ސީރިއާގައި ހިނގަމުންދާ ދާޚިލީ ހަނގުރާމައިގައި ބައިވެރިވުމަށް ތުރުކީ މަގުން ސީރިއާއަށް ދިޔަ މައްސަލައިގައި މއ. މާރަނގަ ޙަސަން ފައިޒަންގެ މައްޗަށް އުފުލާފައިވާ ދައުވާގެ ޝަރީއަތުގެ އަޑުއެހުމެއް އާދިއްތަ ދުވަހު ކްރިމިނަލް ކޯޓުގައި ކުރިއަށް ގެންގޮސްފިއެވެ.

ކްރިމިނަލް ކޯޓުގައި މި މައްސަލަ ކުރިއަށް ގެންދަވަނީ ގާޒީ ހުސައިން ފާއިޒު ރަޝާދެވެ.

މި މައްސަލައިގައި އެންމެ ފަހުން ބޭއްވި އަޑުއެހުމުގައި ވަނީ ހެކި ހާމަކުރުމުގެ ބައި ކުރިއަށް ގެންދަވާފައެވެ. އެގޮތުން ދައުލަތުން ވަނީ ޝަފަހީ ހެކިންގެ ގޮތުގައި އެއްހެކި ހުށައަޅާފައެވެ. އެއީ ފުލުހުންގެ މޯބައިލް ފޮރެންސިކް ރިޕޯޓު ތައްޔާރުކުރެއްވި އޮފިސަރެވެ. ކިތާބީ ހެކީގެ ގޮތުގައިވެސް ދައުލަތުން ގިނަ ހެކިތަކެއް ހުށައަޅާފައިވެއެވެ. ދިފާއުން ވަނީ އެއްވެސް ދިފާއީ ހެއްކެއް ހުށައަޅާފައި ނުވާނެކަަމަށް ފާހަގަކޮށްފައެވެ. އެއާއެކު ގާޒީ ވަނީ ދެން މައްސަލައިގެ އަޑުއެހުންތައް ކުރިއަށްދާނެ ގޮތުގެ ތާވަލެއް ހިއްސާ ކުރައްވާފައެވެ.

މި މައްސަލައިގައި އެންމެ ފަހުން ބޭއްވި އަޑުއެހުމުގައި ފުލުހުންގެ އިންޓެލިޖެންސް ރިޕޯޓު ދައުވާ ލިބޭ ފަރާތަށް ދޫކުރުމުގެ ބަދަލުގައި ޝަރީއަތުން ކަނޑައަޅާ އުސޫލެއްގެ މަތިން ދިރާސާ ކުރެވޭ ގޮތަށް ހެކި ރައްކާތެރި ކުރުމުގެ އަމުރެއް ގާޒީ ވަނީ ނެރެދެއްވާފައެވެ. އެއީ 2 ފެބްރުއަރީ 2022 ގައެވެ.

މި މައްސަލައިގައި އާދިއްތަ ދުވަހު ކުރިއަށްދިޔަ އަޑުއެހުމުގައި އޮތީ މި މައްސަލައިގެ ޝަރީއަތް ފަށައި، ދައުލަތުގެ ހެކިންގެ ހެކިބަސް ނެގުމެވެ. އެގޮތުން ފުރަތަމަ އޮތީ މޯބައިލް ފޮރެންސިކް ރިޕޯޓު ތައްޔާރު ކުރެއްވި އޮފިސަރުގެ ހެކިބަސް ނެގުމުގެ ބައެވެ. އެހެންނަމަވެސް ފުލުހުންގެ މޯބައިލް ފޮރެންސިކް ރިޕޯޓު ހުށައެޅުމުގެ ކުރިން ފުލުހުންގެ އިންޓެލިޖެންސް ރިޕޯޓާއި ގުޅިގެން ދިފާއުން ފާހަގަ ކުރަން ބޭނުންވާ ކަންކަން ހުރުމާއެކު އަޑުއެހުމުގެ އެ ބައި ވަނީ ސިއްރު ކޮށްފައެވެ. ސަބަބަކީ ހެކިބަހުގެ ކުރިން އިންޓެލިޖެންސް ރިޕޯޓާއި ގުޅޭ ވާހަކަތަކެއް ދިފާއުން ޝަރީއަތުގައި ދައްކަން ބޭނުންވާކަން ފާހަގަ ކުރުމާއި ގުޅިގެންނެވެ.

އެ ބައި ކުރިއަށް ގެންދެވުމަށްފަހު ވަނީ ޝަރީއަތް އެހެން ދުވަހަކަށް ފަސްކޮށްފައެވެ. އެގޮތުން މޯބައިލް ފޮރެންސިކް ރިޕޯޓު ތައްޔާރު ކުރެއްވި އޮފިސަރުގެ ހެކިބަސް ނެގުން މިހާރު ވަނީ 20 ފެބްރުއަރީއަށް ފަސްކޮށްފައެވެ.

މައްސަލައިގެ ޚުލާސާއެއް:

ޙަސަން ފައިޒަން ނޮވެމްބަރު 2017 ގައި ރާއްޖެއިން ފުރައިގެން ތުރުކީއަށް ގޮސް، ތުރުކީގައި ޙަރަކާތްތެރިވަމުން ދަނިކޮށް އެ ޤައުމުގެ ސަލާމަތީ ބާރުތަކުން ވަނީ ތުރުކީއާއި ސީރިއާ ގުޅޭ ބޯޑަރުން އޭނާ ހައްޔަރުކޮށް އަނބުރާ ރާއްޖެއަށް ފޮނުވާލާފައެވެ. ދައުލަތުން ވަނީ އޭނާއަކީ ސީރިއާގައި ހިނގަމުންދާ ދާޚިލީ ހަނގުރާމައިގައި ބައިވެރިވުމަށް ދިޔަ މީހެއްކަމަށް ތުހުމަތުކޮށްފައެވެ.

އޭރު ފައިޒަން ވަނީ އޭނާގެ މައްޗަށް ކުރާ ދައުވާއަށް އިންކާރު ވެސް ކޮށްފައެވެ. ކޯޓުގައި ފައިޒަން ބުނެފައިވަނީ ތުރުކީއަށް ދިޔައީ ޓޫރިސްޓެއްގެ ގޮތުގައި ކަމަށާއި ސީރިޔާއަށް ދާން ގަސްދެއް ނުކުރާ ކަމަށް ބުނެފައެވެ. އަދި ތުރުކީ ސިފައިން އޭނާ އަތުލައިގެންފައިވަނީ އޮޅިގެން ސީރިޔާއަށް އެތެރެވާން އުޅެނިކޮށް ކަމަށް އޭނާ ބުނެފައިވެއެވެ.