ލިވަޕޫލް މޮޅުވިއިރު، ވުލްވްސް އަތުން ޓޮޓެންހަމް ބަލިވެއްޖެ

އިނގިރޭސި ޕްރިމިއާ ލީގުގައި ބާންލީ އަތުން ލިވަޕޫލް މޮޅުވިއިރު، ވުލްވްސް އަތުން ޓޮޓެންހަމް ބަލިވެއްޖެއެވެ.

ރަށުން ބޭރުގައި ކުޅުނު މި މެޗު ލިވަޕޫލުން ކާމިޔާބުކުރީ 1-0 ގެ ނަތީޖާއަކުންނެވެ.

މެޗު ފަށައިގެން ބާންލީން ވަނީ ލިވަޕޫލް ހާސްކޮށްލައިފައެވެ. އެގޮތުން ބާންލީގެ ވައުޓް ވެގްހޯސްޓާއި، ޖޭ ރޮޑްރިގޭޒަށް ހުސްކޮށް ލިބުނު ފުރުސަތުތަކުގެ ހުރަހަކަށްވީ ލިވަޕޫލްގެ ކީޕަރު އެލިސަން ބެކާއެވެ.

މީގެ އިތުރުން ފުރަތަމަ ހާފުގައި ލިވަޕޫލްގެ ފޯވާޑް ސަޑިއޯ މާނޭ ބޮލުން ފޮނުވާލި ހަމަލާ ބާންލީގެ ކީޕަރު ނިކް ޕޯޕް ވަނީ ހުށިޔާރުކަމާއެކު ދިފާއުކޮށްފައެވެ.

ލިވަޕޫލުން މެޗުން މޮޅުކޮށްދިން ލަނޑު މެޗުގެ 40 ވަނަ މިނެޓުގައި އެޓީމަށް ކާމިޔާބުކޮށްދިނީ ފަބީނިއޯއެވެ. މިއީ މާނޭގެ އެހީތެރިކަމާއެކު ފަބީނިއޯ ކާމިޔާބުކޮށްދިން ލަނޑެކެވެ.

މެޗުގެ ދެވަނަ ހާފުގައި ދެ ޓީމުގެ ފަރާތުން ފެނިގެންދިޔައީ ހަމަހަމަ ކުޅުމެކެވެ. ލިވަޕޫލުން ލީޑު ފުޅާކުރުމަށް ކުރި މަސައްކަތުގެ ހުރަހަކަށްވީ ބާންލީގެ ކީޕަރު ނިކް ޕޯޕްއެވެ.

އަމިއްލަ ދަނޑުގައި ވުލްވްސް އާއި ދެކޮޅަށް ކުޅުނު މެޗުން ޓޮޓެންހަމް ބަލިވީ 2-0 ގެ ނަތީޖާއަކުންނެވެ.

މި މެޗުގެ ފުރަތަމަ 18 މިނެޓުގެ ތެރޭގައި ވުލްވްސްއިން ވަނީ ދެ ލަނޑު ޖަހައިފައެވެ.

ވުލްވްސްއިން ވަނީ މެޗުގެ ހަވަނަ މިނެޓުގައި ލަނޑު ޖަހާ ލީޑު ނަގައިފައެވެ. މި ލަނޑު އެޓީމަށް ކާމިޔާބު ކޮށްދިނީ މެކްސިކޯގެ ފޯވާޑް ރައުލް ހިމެނޭޒްއެވެ. އަދި މެޗުގެ 18 ވަނަ މިނެޓުގައި ޓޮޓެންހަމްގެ ޑިފެންޑަރުން ހެދި ގޯހެއްގެ ފައިދާ ނަގައި ލެއޮންޑާ ޑެންޑޮންކާ ވަނީ ލަނޑު ޖަހާ ވުލްވްސްއަށް ލީޑު ނަގައިދީފައެވެ.

މި މެޗުގެ ފަހުކޮޅު ޓޮޓެންހަމުން ވުލްވްސްގެ ހާފަށް ބާރުބޮޑުކޮށް ގިނަ ހަމަލާތަކެއް އުފައްދަން މަސައްކަތް ކުރި ނަމަވެސް ވުލްވްސްގެ ޑިފެންޑަރުން ވަނީ ޓޮޓެންހަމްގެ ހަމަލާތައް ހުއްޓުވުމުގައި މުހިންމު ދައުރެއް އަދާކޮށްފައެވެ.

ކޮންޓޭ، ޓޮޓެންހަމް ގޮވައިގެން އެންމެ ފަހުން ލީގުގައި ނުކުތް ތިން މެޗުން ވެސް ބަލިވެފައިވާއިރު، މިއީ 2009 ވަނަ އަހަރުގެ ފަހުން ކޮންޓޭ ހުރި ޓީމެއް ލީގެއްގައި ޖެހިޖެހިގެން ތިން މެޗުން ބަލިވި ފުރަތަމަ ފަހަރެވެ.

މި ނަތީޖާތަކާއެކު ލީގު ތާވަލުގެ އެއްވަނައިގައި މެންޗެސްޓާ ސިޓީން އޮތީ ކުޅުނު 25 މެޗުން ލިބުނު 63 ޕޮއިންޓާއެކުގައެވެ. ދެވަނައިގައި އޮތް ލިވަޕޫލަށް 24 މެޗުން 54 ޕޮއިންޓް ލިބިފައިވާއިރު ތިންވަނައިގައި އޮތް ޗެލްސީއަށް 24 މެޗުން 47 ޕޮއިންޓް ވަނީ ލިބިފައެވެ.