މަޑިވަރު އެއާރޕޯޓް ރަސްމީކޮށް ހުޅުވައިފި
މަޑިވަރުގެ އެއާޕޯޓުގެ ޓެސްޓް ފްލައިޓް ޖެއްސީ 2021ވަނަ އަހަރުގެ ޑިސެމްބަރު މަހުގެ 25ވަނަ ދުވަހުއެވެ.
މަޑިވަރު އެއާރޕޯޓް ހުޅުވުމަށް ބޭއްވި ރަސްމިއްޔާތުގެ ތެރެއިން
ޅ. މަޑިވަރުގައި ތަރައްޤީކޮށްފައިވާ އެއާރޕޯޓު ރަސްމީކޮށް ހުޅުވައިފިއެވެ.
މި އެއާރޕޯޓް ހުޅުއްވައި ދެއްވީ ރައީސުލްޖުމްހޫރިއްޔާ އިބްރާހިމް މުހައްމަދު ސާލިހުއެވެ. މި އެއާޕޯޓު ހަދަން ސަރުކާރުން ޗަމްޕާ ބްރަދާސްއާ ހަވާލުކޮށް އެކަމަށް ސޮއިކޮށްފައި ވަނީ 29 މެއި 2018 ގައެވެ. މި އެއާޕޯޓުގައި 1.2 ކިލޯ މީޓަރުގެ ރަންވޭއަކާއި އެއާކްރާފްޓްތައް ޕާކު ކުރާނެ ސަރަހައްދަކާއި ޒަމާނީ ފެންވަރުގެ ޓާމިނަލެެއްވަނީ އަލާފައެވެ. ގާތްގަނޑަކަށް 11 މިލިއަން ޑޮލަރު ހަދަރު ކޮށްގެން ހެދި މި އެއާޕޯޓުގެ ކޮންސްޓްރަކްޝަން މަސައްކަތް ކޮށްފައިވަނީ ޗައިނާގެ ބެއިޖިންގެ ކުންފުންޏެއް ކަމަށްވާ ބީޔޫސީޖީންނެވެ.
އެއާރޕޯޓް ހުޅުވުމުގެ ރަސްމިއްޔާތުގައި ވާހަކަފުޅުދައްކަވަމުން ރައީސުލްޖުމްހޫރިއްޔާ އިބްރާހިމް މުހައްމަދު ސާލިހު ވިދާޅުވީ، ޅ އަތޮޅުގެ ވިޔަފާރިވެރިންނާއި ރިސޯޓް ހިންގާ ފަރާތްތަކަށް މިއަދަކީ އުފާވެރި ދުވަހެއް ކަމަށާއި، މިއީ އަތޮޅުގެ ރައްޔިތުން އެތައް ދުވަހެއް ވަންދެން ކުރަމުން އައި އުންމީދު ހަގީގަތަށް ވެގެން އައި ދުވަސް ކަމުގައެވެ.
އެއާޕޯޓްގެ މަސައކަތާ ހަވާލުވި ކްރައުން އެންޑް ޗަމްޕާ ގްރޫޕަކީ ރައްޖޭގެ ތަރައްގީގައި މުހިންމު ބައިވެރިއެއް ކަމުގައި ރައީސް ސާލިހު ފާހަގަކުރެއްވިއެވެ.
ރައީސް ސާލިހު ވިދާޅުވީ، އެއް ރަށް އަނެއްރަށާ ގުޅުވާލައި، އެއް އަތޮޅު އަނެއް އަތޮޅާ ގުޅުވާލުމަކީ، މި ރާއްޖެ ލާމަރުކަސީ އުސޫލުން ކުރިއަށް ގެންދިޔުމުގައި އެންމެ ބޮޑަށް ބޭނުން ވެފައި އޮތް ކަންތައް ކަމުގައެވެ. މިއީ އެކަމަށް އިތުރުވެގެންދިޔަ ބޮޅެއް ކަމަށެވެ.
މި އެއަރޕޯޓާއެކު އެ ސަރަހައްދުގެ ފަތުރުވެރިކަމަށް ބޮޑެތި ކުރިއެރުން ތަކެއް އަންނާނެ ކަމަށް ސަރުކާރުން ވަނީ ލަފާކޮށްފައެވެ.
ކުރެއްދޫ ހޯލްޑިންގގެ މެނޭޖިންގ ޑިރެކްޓަ މުހައްމަދު ނިހާދު ވިދާޅުވީ، ޅ އަތޮލަކީ ފަތރުވެރިކަމުގައި މުހިިންމު ދައުރެއް އަދާކުރާ އަތޮޅެއް ކަމަށެެވެ. އެއާޕޯޓް ހުޅުވުމާއިއެކު އަތޮޅުގެ އެންމެހާ ރައްޔިތުންނަށް ފަސޭހަތަކެއް ވެގެންދާނެ ކަމަށާއި، އަތޮޅުގެ ރައްޔިތުންނަށް ވަޒީފާގެ ފަހި ފުރުސަތުތައް ލިބިގެންދާނެ ކަމަށެވެ. ވިޔަފާރީގެ އައު ދޮރުތަކެއް ހުޅުވިގެންދާނެ ކަމަށާއި، އިގްތިސާދީ ކުރިއެރުމުގެ މުހިންމު ބައިވެރިއަކަށް އެއާރޕޯޓް ވެގެންދާނެ ކަމަށް ނިހާދު ވިދާޅުވިއެވެ.
މީގެ އިތުރުން ލާމަރުކަޒީ ސިޔާސަތު ތަންފީޒު ކުރުމަށް ވެސް އެއާޕޯޓްގެ ސަބަބުން ފަހިކަންލިބިގެންދާނެ ކަން ނިހާދު ވެސް ފާހަގަަކުރެއްވިއެވެ.
މަޑިވަރުގެ އެއާޕޯޓުގެ ޓެސްޓް ފްލައިޓް ޖެއްސީ 2021ވަނަ އަހަރުގެ ޑިސެމްބަރު މަހުގެ 25ވަނަ ދުވަހުއެވެ. މަޑިވަރު އެއަރޕޯޓް ހިންގުމަށް ގައުމީ އެއަރލައިން ހިންގާ އައިލެންޑް އޭވިއޭޝަން ސާރވިސަސް ލިމިޓެޑާއި ހަވާލުކުރީ 2022 ޖެނުއަރީ 18ގައެވެ.
