އެމްޑީޕީގެ އެތެރޭގައި އޮތް ސިޔާސީ ކޯޅުމުގެ ވާހަކަ އެކި ފަހަރު އެކި ގޮތަށް ދެކެވެއެވެ. ރައްޔިތުންގެ ޝައުގުވެރިކަން މިކަމަށް ހުއްޓިފައި އޮންނަ މިންވަރުވެސް ބޮޑެވެ. ޕާޓީގެ އެތެރޭގައި އޮތް ޚިޔާލު ތަފާތުވުން އާންމު ރައްޔިތުންނަށް ނުދެއްކުމަށް ޕާޓީގެ ލީޑަރޝިޕުންވެސް މަސައްކަތްތަކެއް ކުރެއެވެ. އެހެންނަމަވެސް ރައްޔިތުންގެ މަޖިލީހުގެތެރެއިންނާއި، މެމްބަރުން އެކި ޕްލެޓްފޯމް ތަކުގައި ދައްކާ ވަހަކަތަކުގެ ސަބަބުން މާ ގިނަ ދުވަހަކު އެކަން ސިއްރުކޮށްފައި ބޭއްވެ ގޮތެއް ނުވިއެވެ.
ރައީސް ނަޝީދު ރާއްޖެއިން ބޭރުގައި ހުންނަވައި ރައީސް ސާލިހަށް އަމާޒުކުރެއްވި ބަހުގެ ހަމަލާތަކާއެކު ރައްޔިތުންގެ މަޖިލީހުގެ ބައެއް މެމްބަރުން ރައީސް ސާލިހުގެ އިސްތިއުފާއަށްވެސް ގޮވިއެވެ. ރައީސް ސާލިހާއެކީ ދެން އިތުރަށް ސިޔާސީ މަސައްކަތް ކުރައްވަން ބޭނުންފުޅު ނުވާކަމަށްވެސް އޭރު ރައީސް ނަޝީދު ވިދާޅުވިއެވެ.
ރައީސް ނަޝީދު އަމާޒު ކުރެއްވި ބަސްފުޅުތަކަށް ރައީސް ސާލިހު ދެއްވީ ވަރަށް ކުރު ސާދާ ޖަވާބެކެވެ. ރައީސް ވިދާޅުވީ، އެމްޑީޕީގެ ގައުމީ މަޖިލީހާއި އަދި ރައްޔިތުންގެ މަޖިލިހުގެ މެޖޯރިޓީވެސް އެމަނިކުފާނުގެ އަތްޕުޅުގައި އޮތްކަމުގެ ޔަގީންކަން އެބައޮތް ކަމަށެވެ.
އޭގެ ދުވަސްކޮޅެއް ފަހުން ރައީސް ނަޝީދު މާލެ ވަޑައިގެން ބަސްމަގު ބަދަލު ކުރެއްވިއެވެ. މިއާއެކު ގިނަބަޔަކަށް ހީވެގެން ދިޔައީ ޕާޓީގެ އެތެރޭގެ އޮތް ކޯޅުންގަނޑު ނިމުމަކަށް އައީ ކަމަށެވެ.
ކޮމަންޑޫ ދައިރާގެ ބައި އިލެކްޝަންގައިވެސް ދެ ލީޑަރުން ފެނުނީ ވަރަށް އެކުވެރިކޮށެވެ. މުޅި ޕާޓީ އެކައްޗެއް ކިޔައިގެން ތެދުވި ތަނެވެ. އެހެން ނަމަވެސް މެމްބަރުންނަށް ކުރިމަތިވި އެމްޑީޕީގެ އެތެރޭގެ އިންތިޚާބުން އަނެއްކާވެސް ޕާޓީގެ އެތެރެ ހަލަބޮލިވެގެން ހިނގައްޖެއެވެ.
ޗެއަރޕާސަން ކަމަށް ވާދަ ކުރައްވަނީ އިކޮނޮމިކް މިނިސްޓަރ ފައްޔާޒު އިސްމާއީލާއި ރައްޔިތުންގެ މަޖިލީހުގެ މާފަންނު އުތުރު ދާއިރާގެ މެމްބަރު އިމްތިޔާޒު ފަހުމީއެވެ. އިމްތިޔާޒު ފަހުމީއަކީ ރައްޔިތުންގެ މަޖިލިހުގައި ރައީސް ނަޝީދުގެ އެންމެ ގާތް އަދި އެންމެ އިތުބާރުކުރައްވާ އެއް މެމްބަރެވެ. ފައްޔާޒު އިސްމާއީލަކީ ރައީސް ސާލިހު އެންމެ އިތުބާރު ކުރައްވާ ވަޒީރެވެ.
މި އިންތިޚާބިގެ ވާދަވެރިކަމާއި، ދެ ކެންޑިޑޭޓުންގެ މެދުގައި އޮތް ވާދަވެރިކަން އޮތް މިންވަރު ފެނިގެން ދިޔައީ އަންގާރަ ދުވަހުގެރޭ އޮތް ގައުމީ މަޖިލީހުގެ ޖަލްސާއިންނެވެ.
މި ބައްދަލުވުމުގައި، ފައްޔާޒު އިސްމާއިލަށާއި އިންތިއަށް ތާޢީދުކުރާ ގައުމީ މަޖިލިސް މެމްބަރުންނާއި، މަޖިލިސް މެމްބަރުންވަނީ ބަހުގެ ހޫނު ހަމަލާތައް ދީފައެވެ. އެއްބަޔަކު އަނެއް ބަޔަކަށް ތުހުމަތުތައް ރައްދުކުރިއެވެ. ގައުމީ މަޖިލީހުގެ ޖަލްސާ ތެރެއިން އެއް މެމްބަރަކު އަނެއް މެމްބަރެއްގެ ގަޔަށް އަތްލާ ހިސާބަށް ކަންތައް ދިޔައެވެ.
ބައްދަލުވުމުގައި ޕާޓީގެ ދެ ލީޑަރުން ބައިވެރިވވަޑައެއް ނުގަންނަވައެވެ.
އެމްޑީޕީގެ ގައުމީ މަޖިލިސް ބޭއްވީ، ކުރިޔަށް އޮތް ޗެއަރޕާރސަން އިންތިޚާބު ބާއްވާނޭ ތާރީޚު ރަމަޟާން މަހާއި ދިމާވާތީ، އިކޮނޮމިކް މިނިސްޓަރު ފައްޔާޒު އިސްމާއިލްގެ ފަރާތުން މި އިންތިޚާބު ރަމަޟާން މަހުގެ ފަހުގެ ތަރީޚެއްގައި ބޭއްވުމަށް ހުށައެޅުމުން އެކަމަށް ގޮތެއް ނިންމުމަށެވެ. މިއިންތިޚާބުގައި ނުފޫޒާއި ބާރުގެ ބޭނުންކުރަމުންދާ ކަމުގެ ތުހުމަތު ފައްޔާޒަށް އަމާޒު ކުރިއެވެ. މިއާއެކު ހޫނު ޒުވާބެއް މެމްބަރުންގެ މެދުގައި ދިޔައެވެ. މި ބައްދަލުވުމުގެ އިންތިއަށް ތާއީދު ކުރައްވާ މެމްބަރުން މި ތާރީޚު ލަސްކުރުމާއި ދެކޮޅަށް ވަހަކަދެއްކެވި ނަމަވެސް ފާސްވީ ފައްޔަޒު ހުށައެޅުއްވި ގޮތަށެވެ.
މި ނިންމުމުން، ގައުމީ މަޖިލިހުގެ މެޖޯރިޓީ އޮތް ގޮތްވެސް ވަރަށް ރަގަޅަށް ސާފެވެ. ރައްޔިތުންގެ މަޖިލިހުގެ ގިނަ މެމްބަރުންނާއި، ގައުމީ މަޖިލުހުގެ ގިނަ މެމްބަރުންގެވެސް ތާއީދު ސަރުކާރަށާއި ރައީސް ސާލިހަށް އޮތް ކަން މިކަމުން ދޭހަވެއެވެ. މިއީ ކުރިއަށް އޮތް ރިޔާސީ ރޭހުގައި ރައީސް ސާލިހަށް ކާމިޔަބީ ލިބޭނެ ކަމުގެ ފާލެއް ކަމަށް ގިނަ ބަޔަކު ދެކެއެވެ. ދެން އޮތީ ޗެއާރޕާސަންގެ ގޮނޑީގައި އިށީދެވަޑައިގަންނަވަނީ ކޮން ބޭފުޅެއްތޯ ބެލުމެވެ.
ގައުމީ މަޖިލީހުން ފެނިގެން ދިޔަ މަންޒަރުން ދައްކައިދެނީ ކުރިއަށް އޮތް ދުވަސްތަކުގައި ސިޔާސީ މަސްރަހަށް ބޮޑެތި ބަދަލުތަކެއް އަންނާނެ ކަމެވެ.
