އަންގާރަ ދުވަހު އަފްއާނިސްތާނާ ދެކޮޅަށް ކުޅޭ މެޗަށް ގައުމީ ފިރިހެން ފުޓުބޯޅަ ޓީމު ދުބާއީއަށް ފުރައިފި އެވެ.

އާދީއްތަ ދުވަހުގެ ރޭ ޓީމު ދުބާއީ އަށް ފުރާފައިވާއިރު، ޓީމާއެކު 23 ކުޅުންތެރިން ވަނީ ދަތުރުކޮށްފައެވެ. ދުބާއީއަށް ފުރުމުގެ ކުރިން 23 ކުޅުންތެރިންގެ ސްކޮޑު އިއުލާންކުރިއިރު، ގައުމީ ޓީމު ފުރަތަމަ ފަރިތަކުރުންތައް ފެށީ 27 ކުޅުންތެރިންގެ ސްކޮޑަކާއެކުގައެވެ.

އެހެންމަވެސް 23 ކުޅުންތެރިންނަށް ސްކޮޑު މަދުކުރިއިރު، ޓީސީ ސްޕޯޓްސް ކުލަބުގެ މުހަންމަދު އައްޒާމާއި، އެޓީމުގެ އިބްރާހިމް ވަހީދު ހަސަންގެ އިތުރުން، ދެ ކީޕަރުން ކަމަށްވާ މާޒިޔާގެ ހުސައިން ޝަރީފް އަދި ނިއުރޭޑިއަންޓްގެ އަބްދުﷲ ޒިމާމް ވަނީ ސްކޮޑުން އުނިވެފައެވެ.

ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) އިން ބުނީ ޓީސީގެ މުހައްމަދު އައްޒާމް ސްކޮޑުން ބާކީކުރީ އޭނާއަށް ލިބިފައިވާ އަނިޔާގެ ސަބަބުންކަމަށެވެ.

އޭއެފްސީ އޭޝިއަން ކަޕް ކޮލިފައިންގެ ގްރޫޕް ސްޓޭޖުގައި ބޫޓާނާ ދެކޮޅަށް ރަށުން ބޭރުގައި ކުޅޭ މެޗަށް ތައްޔާރުވުމުގެ ގޮތުން ގައުމީ ޓީމު ކުޅޭ ރަހްމަތްތެރިކަމުގެ މެޗަށްފަހު ދެން އެޓީމު ފުރާނީ ތައިލޭންޑްގެ ބެންގްކޮކަށެވެ. އެގޮތުން ބެންގްކޮކުގައި ހަދާ ތަމްރީންތަކަށްފަހު ދެން ގައުމީ ޓީމު އެނބުރި ދާނީ ރާއްޖެނައިސް ބޫޓާނަށް ކަމަށް އެފްއޭއެމް އިން ބުނެއެވެ. ރާއްޖެ ބޫޓާނާ ދެކޮޅަށް ކޮލިފައިން މެޗު ކުޅުމަށް ހަމަޖެހިފައިވަނީ މި މަހު 12 ގައެވެ.

އެ މެޗަށް ރާއްޖެ ނިކުތީ ރަހްމަތްތެރިކަމުގެ މެޗެއް ނުކުޅެ މަދު ތަމްރީންތަކަކާއެކުގައެވެ. އެހެންނަމަވެސް ބޫޓާން މެޗަށް ދުރާލާ ގައުމީ ޓީމުން ތަމްރީންތައް ފަށާފައިވާއިރު، ރަހްމަތްތެރިކަމުގެ މެޗެއް ބޭރުގައި ކުޅުމުގެ އިތުރުން ބެންގްކޮކްގައި ތަމްރީން ކޭމްޕެއްވެސް ހިންގުމަށް ވަނީ ހަމަޖެހިފައެވެ.

މި އަހަރު ގައުމީ ޓީމަށް ގިނަ ރަހްމަތްތެރިކަމުގެ މެޗުތައް ހޯދައިދިނުމަށް މަސައްކަތްކުރަމުން އަންނަ ކަމަށާއި، ރަނގަޅު ޕްލޭނެއް ސީދާ ޓީމަށް އެކުލަވާލާފައިވާނެ ކަމަށް ގައުމީ ޓީމުގެ ކޮމެޓީގެ ޗެއާމަން އަލީ ނާޝިދު (އޮގަރު އައްޔަ) ވަނީ ދާދި ފަހުން ވިދާޅުވެފައެވެ.