އެކި ކުށްތަކުގައި ގެންނަ ބިދޭސީން ބައިތިއްބާ ޑިޓެންޝަންގެ ޖާގަ ނެތުމުން ބޮޑެތި ގޮންޖެހުންތައް ކުރިމަތިވޭ: ހަނަފީ

މަސްތުވާތަކެއްޗާއި ގުޅުން ހުރި މައްސަލަތަކާއި އެހެނިހެން ޖިނާއީ ކުށްތަކުގައި ގެންނަ ބިދޭސީން އިމިގްރޭޝަންގެ ޤާނޫނާއި ޚިލާފުވެގެން ފުރުވާލެވެންދެން ބައިތިއްބަން ހަމަޖެހިފައިވާ ޑިޓެންޝަން ފެސިލިޓީގައި ޖާގަ ނެތުމުން ބޮޑެތި ގޮންޖެހުންތައް ކުރިމަތިވާކަމަށް އިމިގްރޭޝަން ކޮންޓްރޯލަރ މުޙައްމަދު އަހުމަދު (ހަނަފީ) ވިދާޅުވެއްޖެއެވެ.

ރާއްޖޭގައި ބަނގުރާ ވިއްކުމާއި އޭގެން ވިޔަފާރި ކުރުމާއި ގުޅޭ މައްސަލަތަކުގައި 525 ބިދޭސީއަކު ޙަރަކާތްތެރިވާކަން ފާހަގަކުރެވިފައިވާ ކަމަށާއި، ޑްރަގް ޓްރެފިކް ކުރުމާއި ގުޅޭ މައްސަލަތަކުގައިވެސް 146 ބިދޭސީއަކު ބައިވެރިވެފައިވާކަމަށް ފުލުހުން ވަނީ ދާދި ފަހުން ހާމަކޮށްފައެވެ. ޑްރަގް އޮޕަރޭޝަންތަކުގެ މައުލޫމާތުތައް މީޑިއާތަކަށް ހިއްސާ ކުރުމަށް ބޭއްވި ޚާއްސަ ހަރަކާތުގައި ފުލުހުން ބުނެފައިވަނީ މިއީ 2015 ވަނަ އަހަރުން ފެށިގެން 2021 ވަނަ އަހަރުގެ ނިޔަލަށް ފާހަގަ ކުރެވޭ ތަފާސްހިސާބު ކަމަށެވެ.

Advertisement

މިކަމާއި ގުޅޭ ގޮތުން ރާއްޖެއެމްވީއާއި ވާހަކަދައްކަވަމުން އިމިގްރޭޝަން ކޮންޓްރޯލަރ މުޙައްމަދު އަހުމަދު (ހަނަފީ) ވިދާޅުވީ، އެކަހަލަ ކުށްތަކުގައި ފުލުހުން ގެންނަ މީހުން އިމިގްރޭޝަނުން ޑީޕޯޓު ކުރަމުންގެންދާ ކަމަށެވެ. އެގޮތުން ފުލުހުން އެފަދަ މީހުން ހައްޔަރު ކުރުމަށްފަހު ޙަވާލު ކުރާ ހިސާބުން އެމަސައްކަތް ކުރިއަށްގެންދާނެކަމަށާއި، ފުލުހުންނާއި ގުޅިގެންވެސް ތަފާތު އެކި އޮޕަރޭޝަންތައް ހިންގާ ކަމަށް ހަނަފީ ވިދާޅުވިއެވެ.

މިސާލެއްގެ ގޮތުން ބިދޭސީން ރާއްޖޭގައި ޑްރަގް ވިޔަފާރި ކުރުމާއި، ހަށިވިއްކުމުގެ ވިޔަފާރި ކުރުން ފަދަ މައްސަލަތަކުގައި ފުލުހުންނާއި ގުޅިގެން ހިންގޭ ޚާއްސަ އޮޕަރޭޝަންތަކުގައި މީހުން ޑީޕޯޓު ކުރަމުންދާކަމަށް ހަނަފީ ވިދާޅުވިއެވެ.

ހަނަފީ ވިދާޅުވީ، އެކަށީގެންވާ ޖާގައިގެ ޑިޓެންޝަން ފެސިލިޓީއެއް ނެތުމުން އެކަމުގެ ގޮންޖެހުންތައް އެ މަސައްކަތަށް ކުރިމަތިވާ ކަމަށެވެ. އެގޮތުން ކޮންމެ ދުވަހަކުވެސް ޖިނާއީ އެކި ކަހަލަ ކުށްތަކުގައި މީހުން ގެންނައިރު، މިހާރު ހުޅުމާލޭ ޖަލުގައި ހުންނަ ޑިޓެންޝަން ސެންޓަރުގައި ހުންނަނީ 45 މީހުންގެ ޖާގަކަމަށް ހަނަފީ ވިދާޅުވިއެވެ.

އިމިގްރޭޝަންގެ ގާނޫނާއި ހިލާފުވެގެން ފުރުވާލެވެންދެން ބަންދުގައި ތިބޭ މީހުން ބަލަހައްޓާ ޑިޓެންޝަން ސެންޓަރެއްގެ ގޮތުގައި ހުޅުމާލޭ ޖަލުގައި ހުންނަ ޑިޓެންޝަން ސެންޓަރުގައި އަލަށް ހެދި ޔުނިޓް ހުޅުވާފައިވަނީ 10 އޭޕްރީލް 2019 ގައެވެ.

ހަނަފީ ވިދާޅުވީ، ހުޅުމާލޭގައި މިހާރު ޤާއިމު ކުރަމުންދާ ޑިޓެންޝަން ފެސިލިޓީގެ މަސައްކަތް މިހާރު އޮތީ ނިމުމުގެ މަރުޙަލާގައި ކަމަށެވެ. އެތަނުގެ މަސައްކަތް ނިމުމުން މި މަސައްކަތަށް އިތުރު ފަސޭހަތަކެއް ލިބިގެންދާނެކަމަށް ހަނަފީ ވިދާޅުވިއެވެ. އެގޮތުން ގާތްގަނޑަކަށް 200 އަށް ވުރެ ގިނަ މީހުންގެ ޖާގައިގެ މި ޑިޓެންޝަންގެ މަސައްކަތް މަހެއްހާ ދުވަސް ތެރޭގައި ނިންމާލެވޭނެކަމަށް މައުލޫމާތު ލިބިވަޑައިގެންފައިވާކަމަށް ހަނަފީ ވިދާޅުވިއެވެ.

ފުލުހުން ބުނެފައިވާ ގޮތުގައި މިދިޔަ 3 އަހަރު ތެރޭގައި ހަމައެކަނި މަސްތުވާތަކެތި ޓްރެފިކް ކުރުމާއި ގުޅުންހުރި 41 ބިދޭސީއަކު ހިމެނެއެވެ. އަދި މާލޭގެ ޑްރަގް ކެފޭތަކުން އާންމުކޮށް ހިދުމަތް ހޯދާ 1118 ދިވެހީންގެ އިތުރުން، 139 ބިދޭސީއަކުވެސް ފާހަގަކުރެވިފައިވާކަމަށް ފުލުހުން ވަނީ މީޑިއާތަކަށް ވަނީ ހިއްސާކޮށްފައެވެ.