ޔޫރަޕްގެ ޤައުމެއް ކަމަށްވާ ލަޓްވިއާއަށް އުފަން އުމުރުން 37 އަހަރުގެ ކާލިސް ބާޑިލިސް މުޅި ދުނިޔެ ވަށާ ދަތުރު ކުރަން ފަށާފައިވަނީ 2016 ވަނަ އަހަރު ނެމީބިއާ އިންނެވެ. އެއްވެސް އިންޖީނުލީ އުޅަނދެއް ބޭނުންނުކޮށް ދުނިޔެ ވަށާ ބުރު ޖެހުމުގެ ރެކޯޑް ޤާއިމުކުރުމަށް ކާލިސް ވަނީ އަޒާމު ހިފާފައެވެ. އަދި ކަނޑުމަގުން ދަތުރު ނުކުރެވޭ ޤައުމުތަކުގައި އޭނާ ދަތުރު ފަށަނީ ބައިސްކަލް ބޭނުންކޮށްގެންނެވެ.

2016 ވަނަ އަހަރު ދަތުރު ފެށުމަށްފަހު އޭނާ ވަނީ މިހާތަނަށް އެޓްލާންޓިކް އޯޝަނަށް ދަތުރުކޮށް ދެކުނު އެމެރިކާގައި ދަތުރުކުރުމަށްފަހު ޕެސިފިކް އޯޝަނުން ސްރީލަންކާ އާއި ހަމައަށް އައިސްފައެވެ. މިދިޔަ އަހަރުގެ ޖޫން މަހު އޭނާ ވެގެން ގޮސްފައިވަނީ ދެކުނު އެމެރިކާއިން އޭޝިއާއަށް ފަލި ޖެހި ފުރަތަމަ މީހާއަށެވެ. އޭނާ މެލޭޝިއާއަށް ދަތުރު ނިންމާލިއިރު މި ދަތުރުގައި އެއްކޮށް 715 ދުވަސް ވަނީ ވެފައެވެ. މެލޭޝިއާއަށް ދަތުރުކުރުމަށްފަހު ކޮވިޑާއި ގުޅިގެން ރިކޯޑު ޤާއިމުކުރުމަށްޓަކައި މި ފެށި ދަތުރު ހުއްޓާލަން ޖެހުނެވެ. އެއްއަހަރާއި ބައި މަޑުކުރުމަށްފަހު އޭނާ އަނެއްކާވެސް ދަތުރު ފެށީ މިއަހަރު ޖެނުއަރީ މަހުއެވެ.

ކާލީސް ދަތުރު ފެށީ މެލެޝިއާ އިން އިންޑޮނޭޝިއާއަށެވެ. އެއަށްފަހު ސްރީލަންކާއަށް ދަތުރުކޮށްފައިވާއިރު އޭނާއާއެކު އޭނާގެ ރައްޓެއްސަކު ވަނީ މި ދަތުރުގައި ބައިވެރިވެފައެވެ. ފަލި ޖެހުމުގެ ތަޖުރިބާ ހޯދުމަށް ނެކްސަސް އެކްސްޕެޑިޝަންގެ ފަރާތުން ޑިމީޓްރީ ކީފަރ އޭނާ އާއެކު ދިވެހިރާއްޖެއަށް ވަނީ ދަތުރުކޮށްފައެވެ. ރާއްޖެއެމްވީއާއި ވާހަކަދައްކަމުން ކާލިސް ބުނީ ރާއްޖެއަށް އައުމަށް 8 ދުވަހާއި 9 ގަޑީއިރު ނެގި ކަމަށެވެ. ރާއްޖެއަށް  ދަތުރުކުރުމަށް ފަލިޖެހީ އެ ދެމީހުން 8 ގަޑިއިރުން ގަޑި ބަހައިގެންކަމަށެވެ. ރާއްޖެއަށް ބޯޓު ވަތްއިރު އެއްވެސް ހުއްދައެއް ނެތުމާއެކު ފުލުހުން އޭނާ ހިފެއްޓި ކަމަށް ވެސް ބުންޏެވެ. އަދި ސެއިލިން ޓުއާރސްގެ އެހީތެރިކަމާއެކު ރާއްޖެއަށް އެތެރެވެވޭ ގޮތްވި ކަމަށް ބުންޏެވެ.

ރާއްޖެއެމްވީ އާއި ވާހަކަދައްކަމުން ޑިމީޓްރީ ބުނީ އޭނާ ފަލިޖެހުމުގެ ތަޖުރިބާ ހޯދީ މިފަދަ ރެކޯޑެއް ޤާއިމުކުރުމަށް ކަމަށެވެ. އެހެންނަމަވެސް އޭނާ ދަތުރުކުރަން ނިންމާފައިވަނީ ހުޅަނގު އެފްރިކާއިން ބްރެޒިލަށެވެ. ޑިމީޓްރީ ބުނީ ކާލިސްއާއެކު ލަންކާއިން ރާއްޖެ އާއި ހަމައަށް ދަތުރުކުރިއިރު ފަލިޖެހުމުގެ ތަޖުރިބާ ލިބިގެން ހިނގައްޖެ ކަމަށާއި ވަރަށް ގިނަ ކަންތައްތަކެއް ދަސްވި ކަމަށެވެ.

ކާލިސް މުޅި ދުނިޔެ ވަށާ ދަތުރުކުރުމަށް ގެންގުޅެނީ ކުޑަ ބޯޓެކެވެ. މި ބޯޓުގައި އޭނާ ކެއުމުގެ ގޮތް ހަމަޖައްސާ ގޮތާއި ބެހޭގޮތުން ސުވާލުކުރުމުން ބުނީ އޭނާ އަބަދުވެސް ދަތުރުގެ ފެށުމުގެ ކުރިން ވަރަށް ރަނގަޅަށް ތައްޔާރުވާ ކަމަށެވެ. އެގޮތުން ކެއިން ބުއިމަށް ބޭނުންވާ ކާބޯތަކެތި ހަމައަށް ބޯޓަށް އަރުވައިގެން ދަތުރު ފަށާ ކަމަށެވެ. ހެނދުނު އާންމުކޮށް އޭނަ އޯޓްސްކާއިރު މެންދުރަށް ކަނީ ޕެކެޓެއްގައި ބަންދުކޮށްފައި ހުންނަ ހަނޑުލާއި ތަރުކާރީއެވެ. އަދި އޭގެ ތެރެއަށް ފެން އެޅުމުން ބަތާއި ތަރުކާރީ އެއްކޮށްފައި ހުންނަ ރަނގަޅު ކެއުމަކަށް ބަދަލުވެގެންދާ ކަމަށް އޭނާ ބުންޏެވެ. ރޭގަނޑު ބައެއް ފަހަރު ޕްރޮޓީން ޝޭކް އޭނާ ބޮއެވެ. މީގެއިތުރުން ލޮނުފެން ރީތި ފެނަށް ބަދަލު ކޮށްދޭ ފިލްޓަރއެއް އެ ބޯޓުގައި ހަރުކޮށްފައި ހުރެއެވެ. ފެން ބޯނީ އެ ފިލްޓަރ މެދުވެރިކޮށެވެ.

ބޯޓުގައި ސަލާމަތީ ގޮތުން އަޅާފައިވާ ފިޔަވަޅުތަކާއި ބެހޭގޮތުން ކާލިސް ބުނީ ނެވިގޭޝަން ސިސްޓަމެއް ހަރުކުރެވިފައިވާ ކަމަށެވެ. އަދި ދަތުރުމަތީގައި ކަނޑުގައި ދަތުރުކުރާ ބޮޑެތި ޝިޕްތަކާއި ބޯޓުތައް ދެނެގަތުމަށް އޮޓަމެޓިކް ސިސްޓަމެއް ބޭނުންކުރާ ކަމަށެވެ. އަދި ބޮޑު ޝިޕެއް ނުވަތަ ބޯޓެއް ކައިރީގައި އުޅޭނަމަ އެ ބޯޓުތަކާއި ވާހަކަދެއްކުމަށް ވީއެޗްއެފް ރޭޑިއޯ ސިސްޓަމް ބޭނުންކުރާ ކަމަށެވެ. އަދި ސެޓަލައިޓް ފޯނު އޭނާ ބޭނުންކުރާ ކަމަށް ވެސް ކާލިސް ބުންޏެވެ.

ކާލިސް ބުނީ އޭނާ ހޭލަނީ ފަތިހު ފަހެއް ޖަހާއިރު ކަމަށެވެ. އަދި އެއަށްފަހު 05:30 ގައި ފަލިޖަހަން ފަށާ ކަމަށެވެ. 07:30 އިން 08:00 އަށް ހެނދުނުގެ ނާސްތާ ނެގުމަށްފަހު އަނެއްކާވެސް މެންދުރު 12:00 ޖަހަންދެން އޭނާ ފަލި ޖަހަނީއެވެ. އަދި މެންދުރު 12:00 އިން 13:00 އަށް މެންދުރުގެ ކެއުން ކަނީއެވެ. އެއަށްފަހު ރޭގަނޑު 20:00 ޖަހަންދެން އޭނާ ފަލިޖަހައެވެ. އެ ގަޑީގެ ތެރޭގައި 15 މިނެޓްގެ ބްރޭކްތައް އޭނާ ނަގައެވެ. ރޭގަނޑު 20:30 ގައި އޭނާ އާންމުކޮށް ނިދައެވެ. އަދި ބޯޓު އޮޔާދާން ދޫކޮށްލައެވެ. އޭނާ ބުނީ ބޯޓު އޮޔާދާއިރު ވެސް ރަނގަޅު މިސްރާބަށް ބޯޓު ދޭތޯ ކަށަވަރު ކުރާ ކަމަށެވެ.

ކާލިސް އާއި ޑިމީޓްރީ ބުނީ ލަންކާއިން ރާއްޖެއަށް ގާތްގަޑަކަށް 800 ކިލޯމީޓަރު ދަތުރުކުރިއިރު ވެސް މަދު ބޯޓެއް ފިޔަވައި އެއްވެސް މީހަކު ކަނޑުމަތިން ނުފެންނަ ކަމަށެވެ. އަދި ރާއްޖެއަށް ދަތުކުރަމުން ދިޔައިރު ނޫ ކަނޑު ފިޔަވައި އެހެން އެއްވެސް ތަނެއް ނުފެންނަ ކަމަށެވެ. އެކަމަކު ރާއްޖެއަށް އައުމަށްފަހު ބަނދަރު ކުރުމުން މިތަނުގެ ކަންތައްތައް ފެނި އަޖައިބުވި ކަމަށް އެ ދެމީހުން ބުންޏެވެ. ޓެކްސީތަކާއި މީހުން ހެލިފެލިވެ އުޅޭ މަންޒަރު ފެނިގެންދިޔައެވެ. އެދެމީހުން ބުނީ ރާއްޖެއިން ހައިރާން ކުރުވި ކަމެއް ފެނުނު ކަމަށެވެ. އެހެން ޤައުމުތަކުގެ މީހުންނާއި އަޅާ ބަލާއިރު ދިވެހިންގެ ހިތް ހެޔޮކަމާއި އޯގާތެރިކަން ކަމަށެވެ. އެމީހުން ރާއްޖެ ސިފަކޮށްފައިވަނީ އެމީހުންނަށް މަރުހަބާ ކިޔުމަށް ތައްޔާރަށް އޮތް ޤައުމެއްގެ ގޮތަށެވެ. އަދި އެހެން މީހުން ވެސް ބުނާފަދައިން އެމީހުން ރާއްޖެ ސިފަކުރީ "ޕެރެޑައިސް" އެއް ގޮތަށެވެ.

މުޅި ދުނިޔެ ވަށާ ދަތުރުކުރުމުގެ ރެކޯޑް ހެދުމަށް ކާލިސް މަސައްކަތްކުރާއިރު ރާއްޖެއިން އޭނާ ހޮނިހިރު ދުވަހު ފުރައިގެންދާނީ އެކަންޏެވެ. އޭނާގެ މި ދަތުރުގެ 75 އިންސައްތަ މިހާރު ފުރިހަމަވެފައިވާއިރު ދަތުރު ނިންމުމަށް ހަމަޖެހިފައިވަނީ، ދަތުރު ފެށި ޤައުމު ނެމީބިއާ އިންނެވެ. މުޅި ދުނިޔެ ވަށާ ފަލި ޖެހުމުގެ ރެކޯޑު ޤާއިމުކުރުމަށްފަހު ކާލިސް ބުނީ މިފަދަ ތަފާތު އެތައް ކަމެއް ކުރުމަށް އޭނާ ވިސްނާފައިވާ ކަމަށެވެ. އެހެންނަމަވެސް އިހަށް އޭނާގެ ވިސްނުން ހުރީ 2016 ވަނަ އަހަރު ފެށި މި ދަތުރު ކާމިޔާބު ކުރުމަށް ކަމަށެވެ. ކާލިސް ބުނީ އޭނާ ރާއްޖެއިން ފުރައިގެން ދަނީ ދިވެހިންގެ ފަރާތުން ފެނުނު ހިތްހެޔޮކަމާއި އޯގާތެރިކަން ހިތުގެ ތެރޭގައި ބާއްވައިގެން ކަމަށެވެ.