ކަޅު ބާޒާރުގައި ޑޮލަރުވިއްކާ 11 ބިދޭސީންނާއި ހަށިވިއްކާ ވިޔަފާރީގައި ޙަރަކާތްތެރިވާ 46 ބިދޭސީއެއް ޑީޕޯޓު ކޮށްފައިވާކަމަށް މޯލްޑިވްސް އިމިގްރޭޝަނުން ބުނެފިއެވެ.

ފުލުހުން ވަނީ ބިދޭސީން އެކި ކުށްތަކުގައި ޙަރަކާތްތެރިވުމާއި ގުޅޭ 18 މައްސަލައެއް ޚާރިޖީ ގުޅުންތަކުގެ ކޮމިޓީއަށް ހިއްސާކޮށްފައެވެ. އެކަމާ ގުޅޭގޮތުން ބުދަ ދުވަހު އޮތް ކޮމިޓީގައި ވާހަކަ ދައްކަވަމުން އިމިގްރޭޝަން ކޮންޓްރޯލަރ މުޙައްމަދު އަހުމަދު (ހަނަފީ) ވިދާޅުވީ، ފުލުހުންނާއި ގުޅިގެން ހިންގި ޓާގެޓަޑް އޮޕަރޭޝަންތަކެއްގައި ކަޅު ބާޒާރުގައި ލާރި މާރުކުރުމާއި ގުޅޭ މައްސަލަތަކުގައިވެސް 11 ބިދޭސީއެއް ދާދި ފަހުންވެސް ޑީޕޯޓު ކޮށްފައިވާ ކަމަށެވެ.

ހަމައެއާއެކު، ހަށިވިއްކުމުގެ ވިޔަފާރީގައި އުޅޭ 46 ބިދޭސީއެއްވެސް ފާއިތުވި އަހަރެއްހާ ދުވަހުގެ ތެރޭގައި ފުރުވާލެވިފައިވާކަން ފާހަގަ ކުރައްވައި ހަނަފީ ވިދާޅުވީ، މިއީ އާންމުކޮށް ހިނގާ ކަންކަމަށް ވުމާއެކު، ފުލުހުންގެ އިންޓެލިޖެންސްގެ އަލީގައި ޖޮއިންޓް އޮޕަރޭޝަންތަކެއް ކޮންމެ ހަފްތާއެއްގައިވެސް ކުރިއަށް ގެންދަވާ ކަމަށެވެ.

ރާއްޖޭގައި އުޅޭ ބިދޭސީން ކުށްތަކަށް އަރައިގަންނަ މައްސަލަތައް ގިނަވެފައިވާއިރު، ރާއްޖޭގައި ބަނގުރާ ވިއްކުމާއި އޭގެން ވިޔަފާރި ކުރުމާއި ގުޅޭ މައްސަލަތަކުގައި 525 ބިދޭސީއަކު ޙަރަކާތްތެރިވާކަން ފާހަގަކުރެވިފައިވާ ކަމަށާއި، ޑްރަގް ޓްރެފިކް ކުރުމާއި ގުޅޭ މައްސަލަތަކުގައިވެސް 146 ބިދޭސީއަކު ބައިވެރިވެފައިވާކަމަށް ފުލުހުން ވަނީ ދާދި ފަހުން ހާމަކޮށްފައެވެ.

މިކަމާއި ގުޅޭ ގޮތުން ރާއްޖެއެމްވީއާއި ވާހަކަދައްކަވަމުން އިމިގްރޭޝަން ކޮންޓްރޯލަރ މުޙައްމަދު އަހުމަދު (ހަނަފީ) ވިދާޅުވީ، ހުޅުމާލޭގައި މިހާރު ޤާއިމު ކުރަމުންދާ ޑިޓެންޝަން ފެސިލިޓީގެ މަސައްކަތް މިހާރު އޮތީ ނިމުމުގެ މަރުޙަލާގައި ކަމަށެވެ. އެތަނުގެ މަސައްކަތް ނިމުމުން މި މަސައްކަތަށް އިތުރު ފަސޭހަތަކެއް ލިބިގެންދާނެކަމަށް ހަނަފީ ވިދާޅުވިއެވެ. އެގޮތުން ގާތްގަނޑަކަށް 200 އަށް ވުރެ ގިނަ މީހުންގެ ޖާގައިގެ މި ޑިޓެންޝަންގެ މަސައްކަތް މަހެއްހާ ދުވަސް ތެރޭގައި ނިންމާލެވޭނެކަމަށް މައުލޫމާތު ލިބިވަޑައިގެންފައިވާކަމަށް ހަނަފީ ވިދާޅުވިއެވެ.

އެކަމާ ގުޅޭގޮތުން ކޮމިޓީގައި ދެއްކެވި ވާހަކަފުޅުގައި ހަނަފީ ވިދާޅުވީ، ޑިޓެންޝަންގައި ތިބޭ މީހުން ފުރުވާލުމަށް އާންމު ގޮތެއްގައި 7 ދުވަހާއި 15 ދުވަހުގެ މުއްދަތެއް ނަގާ ކަމަށެވެ.

ފުލުހުން ބުނެފައިވާ ގޮތުގައި މިދިޔަ 3 އަހަރު ތެރޭގައި ހަމައެކަނި މަސްތުވާތަކެތި ޓްރެފިކް ކުރުމާއި ގުޅުންހުރި 41 ބިދޭސީއަކު ހިމެނެއެވެ. އަދި މާލޭގެ ޑްރަގް ކެފޭތަކުން އާންމުކޮށް ހިދުމަތް ހޯދާ 1118 ދިވެހީންގެ އިތުރުން، 139 ބިދޭސީއަކުވެސް ފާހަގަކުރެވިފައިވާކަމަށް ފުލުހުން ވަނީ މީޑިއާތަކަށް ވަނީ ހިއްސާކޮށްފައެވެ.