ނަދީމްގެ މަރު: ޚުލާސާ ބަޔާން އިއްވައިފި، ޙުކުމް ކުރުން މާރޗު މަހު
މަފާޒު ޙުސައިން ސަލީމްގެ މައްޗަށް ވަނީ ތޫނު އެއްޗަކުން ހަމަލާދީ މީހަކު މެރުމުގެ ކުށުގެ ދައުވާ އުފުލާފައި
ނަދީމް މަރާލި މައްސަލައިގެ ޝަރީއަތުގެ އަޑުއެހުމެއް އަންގާރަ ދުވަހު ކްރިމިނަލް ކޯޓުގައި ވަނީ ކުރިއަށް ގެންގޮސްފައި
ހއ. ތަކަންދޫ އިބްރާހީމީ ހިޔާ، އުމުރުން 23 އަހަރުގެ ނަދީމު ޢަބްދުއްރަޙީމް އަށް ތޫނު އެއްޗަކުން ހަމަލާދީ މަރާލި މައްސަލައިގެ ޝަރީއަތުގެ އަޑުއެހުމެއް އަންގާރަ ދުވަހު ކްރިމިނަލް ކޯޓުގައި ކުރިއަށް ގެންގޮސްފިއެވެ.
ނަދީމް މަރާލި މައްސަލައިގައި، ގ. ޝާރާޒް، މުޙައްމަދު މަފާޒު ޙުސައިން ސަލީމްގެ މައްޗަށް ވަނީ ތޫނު އެއްޗަކުން ހަމަލާދީ މީހަކު މެރުމުގެ ކުށުގެ ދައުވާ އުފުލާފައެވެ. އަދި ތޫނު އެއްޗެއް ބޭނުންކޮށްގެން، ގަސްތުގައި މީހަކު މަރާލުމުގައި ބައިވެރިވި ކަމުގެ ކުށުގެ ދައުވާ, ރ. އިންނަމާދޫ ސަމަންތާ, ޙުސައިން ޝާމިންއާއި ގއ. ގެމަނަފުށި ހަވާސް, މުޙައްމަދު ކަރަމް ސުހައިލް, އަދި ލ. ގަން ވިދާތަރި, ޢަލީ ނިފާޒުގެ މައްޗަށް އުފުލާފައިވެއެވެ. މި ހަތަރު މީހުން ވެސް ވަނީ ދައުވާއަށް އިންކާރުކޮށްފައެވެ.
ކްރިމިނަލް ކޯޓުގައި މި މައްސަލަ ކުރިއަށް ގެންދަވަނީ ގާޒީ ހުސައިން ފާއިޒް ރަޝާދެވެ.
މި މައްސަލައިގައި އެންމެ ފަހުން ބޭއްވި އަޑުއެހުމުގައި ވަނީ ހެކިބަހާއި ގުޅޭގޮތުން ވާހަކަދައްކާފައެވެ. އަންގާރަ ދުވަހުގެ އަޑުއެހުމަކީ މި މައްސަލައިގެ ޚުލާސާ ބަޔާން ހުށައެޅުމަށް ބޭއްވި އަޑުއެހުމެކެވެ. ފުރަތަމަ ދައުލަތުން ވަނީ ދައުވާ ލިބޭ 4 މީހުންގެ މައްޗަށްވެސް އެކުއެކީގައި ޚުލާސާ ބަޔާން އިއްވާފައެވެ. މި މައްސަލައިގަައި ދައުވާ ލިބޭ ކުޑަކުއްޖެއްގެ މައްސަލަ ވަކިން ޖުވެނައިލް ކޯޓުގައި ކުރިއަށްދެއެވެ.
ދައުވާގައިވާ ގޮތުން މަފާޒަކީ ނަދީމަށް ހަމަލާދިން މީހާއެވެ. މަފާޒްއާއެކު އަލީ ނިފާޒް ކެފޭތެރެއަށް ވަދެފައިވާކަމަށް ދައުލަތުގެ ވަކީލާ ވިދާޅުވިއެވެ. ނަމަވެސް ނަދީމަށް ޙަމަލާ ދީފައިވަނީ މަފާޒެވެ. އެއަށްފަހު ދެމީހުން އެކުއެކީގައި ކެފޭ ތެރެއިން ނުކުމެގެން ދިޔަކަމަށް ސިއްރު ހެކިވެރިއަކާއި ޙަވާލާދީ ޚުލާސާ ބަޔާނުގައި ދައުލަތުން ފާހަގަކުރިއެވެ.
ދެން ތިބި މީހުންނަކީ ސައިކަލުތަކުގައި އެތަނަށް ގޮސް، އެކަމުގައި ބައިވެރިވި މީހުން ކަމަށް ދައުލަތުން ވަނީ ފާހަގަކޮށްފައެވެ.
ޚުލާސާ ބަޔާން އިއްވަވަމުން ދައުލަތުން ވަނީ ނަދީމްގެ ބޮލުގެ ވައަތް ފަރާތަށް ތޫނު އެއްޗަކުން ޙަމަލާ ދިނުމުގެ ސަބަބުން ސިކުނޑިއަށް އޭގެ އަސަރު ކޮށްފައިވާކަމަށް ޑޮކްޓަރުން ވިދާޅުވި ކަމަށެވެ. އޭނާއަށް ދީފައިވަނީ އެފަދަ ޙާލަތެއްގައި ދޭންޖެހޭ ފަރުވާ ކަމަށާއި، އޭނާ މަރުވީ އަނިޔާތަކުގެ ސަބަބުން "ސެރެބްރަލް އެޑީމާ" (ސިކުނޑި ދުޅަވުން) އާއި "ސެރެބްރަލް ހާނިއަރ" (ބޮލުގެ ނާށިގަނޑުގެ ބޭރަށް ސިކުނޑީގެ ބައެއް ނުކުތުން) މެދުވެރިވެގެން ކަމަށް ޑޮކްޓަރުން ފާހަގަ ކޮށްފައިވެއެވެ.
މި މައްސަލައިގައި ދައުލަތުން 11 ސިއްރު ހެކިވެރިއެއް ހުށައެޅި ނަމަވެސް އެ ހުރިހާ ހެކިންގެ ހެކިބަސް ނެގިފައެއް ނުވެއެވެ. ދައުލަތުން އެކަމުގެ ސަބަބެއްގެ ގޮތުގައި ފާހަގަކުރެއްވީ ހެކި ވެރިންނަށް ނުފޫޒު ފޯރުވާ ކަމާއި، އެކަމުގެ އިންޓެލިޖެންސް މައުލޫމާތުވެސް ލިބިފައިވާކަމެވެ. އެގޮތުން މަފާޒް ޙަމަލާ ދިން ތަން ފެނުނުކަމަށް ބުނެ ހެކިބަސް ދިން 2 ސިއްރު ހެކިވެރިއަކުވެސް ފަހުން ވަނީ އެހެން އެމީހުންނަށް ބުނެވުނީ އޮޅުމަކުން ކަމަށް ބަޔާންކޮށް އެއް އިބާރަތްތަކެއް ހިމެނޭ ސިޓީއެއް ކޯޓަށް ހުށައަޅާފައެވެ. ނަމަވެސް ދައުލަތުން ވަނީ އެއީ ހެކިންނަށް ނުފޫޒު ފޯރުވުމުގެ ސަބަބުން ފޮނުވާފައިވާ ސިޓީތަކެއްކަމަށްވުން އެކަށީގެންވާކަން ފާހަގަކުރައްވައި، ސިއްރު ހެކިވެރިން ތަހުގީގަށް ދީފައިވާ ބަޔާންތަކާއި އެއާއި ގުޅުވާލެވޭ ހެކިތަކަށް މި މައްސަލަ ނިންމަވާއިރު ރިއާޔަތް ކޮށްދެއްވުމަށް އެދިލައްވާފައެވެ.
ދައުވާ ލިބޭ ފަރާތްތަކުގެ ވަކީލު ނޫރުއްސަލާމް ވިދާޅުވީ، މި ޙާދިސާ ހިނގި ސީންއަށް އެންމެ ފުރަތަމަ ހާޒިރުވި 2 ފުލުހުން ދީފައިވާ ހެކިބަހަށް ބަލާއިރު، ގިނަ އަދަދެއްގެ މީހުން މޭޒެއްގެ ދޮށުގައި ތިބިކަމަށް ބުނެފައިވާ ކަމަށާއި، ފުލުހުން އަމަލުކޮށްފައިވާ ގޮތަށް ބަލާއިރު މީހަކަށް ނުވަދެވޭ ގޮތަށް އެތަން ބަންދުކުރިއިރު ރެސްޓޯރަންޓު މަތީގައި ޚިދުމަތް ލިބިގަންނަން ތިބި ފަރާތްތަކަށް ނުކުމެވޭ ގޮތަށް އިންތިޒާމު ހަމަޖައްސާފައި އޮތް ކަމަށެވެ. އަދި އޭރު އެތަނުގައި ތިބި ގިނަ އަދަދެއްގެ މީހުންނަކީ އެ ޙާދިސާ ލޮލަށް ފެނުނު މީހުންނަށް ވުމުގެ އިހުތިމާލު އޮތް ކަމަށާއި، އެކަމުގައި ބައިވެރިވި ފަރާތެއް ހުރުމުގެ އިހުތިމާލުވެސް އޮތް ކަމަށެވެ. މި އެންމެން ފޮނުވާލިއިރު އެމީހުންގެ ނަން ނޯޓުކޮށްފައިނުވާކަން ވަކީލު ނޫރުއްސަލާމް ފާހަގަ ކުރެއްވިއެވެ.
ނޫރުއްސަލާމް ވިދާޅުވީ، ތަހުގީގުގެ މި ފިޔަވަޅު ދޫކޮށްލުމުގެ ސަބަބުން ތަހުގީގުގެ ވަރަށް ބޮޑު ބައެއް ގެއްލިގެން ގޮސްފައިވާ ކަމަށެވެ.
ވަކީލު ވިދާޅުވީ، ޙާދިސާ ހިނގި ތަނުގައި ތިބި ކަމަށް 9 ހެކިވެރިއަކު ހެކިބަސް ދީފައިވާ ކަމަށާއި، އޭގެ ތެރެއިން 2 މީހަކު ފިޔަވަައި އެންމެންގެ ހެކި ބަހުންވެސް އެނގެނީ މޫނު ނިވާކޮށްގެން ތިބި ބަޔަކު މިކަމުގައި ހިމެނޭކަން ކަމަށާއި، ދައުވާ ލިބޭ އެއްވެސް މީހެއް އެތަނުން ފެނުނު ކަމަށް ބުނެފައިނުވާ ކަމަށެވެ. ނަމަވެސް އެންމެން ވެސް އެ ޙާދިސާގެ މަންޒަރު ދުށްކަމަށް ހެކިބަހުން އެނގޭކަން ވަކީލު ފާހަގަ ކުރެއްވިއެވެ.
މި މައްސަލައިގައި ދެފަރާތުން ޚުލާސާ ބަޔާން އިއްވާފައިވާއިރު، ޝަރީއަތުން އިތުރުކަމެއް ސާފުކުރަން ނެތްނަމަ ދެން މި މައްސަލައިގައި އޮންނާނީ ޙުކުމް ކުރުމެވެ. އެ އަޑުއެހުން އޮންނާނީ 31 މާރޗުގައެވެ.
