ފިއޮރެންޓީނާ ބަލިކޮށް ޔުވެންޓަސް ފައިނަލާއި ގާތަށް
ފިއޮރެންޓީނާގެ މައްޗަށް ޔުވެންޓަސްއިން ކުރިހޯދީ 1-0 ގެ ނަތީޖާއަކުން
އިޓާލިއަން ކަޕުގައި ޔުވެންޓަސް އާއި ފިއޮރެންޓީނާ ބައްދަލުކުރި މެޗުގެ ތެރެއިން
އިޓާލިއަން ކަޕުގެ ސެމީ ފައިނަލުގެ ފުރަތަމަ ލެގުގައި ފިއޮރެންޓީނާ ބަލިކޮށް ޔުވެންޓަސް ފައިނަލާއި ގާތަށް ޖެހިލައިފިއެވެ.
ރަށުން ބޭރުގައި ކުޅުނު ފުރަތަމަ ލެގުގެ މެޗު ޔުވެންޓަސްއިން ކާމިޔާބުކުރީ 1-0 ގެ ނަތީޖާއަކުންނެވެ.
މެޗު ފަށައިގެން ފިއޮރެންޓީނާއަށް ވަނީ ލީޑު ނަގަން ރަނުގެ ފުރުސަތެއް ލިބި ބޭކާރުވެފައެވެ. ޔުވެންޓަސްގެ ކީޕަރު މަޓިއާ ޕެރިންއަށް ހެދުނު ގޯހެއްގެ ފައިދާ ނަގާ ފިއޮރެންޓީނާގެ ޖިއަކޯމޯ ބުއަނަވެންޗޫރާ ފޮނުވާލި ހަމަލާ ދިޔައީ ގޯލާ އަމާޒުނުވެ ބޭރަށެވެ. އޭގެ ފަހުންވެސް ފިއޮރެންޓީނާގެ ޖޮނަތަން އިކޯނޭ ފޮނުވާލި ނުރައްކާތެރި ހަމަލާވެސް ގޯލާ އަމާޒުވާ ގޮތް ވަނީ ނުވެފައެވެ. އަދި ދެވަނަ ހާފުގައި އިކޯނޭ ފޮނުވާލި ހަމަލާ ބޭރުވީ ގޯލު ދަނޑީގައި ޖެހިފައެވެ.
މި މެޗުގެ ދެވަނަ ހާފުގައި ޔުވެންޓަސްގެ ޑޫސާން ވްލަހޯވިޗަށް ހުސްކޮށް ލިބުނު ފުރުސަތެއް ވަނީ ބޭކާރުވެފައެވެ.
މެޗުގެ ލީޑު ޔުވެންޓަސްއިން ނެގީ އިތުރު ވަގުތުގައެވެ. މިއީ ފިއޮރެންޓީނާގެ ލޮރެންޒޯ ވެނޫޓީ އަތުން ބައިކޮޅަށް ވަން ލަނޑެކެވެ.
އިޓާލިއަން ކަޕުގެ ފުރަތަމަ ސެމީގައި އޭސީ މިލާން އަދި އިންޓަރ މިލާން ބައްދަލުކުރި މެޗު ނިމުނީ ދެ ޓީމުން ކުރެ ޓީމަކަށް ލަނޑެއް ނުޖެހި އެއްވަރުވެގެންނެވެ.
