މާލީ ފުދުންތެރިކަން އިތުރުކުރުމަށް އަތޮޅު ފިހާރައިގެ މަންފާ ލިބޭނެ ގޮތެއް ފަހިކޮށްދިނުމަށް ފ. އަތޮޅު ކައުންސިލުން އެދިއްޖެ
މިނިސްޓްރީތަކާ މަޝްވަރާ ކުރައްވައިގެން އެދެވޭ ޙައްލެއް ހޯދައިދޭނަން
ފ. އަތޮޅު ކައުންސިލާއި، ފ. ނިލަންދޫ ކައުންސިލާއި، ނިލަންދޫ އަންހެނުންގެ ތަރައްޤީއަށް މަސައްކަތްކުރާ ކޮމިޓީއާ ނާއިބު ރައީސް ބައްދަލުކުރެއްވުން
ރައީސުލްޖުމްހޫރިއްޔާގެ ނައިބު ފައިޞަލް ނަސީމް ނިލަންދެ އަތޮޅު ދެކުނުބުރީ ނިލަންދޫއަށް ޒިޔާރަތްކުރައްވައި ފ. އަތޮޅު ކައުންސިލާއި، ފ. ނިލަންދޫ ކައުންސިލާއި، ނިލަންދޫ އަންހެނުންގެ ތަރައްޤީއަށް މަސައްކަތްކުރާ ކޮމިޓީއާ ބައްދަލުކުރައްވައި އެ އަތޮޅާއި، ނިލަންދޫގެ ތަރައްޤީއާ ގުޅޭގޮތުން ފުޅާ ދާއިރާއެއްގައި މަޝްވަރާ ކުރައްވައިފިއެވެ.
ފ. އަތޮޅު ކައުންސިލް އިދާރާގައި ބޭއްވި މި ބައްދަލުކުރެއްވުމުގައި ކައުންސިލަރުންނާއި އަންހެނުންގެ ތަރައްޤީއަށް މަސައްކަތްކުރާ ކޮމިޓީގެ ފަރާތުން ވަނީ އަތޮޅާއި ރަށުގެ ތަރައްޤީއަށް ބޭނުންވާ ކަންކަން ފާހަގަކުރައްވައި، ތަރައްޤީއާގުޅޭ ގޮތުން ރައްޔިތުންގެ ހުރި ކަންބޮޑުވުންތަކާއި އިޙްސާސްތައް ރައީސުލްޖުމްހޫރިއްޔާގެ ނައިބާ ހިއްސާކުރައްވާފައެވެ. މިގޮތުން، ނިލަންދޫ ކައުންސިލުން ވަނީ އެ ކައުންސިލުގެ މާލީ ފުދުންތެރިކަން އިތުރުކުރުމަށް އަތޮޅު ފިހާރައިގެ މަންފާ ލިބޭނެ ގޮތެއް ފަހިކޮށްދިނުމަށް ރައީސުލްޖުމްހޫރިއްޔާގެ ނައިބުގެ އަރިހުގައި ދަންނަވާފައެވެ. މީގެ އިތުރުން ވެސް ނިލަންދޫ ރައްޔިތުންނަށް ދިމާވެފައިވާ ބަނދަރުގެ ދަތިކަމާއި، ނަރުދަމާ ނިޒާމް ޤާއިމުކުރުމުގެ މަސައްކަތް އަވަސްކޮށްދިނުމާ ގުޅޭގޮތުންނާއި، މިސްކިތުގެ ޙާލަތު ދަށްވުމުގެ ސަބަބުން ހުރި ކަންބޮޑުވުންތަކާއި، ރަށުގައި ގޯތި ދޫކުރުމާ ގުޅޭގޮތުން ނިލަންދޫ ކައުންސިލުން ރައީސުލްޖުމްހޫރިއްޔާގެ ނައިބާ މަޝްވަރާކުރެއްވިއެވެ.
ފ. އަތޮޅު ކައުންސިލުން ފާހަގަކުރެއްވި ކަންކަމުގެ ތެރޭގައި އެ އަތޮޅު މަގޫދޫ ބަނދަރުގެ ޖާގައިގެ ދަތިކަމާއި، ކައުންސިލްތަކަށް އާމްދަނީ އިތުރުކުރުމުގެ ގޮތުން ވިޔަފާރި ކުރުމުގައި ދިމާވާ ބައެއް އިދާރީ ގޮންޖެހުންތަކާއި، ކައުންސިލްތަކުގެ ބަޖެޓުގެ ދަތިކަން ވަނީ ފާހަގަކުރައްވާފައެވެ. މީގެ އިތުރުން ވެސް ދަރަނބޫދޫގެ ރަށްގިރާތީ ހުރި ކަންބޮޑުވުންތަކާއި، ނިލަންދޫ މަގުތަކުގެ ޙާލަތު ގޯސްވުމުން އަތޮޅު ހޮސްޕިޓަލަށް ބަލި މީހުން ގެންދިޔުމުގައި ދިމާވާ ގޮންޖެހުންތައް ވަނީ އަތޮޅު ކައުންސިލުން ފާހަގަކުރައްވާފައެވެ.
އަންހެނުންގެ ތަރައްޤީއަށް މަސައްކަތްކުރާ ކޮމިޓީއިން ވަނީ ރަށުކައުންސިލުގެ ބަޖެޓުން ކޮމިޓީއަށް 5 އިންސައްތައި ގެ ބަޖެޓެއް ކަނޑައަޅާފައި އޮންނައިރު، ކޮމިޓީ މެންބަރުންގެ މުސާރަ ބޮޑުކުރުމުން އިތުރު ޕްރޮގްރާމެއް ހިންގުމަށް ބަޖެޓުގެ ދަތިކަން ދިމާވާކަން ފާހަގަކުރައްވާފައެވެ.
މި ބައްދަލުކުރެއްވުމުގައި ރައީސުލްޖުމްހޫރިއްޔާގެ ނައިބު ވަނީ ކައުންސިލަރުންނާއި އަންހެނުންގެ ތަރައްޤީއަށް މަސައްކަތްކުރާ ކޮމިޓީއިން ފާހަގަކުރެއްވެވި ކަންކަމުގައި ކަމާގުޅޭ މިނިސްޓްރީތަކާ މަޝްވަރާކުރައްވައިގެން އެދެވޭ ޙައްލެއް ހޯއްދަވައިދެއްވުމަށް މަސައްކަތް ކުރައްވާނެކަމުގައި ވިދާޅުވެފައެވެ.
މި ބައްދަލުކުރެއްވުމުގެ ކުރިން ރައީސުލްޖުމްހޫރިއްޔާގެ ނައިބު ވަނީ ފ. އަތޮޅު ހޮސްޕިޓަލަށް ޒިޔާރަތްކުރައްވައި އެތަނުގެ ޙާލަތު ބައްލަވާލައްވާފައެވެ. އަދި އެއަށްފަހު އެމަނިކުފާނު ވަނީ ފ. އަތޮޅު ތަޢުލީމީ މަރުކަޒަށް ޒިޔާރަތްކުރައްވައި އެތަނުގެ މެނޭޖްމަންޓާއި ބައްދަލުކުރައްވާ މަޝްވަރާކުރައްވާފައެވެ.
