ޖެނުއަރީ މަހު އާމްދަނީގެ ގޮތުގައި މީރާއަށް 2.36 ބިލިއަން ރުފިޔާ

ފާއިތުވި ޖެނުއަރީ މަހު މޯލްޑިވްސް އިންލެންޑް ރެވެނިއު އޮތޯރިޓީ (މީރާ)ން އާމްދަނީގެ ގޮތުގައި 2.36 ބިލިއަން ރުފިޔާ ބަލައިގަނެފައިވާކަމަން އެއިދާރާއިން ހާމަކޮށްފިއެވެ.

މީރާއިން އާންމުކުރި ޖެނުއަރީ މަހުގެ ތަފާސްހިސާބުތައް ދައްކާގޮތުން ފާއިތުވި ޖެނުއަރީ މަހުގެ ތެރޭގައި މީރާއިން ވަނީ އާމްދަނީގެ ގޮތުގައި 2.36 ބިލިއަން ދިވެހި ރުފިޔާ ބަލައިގަނެފައެވެ. އޭގެ ތެރޭގައި 73.88 މިލިއަން އެމެރިކާ ޑޮލަރު ހިމެނެއެވެ.

މިދިޔަ ޖެނުއަރީ މަހުގެ ތެރޭގައި ޖުމްލަ ދެ ބިލިއަނަށްވުރެ ގިނަ ރުފިޔާ އާމްދަނިގެ ގޮތުގައި މީރާއިން ބަލައިގަނެފައި ވާއިރު، މިއީ މިދިޔަ އަހަރުގެ ޖެނުއަރީ މަހާއި އަޅާބަލާއިރު، 31.2 އިންސައްތައިގެ އިތުރުވުމެކެވެ. އަދި މިދިޔަ އަހަރުގެ ޖެނުއަރީ މަހާއި އަޅާބަލާއިރު މިއަހަރުގެ ޖެނުއަރީ މަހު ލިބޭނެކަމަށް މީރާއިން އަންދާޒާކުރި ވަރަށްވުރެ މިއަހަރުގެ ޖެނުއަރީމަހު ލިބުނު އާމްދަނީ ވަނީ 38.65 އިންސައްތަ އިތުރުވެފައެވެ.

މީރާއިން ބުނީ މިދިޔަ އަހަރުގެ ޖެނުއަރީއާއި އަޅާބަލާއިރު މިއަހަރުގެ ޖެނުއަރީ މަހު އާމްދަނީގެ ގޮތުގައި ބަލައިގަތް އަދަދު މިހާ ބޮޑުތަން އިތުރުވެފައިވަނީ ޓީޖީއެސްޓީ، ޖީއެސްޓީ، އިންކަމް ޓެކްސް އަދި ގްރީން ޓެކްސްގެ އިތުރުން އެއަރޕޯޓް ޓެކްސް އާއި ފީގެ ގޮތުގައި ލިބުނު އާމްދަނީ އިތުރުވެފައިވާތީ ކަމަށެވެ. 2020 ވަނަ އަހަރުގެ ޑިސެމްބަރު މަހާއި އަޅާ ބަލާއިރު 2021 ވަނަ އަހަރުގެ ޑިސެމްބަރު މަހު ރާއްޖެއަށް ޒިޔާރަތްކުރި ފަތުރުވެރިންގެ އަދަދު ވަނީ ދެގުނަ އިތުރުވެފައެވެ. އެހެންކަމުން އެފަރާތްތަކުގެ އަތުން ނަގާފައިވާ ޓެކްސްއާއެކު މިއަހަރުގެ ޖެނުއަރީ މަހު ލިބުނު އާމްދަނީ ވަނީ ބޮޑުތަނުން އިތުރުވެފައެވެ.

މީގެ އިތުރުން، 2022 ވަނަ އަހަރުގެ ޖަނަވަރީ މަހު ލީސް ޕީރިއަޑް އެކްސްޓެންޝަން ފީގެ ގޮތުގައި އާމްދަނީ ލިބިފައިވުމަކީވެސް މިއަހަރުގެ ޖަނަވަރީމަހު ލިބުނު އާމްދަނީ އިތުރުވުމުގެ ސަބަބެއްކަމަށް މީރާއިން ފާހަގަކުރެއެވެ. ނިމުނު 2021 ވަނަ އަހަރުގެ ޖެނުއަރީ މަހު މި ފީ ލިބިފައެއް ނުވެއެވެ.

ފާއިތުވު ހަތަރު އަހަރަށް ބަލާނަމަވެސް ޖެނުއަރީ މަހުގެ ތެރޭގައި އެންމެ ބޮޑު އާމްދަނީއެއް ލިބިފައިވަނީ މިއަހަރުގެ ތެރޭގައެވެ. 2018 ވަނަ އަހަރުގެ ޖެނުއަރީ މަހު މީރާއިން އާމްދަނީގެ ގޮތުގައި 2،194.2 މިލިއަން ރުފިޔާ ބަލައިގަނެފައި ވާއިރު، 2019 ވަނަ އަހަރު ބަލައިގަނެފައި ވަނީ 2،124.7 މިލިއަން ރުފިޔާއެވެ. 2020 ވަނަ އަހަރު މިއަދަދު އުޅެނީ 1،813.1 މިލިއަން ރުފިޔާގައެވެ. 2021 ވަނަ އަހަރުގެ ޖެނުއަރީމަހު އާމްދަނީގެ ގޮތުގައި މީރާއިން ބަލައިގަނެފައި ވަނީ 1،800.7 މިލިއަން ރުފިޔާއެވެ.

މިއަހަރުގެ ޖެނުއަރީ މަހުވެސް މީރާއަށް އެންމެ ބޮޑު އާމްދަނީއެއް ލިބިފައިވަނީ ޖީއެސްޓީގެ ގޮތުގައެވެ. މީރާއިން ބަލައިގަތް އާމްދަނީގެ 44.6 އިންސައްތައަކީ ޖީއެސްޓީގެ ގޮތުގައި ލިބިފައިވާ އާމްދަނީއެވެ. މީރާއިން ބަލައިގަތް އާމްދަނީގެ ދެން އެންމެ ބޮޑު ހިއްސާއެއް އޮތީ އިންކަމް ޓެކްސްގައެވެ. މީރާއަށް ލިބުނު އާމްދަނީގެ 36.6 އިންސައްތަ ލިބިފައިވަނީ އިންކަމް ޓެކްސްގެ ގޮތުގައެވެ.