އިނގިރޭސި ޕްރިމިއާ ލީގުގައި ވަޓްފޯޑާ މެންޗެސްޓާ ޔުނައިޓެޑް ބައްދަލުކުރި މެޗު އެއްވަރުވެގެން ނިމުނުއިރު، މެންޗެސްޓާ ސިޓީން އެވަޓަން ބަލިކޮށްފިއެވެ.

އަމިއްލަ ދަނޑުގައި ވަޓްފޯޑާ ދެކޮޅަށް ހޮނިހިރު ދުވަހުގެރޭ ޔުނައިޓެޑުން ކުޅުނު މެޗު އެއްވަރުވީ 0-0 ގެ ނަތީޖާއަކުންނެވެ.

މެޗު ފަށައިގެން ޔުނައިޓެޑުން ވަޓްފޯޑްގެ ގޯލަށް ނުރައްކާކޮށް ގިނަ ހަމަލާތަކެއް އުފައްދާފައިވާއިރު، މި މެޗުގައި ޔުނައިޓެޑްގެ ބްރޫނޯ ފެނާންޑޭޒް އާއި ކްރިސްޓިއާނޯ ރޮނާލްޑޯ ޖެހި ލަނޑުތައް ވަނީ އޮފްސައިޑް ލަނޑުތަކެއް ކަމަށް ރެފްރީ ނިންމާފައެވެ. އެކަމާ މި ދެ ކުޅުންތެރިންވެސް ހިތްހަމަ ނުޖެހުން ފާޅުކޮށްފައިވެއެވެ.

މި މެޗުގައި ޔުނައިޓެޑުން ފޮނުވާލި ގިނަ ހަމަލާތައް ހުއްޓުވުމުގައި ވަޓްފޯޑްގެ ގޯލުކީޕަރު ބެން ފޮސްޓާ ވަނީ މޮޅު ކުޅުމެއް ދައްކާފައެވެ.

މީގެ އިތުރުން މެންޗެސްޓާ ސިޓީން ރަށުން ބޭރުގައި ކުޅުނު މެޗުގައި އެވަޓަންގެ މައްޗަށް ކުރިހޯދީ 1-0 ގެ ނަތީޖާއަކުންނެވެ.

މުޅި މެޗު ކަހަލަ ގޮތަކަށް ސިޓީން ކޮންޓްރޯލްކޮށްގެން ގިނަ ހަމަލާތަކެއް އުފެއްދި ނަމަވެސް އެވަޓަންގެ ކީޕަރު ވަނީ ސިޓީން ފޮނުވާލި ހަމަލާތައް ހުއްޓުވުމުގައި މުހިންމު ދައުރެއް އަދާކޮށްފައެވެ. އެކަމަކު މެޗުގެ 82 ވަނަ މިނެޓުގައި ސިޓީން ވަނީ ލަނޑު ޖަހާ ލީޑު ނަގާފައެވެ. އެވަޓަންގެ ޑިފެންޑަރު މައިކަލް ކީން ހެދި ގޯހެއްގެ ފައިދާ ނަގާ މި ލަނޑު ސިޓީއަށް ކާމިޔާބު ކޮށްދިނީ، ފިލް ފޯޑެންއެވެ. އެކަމަކު ސިޓީން ލަނޑު ޖެހިތާ ތިން މިނެޓު ފަހުން އެވަޓަންއިން ވަނީ ވަރަށް ބޮޑަށް ޕެނަލްޓީއަކަށް އެޕީލްކޮށްފައެވެ.

ސިޓީގެ މިޑްފީލްޑަރު ރޮޑްރީ އަތުން ކޮންޓްރޯލްކުރި ބޯޅައެއް ވީޑިއޯ އެސިސްޓަންޓް ރެފްރީ (ވީއޭއާރް) އިން ބަލާފައި ވެސް ނިންމީ ޕެނަލްޓީއެއް ދޭން ނުޖެހޭ ކަމަށެވެ.

މިނަތީޖާތަކާއެކު ސިޓީ އެއްވަނައިގައި އޮތީ ހަ ޕޮއިންޓްގެ ލީޑަކާއެކުއެވެ. އެ ޓީމަށް 27 މެޗުން 66 ޕޮއިންޓް ވަނީ ލިބިފައެވެ. ދެވަނައިގައި އޮތް ލިވަޕޫލަށް 26 މެޗުން 60 ޕޮއިންޓް ލިބިފައިވާއިރު، ތިންވަނައިގައި އޮތް ޗެލްސީއަށް 25 މެޗުން 50 ޕޮއިންޓް ވަނީ ލިބިފައެވެ. އަދި ލީގު ތާވަލުގެ ހަތަރުވަނައިގައި ޔުނައިޓެޑުން އޮތީ 27 މެޗުން 47 ޕޮއިންޓް ހޯދައިގެންނެވެ.