ސީޕީ ހަމީދަށް ރައީސް ޔާމީން : މިލިއަނުން ފައިސާ ޚަރަދު ކުރާކަމަށް ހީވިޔަސް، ފައިސާ ހިފައިގެނެއް ނޫޅެން
ރާއްޖެއަކީ ފުރިހަމައަށް އިންޑިއާ އަސްކަރިއްޔާގެ ބާރު ހިނގާ ތަނެއް ކަމަށާ ރައީސްޔާމީން ތުހުމަތު ކުރެއްވިއެވެ
ރ. މީދޫގައި ބޭއްވި އިންޑިއާ އައުޓް ކެމްޕޭން ހަރަކާތުގައި ރައީސް ޔާމީން ވާހަކަފުޅު ދައްކަވަނީ
މިލިއަނުން ފައިސާ ޚަރަދު ކުރާކަމަށް ކޮމިޝަނަރ އޮފް ޕޮލިސް މުހައްމަދު ހަމީދަށް ހީވިޔަސް އެކަން އެގޮތަށް ނުކުރައްވާ ކަމަށް ކުރީގެ ރައީސް އަބްދުﷲ ޔާމީން ވިދާޅުވެއްޖެއެވެ.
ރ. މީދޫގައި ބޭއްވި އިންޑިއާ އައުޓް ކެމްޕޭން ހަރަކާތުގައި ވާހަކަފުޅު ދައްކަވަމުން ޔާމީން ވިދާޅުވީ ޕީޕީއެމްގެ މެމްބަރުން ކޮމަންޑޫ ދާއިރާގައި އެތައް ދުވަހަކު މަސައްކަތް ކުރި ކަމަށާއި އެމީހުންނަށް ލިބިފައި ހުރި ވަސީލަތްތަކަކީ ޕާޓީގެ މީހުންގެ ޖޯޝާއި ފޯރިޔާއި އިހްލާސްތެރިކަން ކަމަށެވެ.
ޕީޕީއެމުން މިލިއަނުން މިލިއަން ފައިސާ ޚަރަދު ކުރާ ކަމަށް ސީޕީ ހަމީދަށް ހީވިޔަސް ފައިސާ ހިފައިގެން ނޫޅޭ ކަމަށް ޔާމީން ވިދާޅުވިއެވެ. އަދި އިންޑިއާ އިން އިންޓެލިޖަންސް ހޯއްދަވަން އުޅުމުން ހަމީދަށް އެގޮތަށް މައުލޫމާތު ލިބިވަޑައިގެންނެވި ކަމަށާއި އަމިއްލަފުޅަށް އިންޓެލިޖަންސް ހޯދިނަމަ އެއަށްވުރެން ސައްހަ މައުލޫމާތު ލިބުނީސް ކަމަށް ޔާމީން ވިދާޅުވިއެވެ.
އިންޑިއާ އައުޓް ކެމްޕޭނަކީ ކުރާ ޖިހާދެއް ކަމަށާއި މިކަންތައްތައް ބަލަން ރައީސުލްޖުމްހޫރިއްޔާ އިބްރާހިމް މުހައްމަދު ސާލިހަށް ކެތް ނުވާނެ ކަމަށް ވިދާޅުވިއެވެ. އަދި ސިންގަޕޫރަށާއި އެހެން ތަންތަނަށް ފުރާވަޑައިގަންނަވަނީ މިހެންވެގެން ކަމަށް ޔާމީން ތުހުމަތު ކުރެއްވިއެވެ.
ޕީޕީއެމްގެ ހަރަކާތްތަކުގެ މަންޒަރުތައް ބަލަން ސަރުކާރުގެ އިސް މަޤާމުތަކުގައި ތިއްބެވި ބޭފުޅުންނަށް ދަތިވެގެން އުޅުއްވާ ކަމަށް ވެސް ވިދާޅުވިއެވެ.
ކުރިންނަމަ ޤައުމުގެ މިނިވަންކަން ގެއްލުވާލަން މަސައްކަތް ކުރަނީ އިދިކޮޅުގައި ތިބޭ ބަޔެއް ކަމަށާއި އެހެންނަމަވެސް، މިފަހަރު މިނިވަންކަން ނަގާލައިގެން އުޅެނީ ދައުލަތުގެ އިސްވެރިން ކަމަށް ޔާމީން ވިދާޅުވިއެވެ.
ޔާމީން ވަނީ މި ސަރުކާރުގެ އެއްވެސް ބާރެއް ނެތްކަމަށް ވިދާޅުވެ ވަރަށް ބޮޑަށް ފާޑުވިދާޅުވެފައެވެ. އެގޮތުން މިއީ ފުރިހަމައަށް އިންޑިއާ އަސްކަރިއްޔާގެ ބާރު ހިނގާ ތަނެއް ކަމަށާއި ދައުލަތުގެ ބާރު ހިނގާ ސަރުކާރެއް ނޫން ކަމަށް ޔާމީން ވިދާޅުވިއެވެ.
މިހާރު ތިބި ވެރިން ވެރިކަމުން ދުރުވުމުން ބޮޑު ޖަލެއް އަޅަން ޖެހޭނެ ކަމަށާއި އެ ޖަލު އަޅާނީ މީދޫގައި ކަމަށް ވެސް ޔާމީން ވިދާޅުވިއެވެ.
އިދިކޮޅު ލީޑަރު ކުރީގެ ރައީސް އަބްދުﷲ ޔާމީން ޖަލު ހުކުމުން މިނިވަންވެވަޑައިގަތުމާއެކު "އިންޑިއާ އައުޓް" ހަރަކާތް ގެންދަނީ ދުވަހެއް ދުވަހަކަށް ފުޅާ ކުރައްވަމުންނެވެ. އެގޮތުން އެކި ރަށްރަށަށް ވަޑައިގެން އެ ކެމްޕޭން ހިންގަވަމުން ގެންދަވާއިރު، އިންޑިއާ އަސްކަރިއްޔާ މި ގައުމުން ބޭރު ކުރުމުގެ ނަމުގައި ފެށި ހަރަކާތް މިހާރު ވަނީ ބަދަލުވާން ފަށާފައެވެ.
އެގޮތުން އަމިއްލަ ގޭގޭގައިވެސް އިންޑިއާ އައުޓް ޖެހުމަށް ރައީސް ޔާމީން ގޮވާލައްވާފައިވާއިރު، މިއީ ސިޔާސީ ގޮތުން ވަކި މަގުސަދެއް ހާސިލު ކުރުމަށް ހިންގަމުން ގެންދާ ހަރަކާތެއްގެ ގޮތުގައި ގިނަ ބަޔަކު ދަނީ ސިފަ ކުރަމުންނެވެ. އަދި އިންޑިއާ އައުޓްގެ ނަމުގައި ޕެޓިޝަނެއްގައި ސޮއިކުރުންވެސް ކުރިއަށް ގެންގޮސްފައިވާއިރު މި ޕެޓިޝަންގައި ބުނަނީ މި ސަރުކާރުން އިންޑިއާއާއެކު ސިއްރު އަސްކަރީ އެއްބަސްވުންތަކެއްގައި ސޮއިކުރަމުން ގެންދާ ކަމަށެވެ. އަދި ގާނޫނުއަސާސީއާ ޚިލާފަށް ރާއްޖޭގެ ތަންތަން އިންޑިއާއަށް ދޫކޮށްފައިވާކަމަށެވެ.
