ނީލަން މުދާ ވިއްކާ ސަރަހައްދުގެ މަގުމަތީގައި ހުރި މުދާ ނެގުމަށް އަންގައިފި

ނީލަން މުދާ ވިއްކަމުންދާ ސަރަހައްދުގައި މަގުމައްޗަށްވާ ގޮތަށް ހުރި މުދަލާއި ކުނިތައް ނަގާ ސާފުކުރުމަށް މާލެ ސިޓީ ކައުންސިލުން އަނެއްކާވެސް އަންގައިފިއެވެ.

މީގެކުރިން ވެސް ސިޓީ ކައުންސިލުން ވަނީ އެ ސަރަހައްދުގެ މަގުމަތީގައި މުދާ ބަހައްޓައިގެން ވިޔަފާރި ނުކުރުމަށް އަންގާފައެވެ. މާލެ ސިޓީ ކައުންސިލުން ކޮށްފައިވާ އިއުލާނެއްގައި ބުނެފައިވަނީ މާލޭ ދެކުނު ފަރާތުގައި ކުރީގެ އެއް ނަމްބަރު ކުނިކޮށި ހިމެނޭ ފަޅުމަތީ މަގުގެ ސަރަހައްދުގައި އެކި ފަރާތްތަކުން މުދާ ބަހައްޓައިގެން ވިޔަފާރި ކުރުމާއި، މަގުމައްޗަށް ގިނަ އަދަދަކަށް ކުނި އަޅަމުންގެންދާ ކަމަށެވެ. އެކަމުގެ ޝަކުވާ އާންމު ރަތްޔިތުންގެ ފަރާތުންނާއި، ދައުލަތުގެ ކަމާބެހޭ މުއައްސަސާތަކުން ކައުންސިލަށް ތަކުރާރުކޮށް ހުށަހަޅަމުންދާ ކަމަށްވެސް ބުނެފައިވެއެވެ.

އެގޮތުން މަގުމަތީގައި އެކި ފަރާތްތަކުން ބަހައްޓާފައިވާ ތަކެތި މިމަހުގެ 10 ވަނަ ދުވަހުގެ އިރުއޮއްސި 6:00 ގެ ކުރިން ނަގައި ފަޅުމަތީ މަގު ސާފުކުރުމަށް ކައުންސިލުން ވަނީ އަންގާފައެވެ. މިމުއްދަތުގެ ނިޔަލަށް ނުނަގާ ހުރި ތަކެތި ކައުންސިލުން ނަގާ ކުނީގެ ގޮތުގައި ނައްތާލާނެކަމަށާއި އަދި އެތަކެތި ނެގުމުގައާއި ނެގުމަށްފަހު ތަކެއްޗަށް ލިބޭ ގެއްލުމާއި އުނިއިތުރަށް ކައުންސިލުން ޒިންމާ ނުވާނެކަމަށްވެސް ސިޓީ ކައުންސިލްގެ އިއުލާންގައި ބުނެފައިވެއެވެ.

އެސަރަހައްދަކީ މީގެކުރިން ގިނަ އަދަދަކަށް އަލިފާނުގެ ހާދިސާތައް ހިނގާފައިވާ ސަރަަހައްދެކެވެ.