ރާއްޖޭގައި ހިލޭ ޑިގްރީއަށް ކިޔަވައިދޭން ފެށިތާ ތިން އަހަރު ފެބްރުއަރީ 14ށް ވީއިރު މިހާތަނަށް 13،284 ދަރިވަރުން ސަރުކާރުން ތައާރަފްކުރި ހިލޭ ޑިގްރީއަށް ފުރުސަތު ދީފިއެވެ.

ހިލޭ ޑިގްރީއަށް ކިޔަވައިދޭން ފެށިތާ ތިން އަހަރު ވުމާއި ގުޅިގެން މިނިސްޓަރ އޮފް ހަޔަރ އެޑިއުކޭޝަން ޑރ. އިބްރާހިމް ހަސަން ވިދާޅުވީ ހިލޭ ޑިގްރީއިން އެމަނިކުފާނު ދެކެވަޑައިގަންނަވަން ބޭނުންފުޅުވާ ލަނޑުދަނޑިއަކީ އިލްމީ ޖީލެއް ބިނާވެގެން ދިއުން ކަމަށެވެ. އަދި އިލްމީ މީހުންނަށް ކުރާ އިހުތިރާމު މުޖުތަމައުއުން އިތުރުވެގެން ދިއުމާއި ކަންކަމުގައި ބަސް ކިޔޭ މީހުންނަކީ ތައުލީމީ ހުނަރުވެރި ތަޖުރިބާ ހުރި ފަރާތްތަކަށް ވެގެން ދިއުން ކަމަށް ވިދާޅުވިއެވެ.

މިނިސްޓަރ ވިދާޅުވީ އެމަނިކުފާނު ބޭނުންފުޅުވަނީ ވީހާވެސް ގިނަ ބަޔަކަށް މަތީ ތައުލީމުގެ ފުރުސަތު ފަހިވެފައި އޮތުން ކަމަށެވެ. އަދި ކޮވިޑް-19 ގެ ސަބަބުން ދިމާވި މާލީ ދަތިކަމާއެކުވެސް ތައުލީމު އުނގެނުމުގެ ފުރުސަތު އޮތް ކަމަށާއި އެކަމުގެ ސަބަބުން އިޖުތިމާއީ ގިނަ މައްސަލަތަކަށް ހައްލު ލިބިގެން ދިޔަ ކަމަށް ވިދާޅުވި އެވެ.

ހިލޭ ޑިގްރީގެ ޕްރޮގްރާމުގެ ދަށުން 2,127 ދަރިވަރުން މިހާރު ވެސް ވަނީ ޑިގްރީ ފުރިހަމަކޮށްފައެވެ.

މިހާތަނަށް ހިލޭ ޑީގްރީއަށް ކިޔެވުމުގެ ފުރުސަތު ލިބުނު 13،284 ދަރިވަރުންގެ ތެރޭގައި ހިމެނެނީ:

2019 ވަނަ އަހަރު: 4,804 ދަރިވަރުން،

2020 ވަނަ އަހަރު: 4،818 ދަރިވަރުން،

2021 ވަނަ އަހަރު: 3،301 ދަރިވަރުން،

2022 ވަނަ އަހަރުގެ މިހާތަނަށް: 361 ދަރިވަރުންނެވެ.

މިއަހަރު ސްޓޫޑެންޓް ލޯން ސްކީމަށް އިތުރު 720 ފުރުސަތު ހަޔަރ އެޑިއުކޭޝަން މިނިސްޓްރީން ވަނީ ހުޅުވާލާފައެވެ. ލޯނު ސްކީމުގެ މުއްދަތު ހަމަވާނީ އަންނަ މާޗް މަހުގެ 3 ވަނަ ދުވަހުގެ 13:30 ގެ ނިޔަލަށެވެ.

މިއަހަރުގެ ރިޔާސީ ބަޔާނުގައި ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު ވަނީ 2023 ގެ ނިޔަލަށް 5000 އަށް ވުރެން ގިނަ ކުދިން ހިލޭ ޑިގްރީ ހަދައިގެން ގައުމު ބިނާކުރަން ނުކުންނާނެ ކަމަށް ވިދާޅުވެފައެވެ.  

މަތީ ތައުލީމް ހާސިލް ކުރުމުގެ ފުރުސަތު ހިލޭ ދިނުމަކީ ރައީސް އިބްރާހިމް މުހައްމަދު ސޯލިހްގެ ފުރަތަމަ 100 ދުވަހުގެ ވައުދުތަކުގެ ތެރެއިން ވައުދެކެވެ.