މިދިޔަ ސީޒަނަށް ވުރެ ޔުނައިޓެޑް އަދި ސިޓީ ވަރުގަދަ: ހަޒާޑް

މިދިޔަ ސީޒަނަށްވުރެ މެންޗެސްޓާ އަށް ނިސްބަތްވާ ކްލަބްތައް ކަމަށްވާ ޔުނައިޓެޑް އަދި ސިޓީ ވަރުގަދަ ކަމަށް ޗެލްސީއަށް ކުޅެމުން އަންނަ ބެލްޖިއަމްގެ ކެޕްޓަން އެޑެން ހަޒާޑް ބުނެފިއެވެ.

ނޫސްވެރިންނަށް މައުލޫމާތު ދެމުން ހަޒާޑް ބުނީ ޕްރިމިއާ ލީގުގެ ތަށި ޗެލްސީއަށް ގެއްލުނު ކަމަށް އޭނާ ގަބޫލުނުކުރާ ކަމަށާއި، އެހެންނަމަވެސް ސިޓީ އަދި ޔުނައިޓެޑް މިދިޔަ ސީޒަނަށްވުރެ ވަރުގަދަ ކަމަށް އޭނާ ގަބޫލުކުރާ ކަމަށެވެ.

ހަޒާޑް ބުނީ ޕްރިމިއާ ލީގުގެ ތަށި ހޯދުމުގެ ފުރުސަތު އަދިވެސް ޗެލްސީއަށް ނުގެއްލޭ ކަމަށާއި، ޗެލްސީ އެނބުރި އަންނާނީ ވަރުގަދަކޮށް ކަމަށެވެ. އެގޮތުން އެންމެ ރަނގަޅު ވަގުތު ޗެލްސީ އޮންނާނީ ރަނގަޅު ހިސާބެއްގައި ކަމަށް ގަބުލުކުރެވޭ ކަމަށް ވެސް އޭނާ ވަނީ ބުނެފައެވެ.

ޗެމްޕިއަންސް ލީގުގައި ރޯމާ އަތުން 3-3 ގެ ނަތީޖާއިން ޗެލްސީ އެއްވަރުވި މެޗަށް އަލިއަޅުވާލަމުން ހަޒާޑް ބުނީ އެ މެޗުން ޗެލްސީ ބަލިވި ނަމަ، ތިން މެޗުން ޖައްސަ ޖައްސައިގެން ބަލިވާނެ ކަމަށެވެ. އެގޮތުން މެޗުން އެއްވަރުވުމުން ވެސް ހިތްހަމަޖެހޭ ކަމަށް އޭނާ ވަނީ ބުނެފައެވެ.

ހަޒާޑް ބުނީ ފާއިތުވެދިޔަ މެޗުތަކުގެ ނަތީޖާމަތިން ހަނދާން ނައްތާލުމަށް ފަހު މި ހަފްތާގައި ވަޓްފޯޑްއާ ދެކޮޅަށް ކުޅޭ މެޗަށް ހުރިހާ ކުޅުންތެރިން ވެސް ތިބީ ތައްޔާރަށް ކަމަށާއި، އެ މެޗު ކާމިޔާބުކުރަން އެންމެން އަޒުމު ކަނޑައަޅާފައިވާ ކަމަށެވެ.

ފްރާންސްގެ ލިއްލޭ އިން ކެރިޔަރު ފެށި ހަޒާޑް ވަނީ އެޓީމަށް ކުޅުނު 193 މެޗުގައި 50 ލަނޑު ކާމިޔާބުކޮށްފައެވެ. އޭނާ ޗެލްސީއަށް ބަދަލުވީ 2012 ވަނަ އަހަރެވެ. އެގޮތުން އޭނާ ވަނީ އެޓީމަށް މިހާތަނަށް ކުޅުނު 258 މެޗުގައި 74 ލަނޑު ކާމިޔާބުކޮށްފައެވެ.

ޗެލްސިއާ އެކު ޔޫރޮޕާ ލީގު ކާމިޔާބުކޮށްފައިވާ ހަޒާޑް ވަނީ އެޓީމާއެކު ޕްރިމިއާ ލީގު ދެފަހަރު އަދި ފުޓްބޯލް ލީގު ކަޕް ވެސް ކާމިޔާބުކޮށްފައެވެ. އޭނާ ވަނީ ބެލްޖިއަމް ގައުމީ ޓީމަށް ކުޅުނު 80 މެޗުގައި 20 ލަނޑު ކާމިޔާބުކޮށްފައެވެ.