ނޫ ރާއްޖެ ޕްރޮގްރާމުގެ ތެރެއިން ރާއްޖޭގެ ކަނޑުފަޅު ހިމާޔަތްކުރުމާއި ގުޅޭ ބިލެއް ޑްރާފްޓުކުރަނީ
މެރިން ސްޕެޝަލް ޕްލޭނެއް އެކުލަވާލުމުގެ މަަސައްކަތް ކުރިއަށްދޭ
ނޫ ރާއްޖެ
ނޫ ރާއްޖެ ޕްރޮގްރާމުގެ ދަށުން ރާއްޖޭގެ ކަނޑުފަޅު ހިމާޔަތްކުރުމުގެ ކަންކަމުގައި ދިވެހިރާއްޖެއަށް އެންމެ އެކަށޭނަ ގޮތަށް ބިލެއް ޑްރާފްޓުކުރުމުގެ މަސައްކަތް ކުރައްވަމުންދާކަމަށް ނޫ ރާއްޖެ ޕްރޮގްރާމްގެ ކޯޑިނޭޓަރ މޫސާ ޒަމީރު ހަސަން ވިދާޅުވެއްޖެއެވެ.
ނޫ ރާއްޖެ ޕްރޮގްރާމާއި ގުޅޭގޮތުން ރާއްޖެޓީވީގެ ފަލަސުރުޚީ ޕްރޮގްރާމުގައި ވާހަކަދައްކަވަމުން ޒަމީރު ވިދާޅުވީ މެރިން ސްޕެޝަލް ޕްލޭންގެ މަަސައްކަތާއި، ބޭނުންވާ ގާނޫނީ އޮނިގަނޑު އެކުލަވާލުމުގެ މަސައްކަތް މިހާރު ކުރިއަށްދާ ކަމަށެވެ. މިމަސައްކަތްތައް ދިރާސާކުރުމުގެ މަސައްކަތުގެ ފުރަތަމަ ފޭސްގެ މަސައްކަތް މިހާރު ނިމިފައިވާކަމަށް ޒަމީރު ވިދާޅުވިއެވެ.
ނޫ ރާއްޖެ ޕްރޮގްރާމުގެ ތެރެއިން ރާއްޖޭގެ އެކި ސަރަހައްދުތައް ހިމާޔަތްކުރުމުގައި ރާއްޖެއަށް އެންމެ އެކަށޭނަ ގޮތަށް ބިލެއް ޑްރާފްޓުކުރުމުގެ މަސައްކަތް ކުރައްވަމުންދާކަމަށް ޒަމީރު ވިދާޅުވިއެވެ. ޒަމީރު ވިދާޅުވީ މިކަމުގައި ކަމާގުޅޭ ފަރާތްތަކާއެކުގައި މަޝްވަރާތައް ކުރިއަށްދާކަމަށާއި، ގާނޫނީ ދާއިރާގެ ބޭފުޅުންނާއި، އެޓަރނީ ޖެނެރަލް އޮފީހާއި ގުޅިގެން މަސައްކަތްތަކެއް ކުރިއަށްދާކަމަށް ޒަމީރު ވިދާޅުވިއެވެ.
ނޫ ރާއްޖެއަކީ ދިވެހި ސަރުކާރާއި ބްލޫ ޕްރޮސްޕެރިޓީ ކޯލިޝަންގެ އިސްނެގުމުގެ ދަށުން ރާއްޖޭގެ ކަނޑުތައް ހިމާޔާތްކޮށް ކަނޑުގެ ރޯދިން ދެމެހެއްޓެނިވި އިގްތިސާދީ އަދި އިޖްތިމާއީ ފަހި ކުރިމަގެއް ބިނާކުރުމުގެ މަގްސަދުގައި ހިންގާ ފަސް އަހަރުގެ ޕްރޮގްރާމްއެކެވެ.
ރާއްޖޭގައި މި ޕްރޮގްރާމްގެ އިސް ރޯލެއް އަދާ ކުރަނީ ރައީސުލްޖުމްހޫރިއްޔާގެ އޮފީހާއި، މިނިސްޓްރީ އޮފް ފިޝަރީޒް މެރިން ރިސޯސަސް އެންޑް އެގްރިކަލްޗަރ އަދި މެރިން ރިސާޗް އިންސްޓިޓިއުޓުންނެވެ. ބްލޫ ޕްރޮސްޕެރިޓީ ކޯލިޝަންގެ މެންބަރުންގެ ތެރޭގައި ހިމެނެނީ ވެއިޓް އިންސްޓިޓިއުޓާއި، ނޭޝަނަލް ޖިއޮގްރޭފިކް ޕްރިސްޓިން ސީސްއާއި، ސްކްރިޕްސް އިންސްޓިޓިއުޝަން އޮފް އޯޝެނޯގްރަފީއެވެ.
