ހިޔާ ފްލެޓްތަކުގައި ދިރިއުޅޭ މީހުންނަށް ބޭނުންވާ އެކި ކަންކަން ދެނެގަނެ، ބެލުމަށް ޚާއްސަ ސަރވޭއެއް ފަށައިފި
ސަރވޭ ކުރިއަށް ގެންދިއުމަށް ހަމަޖެހިފައިވަނީ މާޗް މަހުގެ 12 ވަނަ ދުވަހުން ފެށިގެން 30 ވަނަ ދުވަހަށް
ހިޔާ ފްލެޓް
ހިޔާ ފްލެޓްތަކުގެ ދިރިއުޅޭ މީހުންނަށް ބޭނުންވާ އެކި ކަންކަން ދެނެގަނެ, ބެލުމަށް ޚާއްސަ ސަރވޭއެއް ފަށައިފިއެވެ.
އެޗްޑީސީން ބުނީ މި ސަރވޭއަކީ, ހިޔާފްލެޓުގައި ގިނަ އަދަދަކަށް މީހުން ދިރިއުޅެންފަށާފައިވާއިރު، މިތަނުގައި ދިރިއުޅޭ މީހުންނަށް ބޭނުންވާ އެކި ކަންކަން ދެނެގަނެ އިތުރަށް ފުރިހަމަކުރުމަށްޓަކައި، އެ ކުންފުނީގެ ފަރާތުން ސާރވޭއެއް ކަމަށެވެ.
ސަރވޭއާ ގުޅޭގޮތުން އެޗްޑީސީން ބުނެފައިވަނީ މިސަރވޭގައި އެއްވެސް މީހެއްގެ އާމްދަނީ، ބޭންކު އެކައުންޓް ނުވަތަ ބޭންކް ކާޑުގެ ތަފްސީލެއް ނުހޯދާނެކަމަށެވެ.
އެޗްޑީސީން ބުނީ އެ ކުންފުނިން ދެމުން ގެންދާ "ޖީޕޮން ނެޓްވޯރކް" ޚިދުމަތާ ގުޅޭގޮތުން މި ސަރވޭގައި ޚިޔާލު ހޯދާނެ ކަމަށާއި، ފްލެޓްތަކުގެ ފިނިޝިންގ މަސައްކަތްތައް ކުރިއަށްގޮސްފައިވާ މިންވަރާއި، ޓަވަރުތަކުގެ އާންމު ތަންތަން ފޮޅާ ސާފުކުރުމާއި ސެކިއުރިޓީ ބެލެހެއްޓުމުގެ ޚިދުމަތާ ގުޅޭގޮތުން ޚިޔާލު ހޯދާނެކަމަށެވެ.
މީގެ އިތުރުން ހިޔާ ޓަވަރުތަކުގައި, އާންމު ތަންތަނާއި، ޚިދުމަތްތަކާއި އަދި އިމާރާތް މެނޭޖްކުރުމުގެ އެންމެހާ ކަންކަން ހިޔާ ފްލެޓްތަކުގެ ވެރިން އިންތިޚާބުކުރާ ވަކި ބޯޑެއްގެ ބެލުމުގެ ދަށުން ކުރިއަށް ގެންދިއުމަށްޓަކައި އެކުލަވާލަންޖެހޭ ކޯޕަރޭޓިވް ސޮސައިޓީ އުފެއްދުމާ ގުޅޭގޮތުން ޚިޔާލު ހޯދާނެކަމަށެވެ.
މީގެ އިތުރުން ސަރވޭގައި ވަކިވަކި ފްލެޓްތަކަށް ޒިޔާރަތްކުރުމުގައި އެއްވެސް ފަރާތަކާ ބައްދަލުނުވެއްޖެ ހާލަތެއްގައި ފްލެޓުގެ ވެރިފަރާތަށް އެޕޮއިންޓްމަންޓެއް ހޯދުމަށް އެސްއެމްއެސް ފޮނުވާނެކަމަށެވެ. އަދި މި ސަރވޭގައި ހަރަކާތްތެރިވާ އެޗްޑީސީގެ ހުރިހާ މުވައްޒަފުން ތިބޭނީ އެޗްޑީސީގެ މުވައްޒަފެއްކަން އެނގޭގޮތަށް ފާސް އަޅައިގެން ކަމަށެވެ. އަދި ސަރވޭގައި އެއްވެސް ފަރާތެއްގެ އާމްދަނީ، ބޭންކް އެކައުންޓް ނަންބަރު ނުވަތަ ކާޑުގެ ތަފްސީލެއް ނުހޯދާނެ ކަމަށެވެ.
ސަރވޭ ކުރިއަށް ގެންދިއުމަށް ހަމަޖެހިފައިވަނީ މާޗް މަހުގެ 12 ވަނަ ދުވަހުން ފެށިގެން 30 ވަނަ ދުވަހަށެވެ. އަދި ސަރވޭ ކުރާ މީހުން ހިޔާގެ ހުރިހާ ޓަވަރަކަށް ހެނދުނު 10:00އާ ރޭގަނޑު 8:00އާ ދެމެދުގެ ގަޑިތަކުގައި ޒިޔާރަތްކުރާނެކަމަށް އެޗްޑީސީން ބުނެއެވެ.
