތުރުތަނެއް ނުލިބުމުގެ ސަބަބުން މުއްދަތު އިތުރުވެގެން ދިޔައީ ކަމުގައި އިލެކްޝަން ކޮމިޝަނުން ބުނެއެވެ. އިލެކްޝަން ކޮމިޝަންގެ ރައީސް ފުއާދު ތައުފީގް ރާއްޖެއެމްވީއަށް ވިދާޅުވީ، ބައު ޖަމާލުއްދީން އިމާރާތުގައި މިވަގުތު ހުރިއިލެކްޝަން ކޮމިޝަންގެ ސާމާނު ވަގުތީގޮތުން އަރަބިއްޔާގެ އިމާރާތަށް ބަދަލު ކުރެވޭނެ އިންތިޒާމު މިހާރު ހަމަޖެހިފައިވާ ކަމަށާއި، އެ މަސައްކަތް މިހަރު ކުރަމުން އަންނަ ކަމަށެވެ. އިލެކްޝަން ކޮމިޝަންގެ މުދާތައް ބަދަލު ކުރަނީ އަރަބިއްޔާ ސްކޫލްގެ އުތުރު ފަރާތުގައި ހުންނަ އިމާރާތަށެވެ. މުވައްޒިފުންނަށް މިވަގުތަށް މަސައްކަތްކުރާނެ ތަނެއް ނެތްކަމަށާއި، އިލެކްޝަންގެ މައި އޮފީހުން ޖާގަ ހެދުމުގެ މަސައްކަތް މިވަގުތު ކުރަމުން އަންނަ ކަމަށް ފުއާދު ވިދާޅުވިއެވެ. އަދި އިތުރު ތަނެއް ހޯދުމުގެ މަސައްކަތްވެސް އިލެކްޝަންސް ކޮމިޝަނުން އަންނަނީ ކުރަމުންނެވެ.
ފުއާދު ވިދާޅުވީ، ބައު ޖަމާޅުއްދީންގެ 12 ކްލާސްރޫމެއް އިންތިޚާބާ ބެހޭ މަރުކަޒުގެ ސާމާނު ބެހެއްޓުމަށާއި، މުވައްޒަފުން މަސައްކަތް ކުރުމަށް ބޭނުން ކުރަމުން އައި ކަމަށެވެެ. އެތަނުގައި 1000ށްވުރެ ގިނަ ވޯޓު ފޮށްޓާއި، ވޯޓު ބޫތުތަކުގެ އިތުރުން ގިނަ އަދަދެއްގެ ލެޕްޓޮޕާއި، އިންތިޚާބުތަކަށް ބޭނުންވާ ސާމާނު ހުންނާނެ ކަމަށް ފުއާދު ވިދާޅުވިއެވެ.
އަރަބިއްޔާ ސްކޫލްގެ އިމާރާތްތަކުގައި ރެނދުލައި، އިމާރާތް ހަލާކުވެ ދަރިވަރުން އެތަނުގައި ތިމުބަށް ނުރައްކާތެރިކަމަށް ބުނެ ބެލެނިވެރިން ކަންބޮޑުވުން ފާޅުކުރުމުން، އެތަނުގެ އެސެސްމެންޓްތަކަެއް ހަދައި، އެޑިއުކޭޝަން މިނިސްޓްރީންވަނީ އަރައްބިއްޔާ ސްކޫލް ހުސްކޮށްފައެވެ. އަރަބިއްޔާގެ ދަރިވަރުން މިހާރު ކިޔަވަމުން އަންނަނީ ހުޅުމާލެ ފެރީ ޓާރމިނަލް ކައިރީގަ ހުންނަ ކުރީގެ ފޮރިން މިނިސްޓްރީ ހިންގި އިމާރާތުގައެވެ.
އަރަބިއްޔާ ސްކޫލްގެ އިމާރާތުގެ މައްސަލައަށް ދާއިމީ ހައްލެއް ގެނެސްދެއްވާ، އެސްކޫލްއަށް އައު އިމާރާތެއް ދެއްވުމަށާ އެއިމާރާތް ބިނާ ކުރެވޭނީ ބާ ޖަމާލުއްދީން ހުންނަ ބިމުގައި ކަމަށް ރައީސުލްޖުމްހޫރިއްޔާ ނިންމަވާފައިވެއެވެ.
