އައްޑޫއަށް ދަތުރުކުރާ ފަރާތްތަކަށް މަންޓާ އެއަރގެ ޕްރޮމޯޝަނެއް

މަންޓާ އެއަރއިން އައްޑޫއަށް ކުރާ ދަތުރުތަކަށް ޚާއްސަ ޕްރޮމޯޝަނެއް ތައާރަފްކޮށްފިއެވެ. "މަންޓާ އައްޑޫ ޕްރޮމޯޝަން"ގެ ދަށުން, 22 ކިލޯގެ ޗެކްޑްއިން ލަގޭޖާއެކު ކޮމްފަޓް (އިކޮނޮމީ) ކްލާހުގައި 1،250 ރުފިޔާއަށް ދަތުރުކުރެވޭނެއެވެ. ކޮމްފަޓް ކުލާހުގެ އާންމު އަގަކީ ކޮޅަކަށް 1،450 ރުފިޔާއެވެ. އަދި 35 ކިލޯގެ ލަގޭޖާއެކު ސަފާޔަރ (ބިޒްނެސް) ކްލާހުގައި 1،850 ރުފިޔާއަށްއަށް ދަތުރުކުރެވޭނެކަމަށް އެ އެއަރލައިނުން ބުނެއެވެ. ސަފާޔަރ ކުލާހުގެ އާންމު އަގަކީ ކޮޅަކަށް 2،400 ރުފިޔާއެވެ.

މަންޓާ އެއަރއިން އެއްމަސް ދުވަހުގެ މުއްދަތަކަށް މި ޕްރޮމޯޝަން ފަށާފައިވަނީ އެ އެއަރލައިނުގެ ދަތުރުތައް އައްޑޫއަށް ފެށުމާގުޅިގެންނެވެ. މަންޓާ އެއަރގެ ދަތުރުތައް އައްޑޫއަށް ފަށާފައިވަނީ މިިދިޔަ ބުރާސްފަތި ދުވަހުއެވެ. މި ޝެޑިއުލް ދަތުރުތަކާއެކު ކޮންމެ ދުވަހަކުވެސް އައްޑޫއާ މާލެއާ ދެމެދު އެއް ދަތުރު ކުރެވޭނެއެވެ. މި ދަތުރުތައް ކުރުމަށް ބޭނުންކުރާނީ ATR 72-600 އެއަރްކްރާފްޓެވެ.

ރާއްޖޭގެ ޑޮމެސްޓިކް ދަތުރުތަކުގައި ދެ ކްލާހެއްގެ ޓިކެޓް ވިއްކާ ހަމައެކަނި އެއަރލައިނަކީ މަންޓާއެވެ. އެގޮތުން އައްޑޫއަށް ކުރާ ދަތުރުތަކުގައިވެސް ކޮމްފޯޓް ކްލާސް ނުވަތަ އިކޮނޮމީ ކްލާސް އަދި ސަފާޔަރ ކްލާސް ނުވަތަ ބިޒްނަސް ޓިކެޓުތައް ވިއްކާނެއެވެ. މިގޮތުން ކޮމްފޯޓް ކުލާހުގައި 22 ކިލޯގެ ލަގެޖް އެލަވެންސެއް ލިބޭއިރު, 5 ކިލޯ އަތުން އުފުލޭނެއެވެ. އަދި ސަފާޔަރ ކްލާހުގައި 35 ކިލޯ ލަގެޖް އެލަވެންސް ލިބޭއިރު 5 ކިލޯ އަތުން އުފުލޭނެއެވެ.

މަންޓާ އެއަރއަކީ ރާއްޖޭގައި އެންމެ ފަހުން ލޯންޗުކުރި އެއަރލައިނެވެ. މި އެއަރލައިނަކީ ޔުނިވަރސަލް އެންޓަޕްރައިޒްއާއި ރިއޯލޯ އިންވެސްޓްމެންޓް ގުޅިގެން ކުރިއަށް ގެންދާ ކުންފުންޏެކެވެ.