ދިވެހި ޕްރިމިއަރ ލީގު ތާވަލްގެ ހަތަރުވަނައަށް ޖެހިލަން ޔުނައިޓެޑް ވިކްޓްރީއަށް ލިބުނު ފުރުޞަތު ނަގާލައިފިއެވެ. ސުޕަރ ޔުނައިޓެޑް ސްޕޯރޓްސް (ސަސް) އަތުން މޮޅުވެގެން ހަތަރުވަނަ ލިބެން އޮތްނަމަވެސް, ޔޫވީ މެޗު ނިންމާލީ ޕޮއިންޓަކުންނެވެ.

ޔޫވީން ސަސްއާއި ދެކޮޅަށް ނިކުތުމުގެ ކުރިން ޓީސީން އޮތީ ދަ ގްރާންޑޭ ބަލިކޮށް, ހަތަރުވަނައަށް ޖެހިލާފައެވެ. އެކަމަކު އަލުން އެމަޤާމް ހޯދުމުގެ ފުރުޞަތު ޔޫވީއަށް އޮތެވެ. މޮޅުވެގެން ކުރިއަށް ޖެހިލަން ލިބުނު ފުރުޞަތު ގެއްލުނީ 2-2 ން އެއްވަރުވެގެންނެވެ. މެޗު ޔޫވީ އަތުން ގެއްލުނީ ފުރަތަމަ ދެގޯލް ޖަހާ ކުރި ހޯދާފައިވަނިކޮށެވެ. މެޗު ފަށައިގެން 8 ވަނަ މިނިޓްގައި އެނަޓޯލީ ވުލާސިޗޭވް ލަނޑުޖަހާ ޔޫވީއަށް ކުރިހޯދައިދިނެވެ. އަދި އޭގެ ހަތްމިނިޓް ފަހުން އޭނާ ދެވަނަ ގޯލެއް ޖަހާ ލީޑް ފުޅާވެސްކޮށްދިނެވެ. އެކަމަކު ސަސްއިން ވަނީ ހާފް ނިމުމުގެ ކުރިން ލަނޑެއް ޖަހާ ފަރަޤު ކުޑަކޮށްފައެވެ. ސަސްއަށް ފުރަތަމަ ގޯލް ކާމިޔާބުކޮށްދިނީ މުޙައްމަދު ޝަހާއުއެވެ. ނަތީޖާ ހަމަހަމަކޮށްދިނީ އިބްރާހީމް އަތީގު ހަސަންއެވެ.

މިނަތީޖާއާއި އެކު ޔޫވީ ފަސްވަނާގައި އޮތީ ހަ މެޗުން 8 ޕޮއިންޓާއެކުއެވެ. ހަތަރުވަނާގައި ޓީސީ އޮތީ 9 ޕޮއިންޓާއެކުއެވެ. ސަސް އޮތީ ހަތަރު ޕޮއިންޓާއެކު ފަހަތުން ދެވަނައިގައެވެ. ސަސްއާއި ގްރީންއަށްވެސް ޕޮއިންޓް ލިބިފައިވަނީ އެއް އަދަދަކަށެވެ. ތާވަލްގެ ފުލުގައި އޮތީ ދަ ގްރާންޑޭއެވެ.