މިދިޔަ އަހަރު ކޮރަޕްޝަންގެ 22 މައްސަލައެއް އެންޓި ކޮރަޕްޝަން ކޮމިޝަން (އޭސީސީން) ޕީޖީ އޮފީހަށް ފޮނުވާފައިވާކަމަށް އެ ކޮމިޝަނުން ބުނެފިއެވެ.

އެންޓި-ކޮރަޕްޝަން ކޮމިޝަން (އޭސީސީ) ގެ 2021 ވަނަ އަހަރުގެ އަހަރީ ރިޕޯޓް ހޯމަ ދުވަހު އާންމު ކޮށްފައިވާއިރު، މި ރިޕޯޓުގައި، ކޮމިޝަނުގެ ޤާނޫނީ ޒިންމާތައް އަދާކުރުމަށް 2021 ވަނަ އަހަރު ކޮށްފައިވާ މަސައްކަތްތަކާއި، 2021 ވަނަ އަހަރުގައި ކުރެވުނު ޚާއްޞަ މަސައްކަތްތަކުގެ އިތުރުން ކޮމިޝަނަށް ދިމާވި ގޮންޖެހުންތައް ހިމަނާފައިވެއެވެ.

އޭސީސީން މައުލޫމާތު ދޭ ގޮތުގައި 2021 ވަނަ އަހަރު ތެރޭގައި 588 މައްސަލައެއް ނިންމާފައިވާއިރު، ކޮރަޕްޝަނުގެ ޢަމަލެއް އެކުލެވިގެންވާ 22 މައްސަލައެއް ޝަރީޢަތަށް ހުށަހެޅުމަށް އެދި ޕްރޮސިކިއުޓަރ ޖެނެރަލްގެ އޮފީހަށް ފޮނުވާފައިވެއެވެ. މިއީ ވޭތުވެދިޔަ 5 އަހަރު ދުވަހަށް ބަލާއިރު އެންމެ ގިނަ އަދަދެއްގެ މައްސަލަ ޝަރީޢަތަށް ހުށަހެޅުމަށް އެދި ޕްރޮސިކިއުޓަރ ޖެނެރަލްގެ އޮފީހަށް ފޮނުވި އަހަރުކަންވެސް އޭސީސީން ފާހަގަކުރެއެވެ.

މީގެއިތުރުން، ވޭތުވެދިޔަ އަހަރު ތެރޭގައި ކޮމިޝަނުން ނިންމާފައިވާ މައްސަލަތަކުގައި ދައުލަތަށް އަނބުރާ ހޯދަންޖެހޭ 2,182,565.78 (ދެ މިލިއަން އެއް ލައްކަ އައްޑިހަ ދެހާސް ފަސްސަތޭކަ ފަސްދޮޅަސް ފަސް ރުފިޔާ ހަތްދިހަ އަށް ލާރި) ދައުލަތަށް އަނބުރާ ހޯދުމަށް ކަމާބެހޭ އިދާރާތަކަށް އަންގާފައިވާނެކަމަށްވެސް އޭސީސީން މައުލޫމާތު ދެއެވެ.

ހަމައެއާއެކު، މިދިޔަ އަހަރު ދިވެހިރާއްޖޭގައި ފުރަތަމަ ފަހަރަށް ޤައުމީ ފެންވަރެއްގައި ކޮރަޕްޝަނާއި ދެކޮޅަށް މަސައްކަތްކުރާނެ ޕޮލިސީއެއް އެކުލަވާލައި ޢަމަލުކުރަން ފެށިފައިވާކަންވެސް އަހަރީ ރިޕޯޓުގައި ފާހަގަކޮށްފައިވެއެވެ.

މިދިޔަ އަހަރު ކޮމިޝަނުން ކޮށްފައިވާ މަސައްކަތްތަކަށް ބަލާއިރު، ކޮމިޝަނަށް މަތިކޮށްފައިވާ މަސްއޫލިއްޔަތު އަދާކުރުމަށް ޤާނޫނީ ގޮތުން ހުރި ގޮންޖެހުންތަކާއި، ކޮވިޑް-19 ގެ ސަބަބުން އަދި ތަޙުޤީޤުކުރުމަށް ބޭނުންވާ އެކަށީގެންވާ ވަޞީލަތްތައް ނެތުމުގެ ސަބަބުން ތަޙުޤީޤުކުރުމުގެ ދާއިރާއިންވެސް ތަފާތު ގޮންޖެހުންތަކާ ކުރިމަތިލާން ޖެހުނުކަން ފާހަގަކޮށްފައިވެއެވެ.